E, Yete̱na njo̱m to̱ po̱ ńena ni maswe̱le̱ babo̱ muka e titi, ke̱ bekaisedi ba batudu bangame̱n ja, bena be se̱medi o byemban ba mboṅ a musonje be dili.​—1 Kor. 6:18.

Dibe̱le̱ la batudu di mombwea to̱ti te̱ ná pe̱ńe̱pe̱ńe̱ o bia nga bekaisedi bangame̱n ja to̱ ke̱m. K’eyembilan: Nu mome na nu muto ba be̱n bedangwedi ba mbamba kwaṅ e? Mo̱ ba ta ba mákusa malea jombwea bedangwedi ba be̱ne̱nno̱ mō̱ na nune̱ e? Nje e boli ná ba nange o mulemlem ma ndabo e? Mo̱ ba boṅsane̱ nde o bola nika e? Ba ta ba be̱ne̱ epolo o bola ńai nipe̱pe̱, nga njo̱m i maswe̱le̱ babo̱ muka ye e, muyo̱mbo̱ ma mambo to̱ lambo l’epańpań yen ebe, nde di boli ná ba be̱ eto̱m o nanga o mulemlem ma ndabo e? (Mul. 9:11) Ne̱ni benangedi babu o ni ndabo be tano̱ e? Kana bete̱medi te̱ beno̱ diwengisan, mambo mape̱pe̱ me ná ma be̱ mena batudu ba me̱nde̱no̱ jombwea.

Ombusa babo̱ po̱ngo̱ muwaso, dibe̱le̱ la batudu di me̱nde̱ so̱ jombwea nga ba bato babane̱ bangame̱n o ko̱kisabe̱ to̱ ke̱m.