Nika di mabatano̱ jokwa bede̱mo ba moto nika pe̱ nde di mabatano̱ bia nu moto, diko̱m lasu na mo̱ pe̱ di bata be̱ ngińa. Mulemlem pe̱ nde yeno̱ na Yehova, nika di mabatano̱ bia bede̱mo bao, nika pe̱ nde di mabatano̱ bia ne̱ni eno̱, diko̱m lasu na mo̱ pe̱ di bata be̱ ngińa. Oteten a bede̱mo ba Loba be̱se̱, bene̱i bende̱ne̱ be nde: Ngińa, dibie̱, te̱me̱ la sim, na ndolo.

“O̱, a Yehova Sango! Mbwe̱ te̱, wa nde o weki mo̱ń na wase na ngiń’ango̱ ninde̱ne̱.”​—YEREMIA 32:17.

Bewekedi be malee̱le̱ ngiń’a Loba. K’eyembilan, o te̱m te̱ o eboko o ponda ńena wei yeno̱, nje o masengano̱ o eyobo ango̱ e? Ebabad’a wei. Ngin’a eweked’a Yehova nde weno̱ o senga nika. Nate̱na o njika dime̱ne̱ wei yeno̱ ngińa e? Wea yena ye o mutonga mao ye 150 000 la ngedi ngińa buka wea ya madiba ma to̱i bwambwam. Sekundi te̱ wei i mabusise̱ ngińa ńe kapo̱ ka ngiń’a buma la bebwea ba lodun la ko̱s’a mabumbe.

Nde wei i salo kobisane̱ lodun la lodun la ngengeti ye o misipo. Bamabie̱ ba nin wase ba so̱i ná ngengeti po̱ ńa yi i kolo buka ye̱se̱ ba bele̱no̱ ná UY Skuti, e kolo 1 700 ba ngedi buka wei. Ba we̱le̱ te̱ UY Skuti o epol’a wei, e mamińa ngo̱nde̱ ine̱i ye be̱be̱ na wei: Me̱rkur, Venus, Wase, Mars, nde e no̱ngo̱ pe̱ buka epolo ngo̱nde̱ ni belabe̱ ná Jupite̱r e no̱ngino̱ dinge̱le̱ wei. Pondapo̱ nika e mongwane̱  biso̱ o bata so̱ṅtane̱ byala ba Yeremia ná Yehova Loba a po̱ngi mo̱ń na wase, nika ńe nde ná misipo, na ngiń’ao ninde̱ne̱.

Ne̱ni ngiń’a Loba ńeno̱ ná e wanea biso̱ tombwane̱ e? Longe̱ lasu di se̱medi nde o bewekedi ba Loba be me̱ne̱ne̱ ka wei, name̱ne̱ pe̱ na mane̱ mambo me̱se̱ me o wase. Omo̱ń a nika, Loba a mabolane̱ ngiń’ao o jongwane̱ mō̱ na mō̱ ńasu te̱. Ne̱ni e? O ebwe’a mbu yaboso, Loba a boli Yesu ngińa o bola bebolo ba betańsedi. Di malanga o Bibe̱l ná: “Bandima ba ne̱ne̱, bam’boko ba nidangwa, bamulo̱ngo̱ ba nibo̱le̱, bando̱ki ba nisenga, bawedi ba nipumbwabe̱le̱.” (Mateo 11:5) O nin we̱nge̱ pe̱ e? Bibe̱l e kwali ná: “A mabatea nuwo̱li ngińa,” E bata pe̱ ná: “Ba ba pite̱ na Yehova ba makusa ngud’a peńa.” (Yesaya 40:29, 31) Loba e ná a bola biso̱ “ngińa ni pakapakan” ná di we̱le̱ buka to̱ lembe̱ mitakisan na makekisan ma longe̱. (2 Korinto 4:7) Mo̱ nika e si mabola wa ńo̱ngi o sisea be̱be̱ na Loba nu mabolane̱ na ndolo ngiń’ao ni pakapakan ońola bwam basu e?

“A Yehova, bebolo bo̱ngo̱ biti nde ne̱ e! O ta o weka mo̱ na dibie̱.”​—MYENGE 104:24.

Nika di mabatano̱ jokwa mambo Loba a wekino̱, nika pe̱ nde dibie̱ lao di matańse̱no̱ biso̱. Biomimetik ńe nde jokwa la bewekedi o bwam ba jembilane̱ nje Loba a wekino̱. Bamabie̱ bō̱ ba mombwa bewekedi ba Yehova nde ba po̱ngo̱ mambo me bowan. K’eyembilan, bembilane̱ nde diso̱ la moto o po̱ngo̱ kamera, na ino̱n o po̱ngo̱ avion.

Ewekedi yena e mabonde̱ dibie̱ la Loba buka be̱se̱ ye nde ńol’a mot’a benama. K’eyembilan, jombweye mbadi mun’a mwe̱nge̱ a malongabe̱no̱. Belongedi bao be mabotea nde na no̱k’a yadi ńa mome na ńa muto i malate̱ o po̱ngo̱ no̱ki po̱. Ni no̱ki po̱ e bambe̱ ADN, ni be̱n mambo me̱se̱ ma bambe̱ longe̱ la moto. Ni no̱ki e maba ńolo o busise̱ jita la no̱ki ipe̱pe̱ ye bowan. Nde o ponda ni te̱nge̱n, yi no̱ki i mabotea be̱ diwengisan, i busise̱ bebwea ba ńai na ńai a no̱ki, ka no̱k’a maya, no̱k’a bo̱ngo̱, na no̱k’a bewese. Dibokime̱ne̱ belongi ka mulema na bo̱ngo̱ ba mabotea dangwa. Ombusa myo̱di dibua, ni no̱k’a boso po̱ e matimba mot’a benama nu longedi na lodun la lodun la no̱ki. Dibie̱ ben belongedi be mabonde̱no̱ di matute̱le̱ bato jita o be̱ eyal’ewo̱ na mutiled’a Bibe̱l nu kwali ná: “Na masoma wa ońolana na wekabe̱ na ka ni mubisane̱ na tańsane̱ bwambi.”​—Myenge 139:14.

Ne̱ni dibie̱ la Loba leno̱ ná di wanea biso̱ tombwane̱ e? Muwekedi a bi nje e mapule̱ biso̱ ná di be̱ bonam. Kana a be̱nno̱ dibie̱ na so̱ṅtane̱ dinde̱ne̱ a mabola biso̱ malea me dibie̱ o Eyal’ao, Bibe̱l. A mome̱le̱ ná: “Lakisane̱ . . . mō̱ na nune̱ mawuse̱.” (Kolose 3:13) Ma malea me dibie̱ e? E. Muwaso mu lee̱le̱ ná be̱ la ńai ni malakise̱ di mongwane̱ o be̱ne̱ iyo̱ a bwam, di sibise̱ pe̱ moto tansio̱n. Di meka pe̱ diboa la mo̱nge̱le̱, na maboa mape̱pe̱. Loba e nde ka diko̱m le dibie̱ na di mombweye̱ biso̱, di mabole̱ biso̱ malea ma mongwane̱ na mena me biso̱ muse̱ṅ ponda ye̱se̱. (2 Timoteo 3:16, 17) O si me̱nde̱ to̱ndo̱ be̱ne̱ ni ńai a diko̱m e?

“Yehova a to̱ndi ka ni te̱m.”​—MYENGE 37:28.

Loba a mabola nde nje e te̱m ná sim ponda ye̱se̱. Bibe̱l mo̱ ná: “Bola la bobe di be̱ etum na Loba, ka ni si te̱m e po̱te Ńangum etum!” (Hiob 34:10) Bekaisedi bao be ka ni te̱m, ka nje te̱ mulo̱ngedi a kwalino̱ ke̱ a makwalisane̱ Yehova ná: “O makaise̱ bonabato ka ni te̱m.” (Myenge 67:5) Kana ‘Yehova a mombwano̱ mulema’ a titi ná a wo̱ndo̱be̱, a dongame̱n ponda ye̱se̱ o je̱ne̱ mbale̱ na kaise̱ pe̱ ka ni te̱m. (1 Samuel 16:7) Omo̱ń a nika, Loba a bi ka ni si te̱m ná sim te̱ na mate̱ki ba mabolane̱ o wase, a kakane̱ pe̱ ná son a ponda “bayaṅe̱ Loba . . . ba me̱nde̱ bo̱ n’ekombo.”​—Minia 2:22.

Nde Loba a titi mukaisedi ńe njo nu le̱le̱m o ko̱kise̱. A malee̱le̱ ndedi yete̱na e mapula nika. Bibe̱l mo̱ ná: “Yehova e ndolo na muyao,” a malee̱le̱ pe̱ mo̱ na babobe ke̱ bate̱le̱ na mbale̱. Nika e titi nde te̱me̱ la sim la mbale̱ e?​—Myenge 103:8; 2 Petro 3:9.

Ne̱ni te̱me̱ la sim la Loba leno̱ ná di wanea biso̱ tombwane̱ e? Petro a kwali ná: “Loba a titi ndando; nde o tumba te̱ nu nu mabwe̱ mo̱ bo̱ngo̱, a bola pe̱ te̱me̱ la sim, a makasabe̱ na mo̱.” (Bebolo 10:34, 35) Di matombwane̱ te̱me̱ la sim la Loba ońolana a titi ndando. E ná a kasa biso̱, di be̱ pe̱ baboledi bao esibe̱ jombwa muso̱no̱ m’eyobo, ekombo, dime̱ne̱ la jokwa, to̱ pat’a moto jeno̱.

Nika Loba a mapulano̱ ná di so̱ṅtane̱ na tombwane̱ pe̱ te̱me̱ lao la sim, a boli biso̱ doi la mulema. Betiledi be makwalea ońola doi la mulema ka mbenda ni “tilabe̱ o milema [masu],” ńena ni ‘mabole̱ mboṅ’ o bīse̱ biso̱ nga bedangwedi basu be bwam to̱ ke̱m. (Roma 2:15) Ne̱ni di matombwane̱no̱ e? Doi lasu la mulema lokwabe̱le̱ te̱ bwam, le ná di tute̱le̱ biso̱ o banga beboledi be ná be wanea biso̱ mbeu a ńolo to̱ bena be bobe. Di wusi pe̱ te̱, le ná di tute̱le̱ biso̱ o jate̱le̱ na po̱ngulane̱ pe̱ bedangwedi basu. Na mbale̱, be̱ne̱ la so̱ṅtane̱ la te̱me̱ la sim la Loba di mongwane̱ biso̱ o sisea mo̱ be̱be̱!

“Loba e nde ndolo.”​—1 YOHANE 4:8.

Loba a malee̱le̱ ngińa, dibie̱, na te̱me̱ la sim, nde Bibe̱l e si makwala ná Loba e nde ngińa, e nde dibie̱, to̱ ná e nde te̱me̱ la sim. E makwala nde ná e nde ndolo. Ońola nje e? Ońolana je ná di te̱nge̱ne̱ o kwala ná ngiń’a Loba e mabola mo̱ epolo o bola mambo, te̱me̱ lao la sim na dibie̱ pe̱ ba madie̱le̱ mbadi a mabolano̱. Nde ndol’a Yehova e matute̱le̱ mo̱ o bola. Nje ye̱se̱ a mabolano̱ e se̱medi nde o ndolo.

To̱ná Yehova a si matakano̱ to̱ lambo, ndol’ao nde e matute̱le̱ mo̱ o weka bewekedi be dibie̱, o mo̱ń na o wase, bena be matombwane̱ ndolo na dibongo lao na bwane̱ pe̱ mo̱ muńe̱nge̱. A boṅsane̱ wase ná e be̱ wum’a boja yangame̱n ońola mbel’a moto. A mabenga pe̱ lee̱le̱ bato ba benama be̱se̱ ndolo ninka ná “a mabola wei ao i pańa omo̱ń a babobe na babwam, a mayo̱lise̱ pe̱ mbua omo̱ń a bate̱m na sim na basite̱m na sim.”​—Mateo 5:45.

Omo̱ń a nika, “[Yehova] a londi na bwam, a be̱n pe̱ na mulema ma ndedi.” (Yakobo 5:11) A malee̱le̱ ndolo ońola ba bena ba mano̱nge̱ ponda o bia mo̱ na sisea pe̱ mo̱ be̱be̱. Loba a me̱ne̱ nde yi ńai a bato ka bewekedi bao. Mbale̱ ńe nde ná, “a mombwea [wa].”​—1 Petro 5:7.

Ne̱ni ndol’a Loba ńeno̱ ná e wanea biso̱ tombwane̱ e? Di mabwane̱ besibedi ba wei ba mpesa muńe̱nge̱. Je muńe̱nge̱ o senga lo̱ la mun’a mwe̱nge̱. Ndol’a elong’asu ya mbia ńe biso̱ tiki. Man mambo me ná ma si be̱ ma mweńa, nde ma mawanea biso̱ muńe̱nge̱ munde̱ne̱.

Di matombwane̱ pe̱ muka mwe nde mbadi nipe̱pe̱ Loba a malee̱le̱no̱ biso̱ ndolo. Bibe̱l e mome̱le̱ ná: “Lo si no̱ngo̱ mutaka ońola to̱ lambo, nde o mambo me̱se̱ ese̱le̱ ná mpuli mańu mu biane̱ oboso ba Loba tongwea na muka na beso̱so̱medi na bola la masoma.” Ka sango ńe ndolo, a mapula ná di baise̱ mo̱ jongwane̱, di langweye mo̱ njib’a mulema masu. Kana eno̱ ndolo, Yehova a kakane̱ o bola biso̱ “musango ma Loba mwena mu buki dibie̱ le̱se̱.”​—Filipi 4:6, 7.

Mo̱ yen ekwal’a pat’a pe̱m e mombweye̱ bede̱mo bende̱ne̱ ba Loba​—ka ngińa, dibie̱, te̱me̱ la sim, na ndolo​—yongwane̱ wa o bata bia ne̱ni Loba eno̱ e? Ná ndolo o be̱nedino̱ Loba e bate kola, di mome̱le̱ wa ná wokwe bia nje a bolino̱ na nje a me̱nde̱no̱ bola ońola muse̱ṅ mo̱ngo̱.