O MIŃA ma Paulo, myo̱lo̱ ma tobotobo ońola bale̱ lo̱ndo̱ mi si ta. Ná ba so̱ ndiyo, bale̱ lo̱ndo̱ ba ta nde ba baise̱ bato bape̱pe̱ nga ba bi bo̱lo̱ ba ńunga bo male̱ owe̱ni beno̱ wala na bwe ná bwemea no̱ngo̱ moto. (Bebolo 21:2, 3) To̱ o ponda bo̱lo̱ bo si tano̱ bwala owe̱ni mwale̱ lo̱ndo̱ eno̱ wala, o mabo̱ me o nge’ao ńa lo̱ndo̱, a wusa wasa bo̱lo̱ bope̱pe̱ bo masise̱le̱ mo̱ be̱be̱ na we̱ni eno̱ wala.​—Bebolo 27:1-6.

Lo̱ndo̱ la munja di ta nde di be̱ne̱ pond’a tobotobo oteten a mbu, myo̱lo̱ pe̱ mi si ta mi be̱ne̱ ponda ni te̱se̱be̱ o nime̱le̱. O sumo te̱ pond’a bobe, basina bena ba ta ba dubadubane̱ ba ta ba ko̱lo̱ngo̱ne̱ timbise̱le̱ lo̱ndo̱ ombusa ke̱ be̱n mbena. K’eyembilan, ese̱se̱ e te̱m o bo̱lo̱ nde e lo̱ngo̱, to̱ bo̱lo̱ bo lo̱i bwena madiba ma nime̱le̱no̱ o sawa. Basina ba ta ba tombwane̱ ke̱ ngo̱ e mongwane̱ ońola bodu, ba ta so̱ be̱ ba nime̱le̱ ke̱ ngo̱ ńe bwam. Mwale̱ lo̱ndo̱ a ta be̱ a so̱i te̱ bo̱lo̱ bo matungane̱ mo̱ we̱ni a malano̱, a mala ja o mbasanedi ma dibo̱ na myuna mao o jenge̱le̱ ná dikalo di bolabe̱ ná bo̱lo̱ bo niya nime̱le̱.

Mulangwe̱ myango mō̱ Lionel Casson mo̱ ná: “Mundi ma Roma mu ta mongwane̱ bato o so̱ bo̱lo̱ ba ndiyo na bo̱bise̱ la ńolo ná ba si wasa ndiyo na babo̱ mo̱me̱ne̱. Mabo̱ mao ma ta nde o du la Mo̱pi ma Tiber. O mbasanedi ma mundi ma Ostia o ta o be̱ne̱ epolo ende̱ne̱ e ta e be̱ne̱ o̱fis jita. Jita la yin o̱fis di ta nde di be̱ne̱be̱ na bato bena ba re̱nti myo̱lo̱ o ńai na ńai a mabo̱. Be bepolo be ta o Narbonne [ńe o Fre̱nsi ńa we̱nge̱], o Kartage [ńe o Tunisia ńa we̱nge̱], . . . na nika. Mwale̱ lo̱ndo̱ a ta so̱ nde ala o yi o̱fis o to̱ njika mundi mwe o nge’ao ńa lo̱ndo̱.”

Lo̱ndo̱ la munja di si ta di no̱ngo̱ne̱ bato pond’a bwaba, nde di ta di be̱ne̱ yao mbeu a ńolo. Paulo indi o munja ngedi jita o malo̱ndo̱ mao ma muloloma.​—2 Kor. 11:25.