• Po̱so̱be̱ na Loba. “Na máte̱se̱ po̱n Kiṅ’am . . . na mabola wa matumba ka sango, masu ma wase pe̱ ka lambo lo̱ngo̱.”​—Myenge 2:6, 8.

• Sangwa kond’a Kiṅe̱ David. “Muna a yabe̱ye̱ biso̱, mun’a mome a bolabe̱ biso̱ . . . O lańse̱ janea na bola kond’a David na janea lao musango mu si be̱n su; o sikime̱ye̱ na bokise̱ mo̱.”​—Yesaya 9:5, 6.

• Yabe̱ o Betlehem. “A Betlehem . . . , mō̱ a me̱nde̱ busea mba nu me̱nde̱ be̱ mwanedi . . . A mabe̱ne̱ edube nate̱na o masu ma wase.”​—Mika 5:1, 3.

• Bangabe̱ na bwabe̱ pe̱. “A ta a langabe̱ minaka . . . Di si ta di langa mo̱ ka lambo. . . . Ońola mawuse̱ masu nde a numabe̱no̱, a dosabe̱le̱ pe̱ nde ońola myobe masu.”​—Yesaya 53:3, 5.

• Pumbwa na bolabe̱ edube. “O si me̱nde̱ bake̱ mudī mam o [“so̱ngo̱,” NWT] to̱ jese̱le̱ ná nu nu to̱ndi wa e̱ne̱ ebo̱du. . . . bonam pe̱ [bo mabe̱] o dia lo̱ngo̱ la mom bebe be̱se̱.”​—Myenge 16:10, 11.

O myango ma mbel’a moto me̱se̱, moto mō̱ buka te̱ nde a malondise̱ mato̱ti ma Mwanedi ńangame̱n; nu moto e nde Yesu Kristo. Ange̱l e ta e kwalane̱ Maria, ńango a Yesu ná: “Loba Sango a me̱nde̱ bola mo̱ kond’a janea ńa sango ao David; . . . nde janea lao di si me̱nde̱ be̱ne̱ su.”​—Lukas 1:31-33.

Yesu a si timbi mwanedi o wase. O diwengisan, ka Kiṅ’a Janea la Loba, byanedi bao omo̱ń a bato ba benama be me̱nde̱ nde wa la mo̱ń. Ońola nje eno̱ Mwanedi ńangame̱n e? Jombweye te̱ nje a bolino̱ niponda a tano̱ o wase.

•   Yesu ombwedi bato. Yesu ongwane̱ bome na bito, beso̱mbe̱ na badun, esibe̱ jombwea we̱ni ba wuno̱, to̱ nga be m’bwaṅ to̱ tue. (Mateo 9:36; Marko 10:16) Ponda mot’a mulo̱ngo̱ mō̱ a kwalane̱no̱ mo̱ ná: “Wemedi te̱, we ná o sangise̱ mba,” Yesu a bwedi mo̱ ndedi na mo̱ a bo̱lise̱ mo̱.​—Marko 1:40-42.

• Yesu okwe̱le̱ biso̱ ne̱ni do̱lisane̱ Loba. A kwali ná: “Lo titi ná lo bolea Loba, nde lo bolea pe̱ bema ba wase.” A kwali pe̱ ná jangame̱n bolea bato nje di mapulano̱ ná ba boleye biso̱​—be bete̱sedi nde be timbi belabe̱ ná Mbend’a gol. O mbat’a nika, di malee̱ ná di to̱ndi Loba seto̱ buka te̱ tongwea na bebolo basu, nde tongwea na mo̱nge̱le̱ na besengedi basu ba teten pe̱. Ná di do̱lisane̱ so̱ Loba, jangame̱n jalea besengedi basu ba teten. (Mateo 5:28; 6:24; 7:12) Yesu a kiki pe̱ ná, ná di be̱ bonam na mbale̱, jangame̱n jokwa bia nje Loba a mapulano̱ ná di bole, nde di bola pe̱ nika.​—Lukas 11:28.

• Yesu okwe̱le̱ nje to̱ndo̱ la bane̱ di mapulano̱ kwala. Bebolo ba Yesu na byala bao be ta ngińa, be tapi pe̱ milema ma basengedi bao. “Mamuti ma ta ma tańa ońola belēdi bao; ebanja a ta a lee̱ babo̱ ka mō̱ nu be̱n doi.” (Mateo 7:28, 29) A kwalane̱ babo̱ ná: “To̱ndo̱ basingedi bańu.” A kane̱ na ońola ba bena ba ta ba pula bwa mo̱ ná: “A Te, lakise̱ babo̱, ebanja ba si bi nje ba mabolano̱.” ​—Mateo 5:44; Lukas 23:34.

Yesu a dongame̱n o be̱ Mudied’a wase ebanja e muyao, a to̱ndi pe̱ jongwane̱ bato. Nde njika ponda so̱ a me̱nde̱no̱ botea janea e?