Ndenge̱ e kwedi te̱ ka: mudika, soa la mińangadu, mpupe, to̱so̱ pungwea la mudongo ma wea, Mboṅ a Yehova i mako̱to̱me̱ o pomane̱ wanea bonasango abu jongwane̱. Mi miwe̱n mi malee̱le̱ ndol’a ńo̱ngo̱ńo̱ngo̱ di be̱ne̱ne̱no̱ mō̱ na nune̱. (Yohane 13:34, 35; 1 Yohane 3:17, 18) Ne̱ni di mawanano̱ di jongwane̱ e?

Di mabola mo̱ni. Ponda njai ninde̱ne̱ e tano̱ o Yudea, Kriste̱n ya boso i lomedi bonasango abu bō̱ o mudī mo̱ni o jongwane̱ babo̱. (Bebolo 11:27-30) Mulemlem pe̱ we̱nge̱, di sengi te̱ ná bonasango asu ba kusi ndutu o epas’a wase ewo̱ di malomea babo̱ jongwane̱ tongwea na mwemba mabu.​—2 Korinto 8:13-15.

Di malomea babo̱ bema be malondise̱ ńo̱ng’abu. Batudu ba mwemba ba mano̱ngo̱ ndutu o bia nga elong’a mwemba ewo̱ te̱ ye o ndutu to̱ ke̱m. Bonasango bá be̱n mboṅ a jombwea nika bá maloma mbo̱ti, da, madiba ma ńo̱ ma bwam, nikame̱ne̱ pe̱ na ngus’a myanga o jongwane̱. Bonasango asu jita bá bi ebol’a mā, ba mala jongwane̱ o po̱ngulane̱ milongi na Mandabo ma Janea ma buledi. Mulatako masu nikame̱ne̱ pe̱ na ko̱lo̱ngo̱ne̱ la bola ebolo mwemba, ba mongwane̱ biso̱ o pomane̱ sue̱le̱ bonasango asu ke̱ ni pond’epo̱i. Ye mbale̱ ná di mongwane̱ bonasango asu o mudī, nde di mongwane̱ pe̱ na bá be̱se̱ ba titi o dube̱ diwo̱ na biso̱.​—Galatia 6:10.

Di mawanea babo̱ jongwane̱ o mambo ma mudī, jembe̱ pe̱ milema mabu. Bato bena ndutu e kweledino̱ ba be̱n ńo̱ng’a belo̱ko̱medi. O ni ponda, di makusa ngińa ni mawe̱ na Yehova, “Loba la lo̱ko̱mea le̱se̱.” (2 Korinto 1:3, 4) Je muńe̱nge̱ o langwea babo̱ makakan ma betiledi na bola babo̱ mbaki ná Janea la Loba, di mabo̱le̱ son a ponda ndenge̱ ye̱se̱ i mawane̱ ndutu na take.​—Bebīsedi 21:4.

• Ońola nje Mboṅ a Yehova i mapomane̱no̱ jongwane̱ o ponda ndenge̱ e?

• Ne̱ni Mboṅ a Yehova i mabolane̱no̱ Bibe̱l o jongwane̱ bato be o ndenge̱ e?