Ngus’a mińa oboso ba kwed’ao, Yesu a bīse̱ ná: “Min myango ma bwam ma Janea mi me̱nde̱ langwabe̱ o wase ńe̱se̱ o be̱ mboṅ ońola matumba me̱se̱; denge̱ su di mapo̱.” (Mateo 24:14) Nde ne̱ni di dikalo o wase ńe̱se̱ di wusano̱ te̱be̱ e? Tongwea na jembilane̱ patan Yesu a bolino̱ ponda á tano̱ o wase.​—Lukas 8:1.

Jo̱mbe̱ na jo̱mbe̱. Yesu okwe̱le̱ bokwedi bao o te̱ dikalo la myango ma bwam o jo̱mbe̱ na jo̱mbe̱. (Mateo 10:11-13; Bebolo 5:42; 20:20) A lee̱ pe̱ babo̱ epolo bangame̱ne̱no̱ o te̱ dikalo. (Mateo 10:5, 6; 2 Korinto 10:13) Mulemlem pe̱ nde yeno̱ we̱nge̱. Ebol’asu ya dikalo e bokisabe̱ bwam, mwemba te̱ mu be̱n yao epol’a te̱ dikalo. Nika e matute̱le̱ biso̱ o bupe̱ o̱d’a Yesu ńa ‘te̱ye̱ bato be̱se̱ dikalo na bola pe̱ mboṅ.’​—Bebolo 10:42.

Mbadi ipe̱pe̱ ya te̱ dikalo. Yesu a te̱ dikalo bepolo be̱se̱, o dibo̱, o ko̱n’a ngea, o wuma bato ba matoano̱ madiba, ná nika e die̱le̱ biso̱ eyembilan. (Marko 4:1; Yohane 4:5-15) Ka Yesu biso̱ pe̱ di mate̱ dikalo o to̱ njik’epolo di mabomane̱no̱ bato. O don, o nge’a eyidi, o bepolo ba ndio, o esukulu, o wum’ebolo, tongwea na telefon. Ye̱ne̱ne̱ te̱, di mate̱ye̱ belongi basu ba mbia dikalo. Min miwe̱n masu mi mongwane̱ jita la bato o wase ńe̱se̱ o senga myango ma bwam ma jongise̱.​—Myenge 96:2.

Mo̱, o bi moto ńena o me̱nde̱no̱ to̱ndo̱ o langwea myango ma bwam ma Janea la Loba na nje ye̱se̱ nika e me̱nde̱no̱ o wanea mo̱ e? O si kombe̱ so̱ mi myango ma dipita ońola wame̱ne̱. Ye̱ne̱ne̱ te̱, langwea mo̱ bape̱pe̱!

• Njika “myango ma bwam” mangame̱ne̱ langwabe̱ e?

• Ne̱ni Mboṅ a Yehova i membilane̱no̱ Yesu o mbad’ao ya te̱ dikalo e?