Yehova a mengane̱ ba bena be o diba ná ba tingame̱ na kakane̱ ba bolino̱ nu ba baino̱. Yehova a kwali ponda a latino̱ mom’a boso na mut’a boso ná: “Moto a me̱nde̱ . . . tingame̱ na munj’ao; nde ba me̱nde̱ nde be̱ eyobo ewo̱.” Ombusa  ponda, Yesu Kristo a timbise̱le̱ milemlem ma byala nde a bata pe̱ ná: “Di lena Loba a latino̱, moto a s’aba so̱ mo̱.” (Bebotedi 2:24; Mateo 19:3-6) Yehova na Yesu ba me̱ne̱ nde diba ka mulatako mwangame̱ne̱ o je̱ o longe̱ le̱se̱ natē̱ kwedi e wana jabane̱ oteten a mome na muto. (1 Korinto 7:39) Kana diba leno̱ nde bete̱sedi ba bosangi, kwed’a diba e s’angame̱ne̱ so̱ no̱ngo̱be̱ ka lambo di wam. Yehova a singe̱ kwed’a diba ńena ni si be̱n njo̱m ni se̱medi o Betiledi.​—Maleaki 2:15, 16.

Njika njo̱m a kwed’a diba Betiledi be mabolano̱ e? Yehova a singe̱ wite̱ la musonje na mbamba. (Bebotedi 39:9; 2 Samuel 11:26, 27; Myenge 51:6) Musonje mwe mo̱ ńakaka nate̱na o dime̱ne̱ lena a mese̱le̱no̱ ná mu be̱ njo̱m a kwed’a diba. (Ná o bie nje ye musonje, ala o Jokwa 9, dongo 7, we̱ni beteledi be bolabe̱no̱.) Yehova a boli mome to̱ muto ba wusane̱no̱ wonja o no̱ngo̱ bedomsedi ba bwa diba to̱ ke̱m. (Mateo 19:9) Nde, nu ba wusane̱no̱ a kwali te̱ ná a mabwa diba, a titi o bola lambo Yehova a singe̱no̱. To̱ mwemba ma Kriste̱n pe̱ mu si matute̱le̱ moto o bwa diba. Nde, bete̱medi bō̱ be ná be bola ná nu ba wusane̱no̱ a tike ja na nu nu wusi, tobotobo yete̱na ate̱le̱ na mbale̱. Nde mbale̱ ńe nde ná ba bena ba be̱n njo̱m a Betiledi ńa bwa diba, bangame̱ne̱ o no̱ngo̱ bedomsedi na babo̱me̱ne̱ na jemea pe̱ nje ye̱se̱ nika e mawanano̱ ka betune. ​—Galatia 6:5.

O bete̱medi bō̱ be tombise̱ jamba, Kriste̱n iwo̱ i no̱ngi bedomsedi ba jabane̱ na nu ba baino̱ to̱so̱ bwa diba to̱ e be̱ nde ná njo̱m a musonje e titi. O i ńai a bete̱medi Bibe̱l e makwala ná nu ńabane̱ “a je mulamba, to̱ a timbe do̱lisane̱” nu a baino̱. (1 Korinto 7:11) Ni Kriste̱n ńabane̱ e titi wonja o lata diba na moto nupe̱pe̱. (Mateo 5:32) Jombweye bete̱medi bō̱ be tombise̱ jamba be ná be̱ne̱ne̱ na bō̱ ka njo̱m a jabane̱.

Banga la sombwea ndabo a mbia na dipama. Mbia mwe ná mu ko̱ tue dinde̱ne̱, mu si be̱ne̱ to̱ dikala la idiba, ońolana sango a mboa a si masombwea mbia mao, nde ke̱ a be̱n ngudi o bola nika. Bibe̱l e makwala ná: “Yete̱na moto a si masombwea bona bao, sepo̱n bato bao ba ndabo, ke̱ a to̱bi nde jemea, e bobe buka nu nu si be̱n jemea.” (1 Timoteo  5:8) Yete̱na ni ńai a moto e bangi o tukwa bedangwedi bao, muto angame̱n no̱ngo̱ bedomsedi nga a me̱nde̱ to̱ndo̱ kusane̱ go̱bina dipapa la jabane̱ o bwam ba tata ja lao la bwam la mo̱me̱ne̱ na la bana bao. Kriste̱n e numabe̱ te̱ njo̱m a banga sombwea mbia mao, batudu bangame̱ne̱ jombwea bo bwambo ná pe̱ńe̱pe̱ńe̱. Banga la jombwea ndabo ao ńa mbia le ná di wana ná moto a pangabe̱ o bebokedi.

Njo ninde̱ne̱. Mō̱ oteten a mome to̱ muto e ná a be̱ njo o dime̱ne̱ lena eno̱ ná a kusise̱ ja la bwam na longe̱ la nune̱ njo̱m. Yete̱na nu beno̱ numa njo̱m a njo e nde Kriste̱n, batudu o mwemba bangame̱ne̱ o wase̱le̱ bia nga nika ńe mbale̱ to̱ ke̱m. Be̱ne̱ l’ede̱mo a jońa na malinga na bolane̱ la njo be nde njo̱m ye ná i bola ná moto a pangabe̱ o bebokedi.​—Galatia 5:19-21.

Jeka moto o mbadi ńasam o be̱ne̱ mulatako ma bwam na Yehova. Mome to̱ muto e ná a keka o ponda ye̱se̱ jeka nune̱ ná alane̱ jowe̱ la mbale̱ oboso to̱so̱ e ná a keka ńakisane̱ nune̱ ná a bule̱le̱ mambenda ma Loba o mbadi po̱ to̱ nine̱. O ni ńai a bete̱medi, nu beno̱ o jeka angame̱ne̱ o no̱ngo̱ bedomsedi nga nje ye̱se̱ eno̱ ná a bola o benga “sengane̱ Loba buka bato” ye nde ná a kusane̱ go̱bina dipapa la jabane̱.​—Bebolo 5:29.

E be̱ o to̱ njika bete̱medi be tombise̱ jamba ka be bena di kwaledino̱, moto to̱ mō̱ a si ńakisane̱ nu ba wusane̱no̱ o wasa jabane̱ to̱so̱ tika ja na nune̱. To̱ná mako̱m moú o mudi na batudu beno̱ ná ba wana jongwane̱, na bola pe̱ malea ma se̱medi o Bibe̱l, ba titi ná ba bo̱le̱ bia nje ye̱se̱ ye oteten a mome na muto. Yehova buka te̱ nde e ná e̱ne̱ me̱se̱. O ka ye̱se̱, muto ńe Kriste̱n a si me̱nde̱ bola Loba to̱so̱ bete̱sedi ba diba edube yete̱na a kolise̱ myambo ma ndabo ao ńa diba buka te̱ ońolana a mawasa jabane̱ na mom’ao, to̱so̱ mome bola mulemlem. Yehova a bi to̱ njika mwano mwe ná mu wekabe̱ o wana jabane̱, to̱ moto a keka nde wuta mo̱ ne̱ni. E bian ná, “mambo me̱se̱ me musamba, ma telam pe̱ o miso̱ ma nu ńena jangame̱nno̱ bola bolangi.” (Bonahebe̱r 4:13) Nde, bete̱medi bō̱ ba bobe bwasam be bengi te̱ wala oboso ponda bwaba, to̱  moto a si sa Kriste̱n yete̱na o sukan, e no̱ngi bedomsedi ba jabane̱. Omo̱ń a me̱se̱, “mō̱ ńasu te̱ a me̱nde̱ so̱ bola bolangi ońol’ao mo̱me̱ne̱ oboso ba Loba.”​—Roma 14:10-12.