JOKWA 6
Njika Dipita Le ońola Bawedi e?
1. Njika myango ma bwam mena me ońola bawedi e?
Ponda Yesu a po̱ino̱ o Betańa, o mbasanedi ma Yerusalem, a bomane̱ ná diko̱m lao Lasaro a ta a máwo̱ etum a mińa mine̱i. Yesu alo o so̱ngo̱ mwemba na Marta na Maria, bonańango a nuwedi. Na dibokime̱ne̱, dimuti di ko̱to̱me̱. A se̱ muńe̱nge̱ Marta na Maria ba bono̱ ponda Yesu a pumbwe̱le̱no̱ Lasaro!—Langa Yohane 11:21-24, 38-44.
Marta a ta a másenga myango ma bwam jombwea bawedi. A ta a bia ná Yehova a me̱nde̱ pumbwe̱le̱ bawedi ná ba be̱ pe̱te̱ longe̱ o wase.—Langa Hiob 14:14, 15.
2. O njik’ebe̱yedi bawedi beno̱ e?
Loba a langwedi Adam ná: “We nde mińangadu, o mińangadu pe̱ nde o matimbano̱.”—BEBOTEDI 3:19.
Bato ba benama ba wekabe̱ nde na mińangadu. (Bebotedi 2:7; 3:19) Moto a titi mudī mwena mwe longe̱ oteten a ńol’eyobo. Je nde bewekedi b’eyobo, ońola nika di si be̱n lambo oteten asu di matike̱ be̱ longe̱ ombusa kwedi. Di wedi te̱, bo̱ngo̱ basu na myano masu pe̱ ba mawo̱ nde. Lasaro a si lango so̱ myango to̱ mō̱ jombwea kwedi ońolana bawedi ba si bi to̱ lambo.—Langa Myenge 146:4; Mulangwedi 9:5, 6, 10.
Mo̱, wum’a wea ye, we̱ni Loba a malomano̱ bato ombusa kwedi o ko̱kise̱ babo̱ e? Kana Bibe̱l e makwalano̱ ná bawedi ba si bi to̱ lambo, be belēdi ba wum’a wea be mabola ná bato ba bake̱le̱ Loba lambo lena a si mabolano̱. Di jo̱nge̱le̱ ná Loba a mako̱kise̱ bato na wea le mo̱ lońo̱ńo̱.—Langa Yeremia 7:31.
Ombwa sinima O njik’ebe̱yedi bawedi beno̱ e?
3. Mo̱ bawedi bena ba kwalisane̱ biso̱ e?
Bawedi ba titina ba to̱po̱ to̱ senga. (Myenge 115:17) Nde ange̱l ya bobe iwo̱ i yo̱ki o kwalisane̱ bato, i bola biana ye nde bawedi. (2 Petro 2:4) Yehova a we̱le̱ biso̱ mbenda ná di si kekise̱ to̱ o kwalisane̱ bawedi.—Langa Ndimbisedi 18:10, 11.
4. Nja nu me̱nde̱ o pumbwabe̱le̱ e?
Lodun na lodun la bato bena ba nanga o so̱ngo̱ ba me̱nde̱ timba be̱ longe̱ o wase. O muso̱ngi ma ba ba matimbe̱ o bepumbwedi di be̱n pe̱ bato bō̱ ba si ta ba bia Loba, ba boli pe̱ bobe.—Langa Lukas 23:43, NW; Bebolo 24:15.
Ba pumbo be̱se̱ ba me̱nde̱ jokwa mbale̱ jombwea Loba na lee̱le̱ dube̱ labu la Yesu tongwea na sengane̱ mo̱. (Bebīsedi 20:11-13) Ba bena ba me̱nde̱ pe̱te̱ timbe̱ o longe̱ na bola mambo ma bwam ba me̱nde̱ bwane̱ longe̱ la bwindea muńe̱nge̱ o wase.—Langa Yohane 5:28, 29.
5. Nje bepumbwedi be mokwe̱le̱no̱ biso̱ jombwea Yehova e?
Loba a lom Mun’ao ná a wo̱ ońol’asu, tongwea na nika a boli ná dipita la bepumbwedi di be̱. Bepumbwedi be malee̱le̱ so̱ biso̱ ndol’a Yehova na jabea lao la ndedi. Ponda bawedi ba me̱nde̱no̱ o pumbwa, nja tobotobo o me̱nde̱no̱ o to̱ndo̱ je̱ne̱ e?—Langa Yohane 3:16; Roma 6:23.
