JOKWA 8
Ońola Nje Loba a Mese̱le̱no̱ Bobe na Take e?
1. Ne̱ni bobe bo botedino̱ e?
Loba ese̱le̱ ná bato ba die̱le̱ babo̱me̱ne̱ ponda bwaba o lee̱le̱ ná ba titina ba bo̱le̱ ndutu ya mbel’a moto
Bobe bo botedi nde o wase ponda Satan a to̱pino̱ mpoṅ maboso. O bebaedi, Satan a ta nde ange̱l ńe ná ke̱nge̱nge̱, nde “a si te̱medi o mbale̱.” (Yohane 8:44) Ese̱le̱ ná a lo̱ndo̱be̱ na bepuledi ba jowe̱ lena Loba mo̱me̱ne̱ mō̱ nde a be̱n bwam o kusa. Satan a wo̱ndi mut’a boso, Eva, a yua mo̱ mo̱nge̱le̱ ná a sengane̱ nde mo̱, seto̱ Loba. Adam a lati na Eva o kwe̱me̱ Loba. Bedomsedi ba Adam be lenedi nde moto take na kwedi.—Langa Bebotedi 3:1-6, 19.
Ponda Satan a tute̱le̱no̱ Eva ná a si sengane̱ Loba, ‘wa nde pamo te̱nge̱ne̱ doi la byanedi bāsam ba Loba, to̱so̱ epol’ao ya Ńāsam, e botedino̱. Dongo dinde̱ne̱ la mbel’a moto di lati na Satan o banga Loba ka Mwaned’abu. Satan so̱ nde a timbi o be̱ “mwaned’a wase.”—Langa Yohane 14:30; 1 Yohane 5:19.
2. Mo̱ nje Loba a wekino̱ e ta e be̱ne̱ njo̱m e?
Bebolo ba Loba be̱se̱ be ná ke̱nge̱nge̱. Loba a weki bato ba benama na ange̱l ńai ba wusano̱ o sengane̱ mo̱ esibe̱ wusa. (Ndimbisedi 32:4, 5) Ponda Loba a wekino̱ biso̱, a boli biso̱ wonja o po̱so̱ o bola bwam to̱so̱ bobe. Ni wonja e mabola biso̱ epolo o lee̱le̱ Loba ndolo di be̱ne̱ne̱no̱ mo̱.—Langa Yakobo 1:13-15; 1 Yohane 5:3.
3. Ońola nje Loba a mese̱le̱no̱ ná take e tike be̱ e?
Botea o mōnda ma Ede̱n, Yehova ese̱le̱ ná pamo te̱nge̱ne̱ doi lao la byanedi bāsam e be̱. Ońola nje e? O bwam ba lee̱le̱ ná bato ba si matombwane̱ tomtom ke̱ ba puli o janea babo̱me̱ne̱ to̱ ba we̱ nde ne̱ni. (Mulangwedi 7:29; 8:9) Ombusa 6 000 la mbu ma longe̱ la mot’a benama, ye̱ne̱ne̱ ná bwē ná, banedi ba nin wase ba si we̱li o bo̱le̱ bila, njo, si te̱me̱ la sim na diboa.—Langa Yeremia 10:23; Roma 9:17.
O diwengisan na byanedi ba mot’a benama, ba Loba be matombwane̱ nu na nu te̱ ńemedi mo̱. (Yesaya 48:17, 18) Son a ponda, Loba a mala o ńo̱so̱ manea ma bato me̱se̱. Ba bena ba po̱si o be̱ owas’a janea la Loba ba me̱nde̱ o sangwa wase.—Yesaya 11:9.—Langa Daniel 2:44.
Ombwa sinima Ońola nje Loba a mese̱le̱no̱ ná take e tike be̱ e?
4. Nje we̱lisane̱ la Loba di mabolano̱ biso̱ epolo o bola e?
Satan a kai ná bato ba mabolea nde Loba ońola ná a mate̱ke̱ babo̱. O to̱ndi sambwe̱le̱ mu mpoṅ e? E, wena! We̱lisane̱ la Loba di mabola mō̱ na mō̱ ńasu te̱ epolo o lee̱le̱ nga a mapo̱so̱ byanedi ba Loba, nga ba bato. Di malee̱le̱ mpo̱so̱ko masu tongwea na bedangwedi basu ba buńa te̱.—Langa Hiob 1:8-12; Minia 27:11.
5. Ne̱ni jeno̱ ná di po̱so̱ Loba ka Mwaned’asu e?
Mpo̱so̱ko masu mu malee̱le̱ nga di mapula Loba ka Mwaned’asu
Jena di po̱so̱ Loba ka Mwaned’asu tongwea na jokwa o bia mo̱, na no̱ngo̱ pe̱ dongo o jowe̱ la mbale̱ lena di se̱medi nde o Eyal’ao, Bibe̱l. (Yohane 4:23) Di si mapula te̱ ná Satan a be̱ mwaned’asu, jangame̱ne̱ o panda etum na politik na bila ka ne̱ni te̱ Yesu a bolino̱.—Langa Yohane 17:14.
Satan a mabolane̱ ngiń’ao o bola ná, ka ni titi ko̱nji, na beboledi ba njo be̱ne̱ne̱ ka lambo la bwam. Mako̱m na beko̱lo̱ngo̱n bena ba yo̱ye̱ biso̱ to̱ te̱nge̱ne̱ biso̱ ke̱ di bangi i ńai a beboledi. (1 Petro 4:3, 4) Je eto̱m o po̱so̱: di me̱nde̱ so̱ o lata mundenge na ba ba to̱ndi Loba e? Di me̱nde̱ o bupe̱ mambenda mao ma dibie̱ na ma ndolo e? Di boli te̱ nika, ke̱ di malee̱le̱ ná, Satan a wo̱ndi ponda a kaino̱ ná moto to̱ mō̱ a titina a sengane̱ Loba ke̱ e owas’a mitakisan.—Langa 1 Korinto 6:9, 10; 15:33.
Ndolo Loba a be̱ne̱ne̱no̱ mbel’a moto e mabola mbaki ná, bobe na take ba me̱nde̱ o bo̱. Ba badube̱ ná bediedi ba Loba be bwam nde ba po̱so̱ pe̱ mo̱, ba me̱nde̱ o bwane̱ longe̱ la bwindea muńe̱nge̱ o wase.—Langa Yohane 3:16.
