E BE Kiti Loon koo miiri cogo di? Mɔgɔ caaman b’a miiri ko mɔgɔ salen miliyari caaman bena lɔ Ala ka masasigilan ɲɛɛ fɛ, ani kiti bena tigɛ bɛɛ kelen-kelen kan. Dɔw ka sara bena kɛ hɛɛrɛ ye Ala fɛ sankolo la ani jalaki bena ben tɔɔw kan, olu bena tɔɔrɔ banbali sɔrɔ. Nka, Bibulu be kɔrɔ wɛrɛ di Kiti Loon ma. Ala ka Kuma b’a yira ko jatigɛ wagati tɛ, nka jigiya wagati lo min na adamadenya bena kɔsegi dafalenya la.

Ciden Zan be Kiti Loon lakali ten Yirali 20:11, 12 (ABM ) kɔnɔ ko: “Ne ye masasigilan belebeleba jɛman ye, ani min sigilen bɛ a kan. Dugukolo ni sankolo bolila ka bɔ o ɲɛ kɔrɔ, u ma ye tun. Ne ye suw bɛɛ ye, kunbabaw ni dɔgɔmanninw, u jɔlen bɛ masasigilan ɲɛ kɔrɔ. Kitabuw dayɛlɛla, kitabu wɛrɛ dayɛlɛla, o ye ɲɛnamaya kitabu ye. Kiri tigɛra suw kan ka kɛɲɛ ni u ka kɛwalew ye, olu minnu sɛbɛnna o kitabuw kɔnɔ.” Kititigɛla min kofɔra yan, o ye jɔn lo ye?

Jehova Ala lo ye adamadenw ka Kititigɛla kɔrɔtalenba ye. Nka, a ye kiti baara yɛrɛyɛrɛ kalifa mɔgɔ wɛrɛ ma. Ka kɛɲɛ ni Kɛwaliw 17:31 (ABM ) ye, ciden Pol y’a fɔ ko Ala “ye don dɔ sigi, a na kiri tigɛ diɲɛ bɛɛ kan ni tilennenya ye a ka cɛ  ɲɛnatɔmɔlen bolo.” O Kititigɛla ɲɛnatɔmɔlen ye Yezu Krista ye a ye min lakunu ka bɔ saya la (Zan 5:22). Nka, Kiti Loon bena daminɛ tuma juman, ani a bena mɛn fɔɔ wagati joli?

Yirali ka kitabu b’a yira ko Kiti Loon bena daminɛ Arimagedɔn kɛlɛ tɛmɛni kɔ tuma min na Sutana ka duniɲa bena halaki ka bɔ yen dugukolo kan. * ( Yirali 16:14, 16; 19:19–20:3; ABM ). Arimagedɔn kɛlɛ tɛmɛni kɔ, Sutana n’a ka jinaw bena datugu kaso la digɛndunba dɔ kɔnɔ fɔɔ saan waa kelen. O wagati la, mɔgɔ 144 000 minw ye ciyɛntaɲɔgɔnw ye sankolo la, u bena kɛ kititigɛlaw ye ani u bena kuntigiya kɛ ka ‘sigi ni Krista ye masaya la saan waa kelen.’ ( Yirali 14:1-3; 20:1-4; Ɔrɔmukaw 8:17; ABM ). Kiti Loon tɛna kɛ tile kelen walima lɛri 24 dɔrɔn koo ye. A bena mɛn fɔɔ saan waa kelen.

O saan waa kelen wagati la, Yezu Krista bena “kiri tigɛ mɔgɔ ɲɛnamaw ni suw kan.” (2 Timote 4:1, ABM ). “Mɔgɔ ɲɛnamaw” ye “jamaba” ye min bena kisi Arimagedɔn loon na ( Yirali 7:9-17). Ciden Zan fana ye suuw ye, u lɔnen be kititigɛyɔrɔ la masasigilan ɲɛ kɔrɔ. Yezu ye layidu ta ko suu kununni sababu fɛ, “minnu bɛ kaburuw kɔnɔ, olu n’a [Krista] kan mɛn. U na bɔ yen.” (Zan 5:28, 29; Kɛwaliw 24:15, ABM). Nka, kiti bena tigɛ bɛɛ kan ka kɛɲɛ ni mun lo ye?

Ka kɛɲɛ ni ciden Zan ka yeli ye, “kitabuw dayɛlɛla,” ani “kiri tigɛra suw kan ka kɛɲɛ ni u ka kɛwalew ye, olu minnu sɛbɛnna o kitabuw kɔnɔ.” Yala mɔgɔw ka kɛwali tɛmɛnenw lo be sɔrɔ o kitabuw kɔnɔ wa? Ayi, kiti tɛna tigɛ mɔgɔw kan ka kɛɲɛ n’u ka kɛwaliw ye u ye minw kɛ ka sɔrɔ ka sa. An b’o lɔn cogo di? Bibulu b’a fɔ ko: “Min sara, o hɔrɔnyara jurumu ma.” (Ɔrɔmukaw 6:7, ABM ). O cogo la, minw be lakunu ka bɔ saya la, u ka jurumu tɛmɛnenw si tɛ jati u kun tugun. Siga t’a la, Ala ka sarati kuraw lo bena kɛ o kitabuw kɔnɔ. N’u b’a fɛ ka ɲɛnamaya kɛ fɔɔ abada, minw kisira Arimagedɔn ma ani minw lakununa ka bɔ saya la, u ka kan ka Ala ka cikanw  bato. Jehova bena sarati kura o sarati kura minw sigi saan waa kelen tuma na, u ka kan k’olu fana dafa. O cogo la, kiti bena tigɛ mɔgɔw kan ka kɛɲɛ n’u ka kɛwaliw ye u ye minw kɛ Kiti Loon tuma na.

Kiti Loon tuma na, a bena kɛ siɲɛ fɔlɔ ye mɔgɔ miliyari caaman fɛ ka sababu sɔrɔ ka Ala sago lɔn ani k’u tagamacogo bɛn a ma. O kɔrɔ ko baaraba dɔ bena kɛ walisa ka mɔgɔw kalan. Tiɲɛn na, “diɲɛ mɔgɔw ben’a daminɛ ka kotilennin [degi].” (Ezayi 26:9). Nka, bɛɛ tɛna sɔn k’u ka tagamacogo bɛn ni Ala sago ye. Ezayi 26:10 (ABM ) b’a fɔ ko: “Hali ni makari kɛra mɔgɔ jugu la, a tɛna tilennenya dege. Ka a to jamana tilennen na, a bɛ to ka ko jugu kɛ, a tɛna Matigi bonyali jate.” O mɔgɔ juguw bena halaki pewu-pewu Kiti Loon na.—Ezayi 65:20.

Kiti Loon bantuma na, adamaden minw kisira, u bena ɲɛnamaya yɛrɛyɛrɛ la i ko mɔgɔ dafalenw ( Yirali 20:5, NW ). O cogo la, Kiti Loon tuma na, adamadenya bena kɔsegi dafalenya la i ko a daminɛ tuma na (1 Korɛntikaw 15:24-28). O kɔ, kɔrɔbɔli laban dɔ bena kɛ. Sutana bena bɔ a ka kaso la ani sira bena di a ma a k’a seko laban kɛ k’a ɲini ka adamadenw lafili ( Yirali 20:3, 7-10). Minw bena see sɔrɔ a kan, Bibulu ka layidu nin bena dafa bɛrɛbɛrɛ olu koo la: “Dugukolo na kɛ mɔgɔ tilennenw ciyɛn ye. U na sigi a kan badaa.” (Zaburuw 37:29, ABM ). Tiɲɛn na, Kiti Loon bena kɛ dugaw sababu ye adamaden kantigimanw bɛɛ fɛ!