Denwolo be se ka furuɲɔgɔnw ɲagali wala k’u niin degun. Ni aw siɲɛ fɔlɔ lo ka deen sɔrɔ, a be se ka bari aw la k’a ye ko aw ka ɲi k’aw ka fanga n’aw ka wagati fanba kɛ ka aw ka denɲɛnin ladon. Sinɔgɔbaliya ni dusukunnako dɔw be se ka kɛ gwɛlɛyaw sababu ye aw cɛ. E n’i furuɲɔgɔn ka ɲi ka yɛlɛmaniw kɛ walisa k’o denɲɛnin ladon ani k’aw ka furu tanga. Bibulu ka ladiliw be se k’aw dɛmɛ cogo di k’o gwɛlɛyaw ɲɛnabɔ?

BIBULU BE MIN FƆ: “Kanuya be mɔgɔ min dusu la, o tigi be muɲuli kɛ, a be koɲuman kɛ.” O tigi fana “t’a yɛrɛ dama nafa ɲini, a dusu te bɔ.” (1 Korɛntikaw 13:4, 5). Komi i kɛra denba ye sisan, i ka denɲɛnin lo kɛra i ɲɛnako fɔlɔ ye. O tɛ kojugu ye, nka i furucɛ be se k’a miiri ko i tɛ mako don ale la tugun. O kama, kana ɲinɛ ko ale fana mako b’a la i k’i janto a la. A dɛmɛ a k’a ye ko i mako be ale la ani ko a niin be deen ladonko la. O kɛ ni muɲuli ni ɲumanya ye.

“Cɛɛw, aw fana k’aw ka musow minɛ ka ɲa ni hakilitigiya ye.” (1 Piyɛri 3:7). I k’a faamu ko i muso bena a barika fanba kɛ ka aw ka denɲɛnin ladon. Komi baara kura lo a fɛ, a niin be se ka degun, a be se ka sɛgɛn kojugu ani a hakili yɛrɛ be se ka ɲagami. Tuma dɔw la, a yɛrɛ be se ka dimi i kɔrɔ. Nka, banba k’i dusu suman sabu “mɔgɔ dususumanin ka fisa ni cɛfari ye.” (Talenw 16:32). N’a mako be dɛmɛ dɔ la, i ka hakili sɔrɔ k’o kɛ a ye.—Talenw 14:29.

I BE SE KA MIN KƐ:

• Faaw: I muso dɛmɛ ka denɲɛnin ladon hali sufɛ. I ka wagati kunmabɔ i ka baara wɛrɛw la walisa ka wagati caaman sɔrɔ ka kɛ n’i muso ni denɲɛnin ye.

• Baaw: N’i cɛɛ ko a b’i dɛmɛ ka denɲɛnin ladon, i ka sɔn. N’a m’o baara kɛ ka ɲɛ, kana a kɔrɔfɔ. Nka, i dusu suman k’o baara kɛcogo ɲɛfɔ a ye.

BIBULU BE MIN FƆ: “U na kɛ farisogo kelen ye.” (Zɛnɛzi 2:24, ABM). Hali ni aw ye deen sɔrɔ, kana ɲinɛ ko e n’i furuɲɔgɔn bele ye “farisogo kelen ye.” Koo bɛɛ lajɛnnin kɛ walisa aw fila ka jɛnɲɔgɔnya kana nagasi.

Muso, i cɛɛ waleɲuman lɔn a ka dɛmɛ kosɔn. N’i b’o yira kumaw fɛ, o be se k’a “dusu suma.” (Talenw 12:18). Cɛɛ, a fɔ i muso ye ko i b’a kanu kosɔbɛ ani ko a koo ka gwɛlɛ i ma. A be denbaya ladonna cogo min na, i k’a tando o kosɔn.—Talenw 31:10, 28.

“Mɔgɔ si kan’a yɛrɛ nafa ɲini, nga mɔgɔ kelen kelen bɛɛ k’a tɔɲɔgɔn ta le ɲini.” (1 Korɛntikaw 10:24). Min ka fisa i furuɲɔgɔn ma, i ka to k’o lo kɛ. E n’i furuɲɔgɔn ka wagati ta ka baro kɛ, ka ɲɔgɔn tando ani ka ɲɔgɔn lamɛn. Cɛnimusoko ta fan fɛ, kana i yɛrɛ nafa dɔrɔn ɲini. I furuɲɔgɔn mako be min na, i janto o la. Bibulu b’a fɔ ko: “Aw kana ban ɲɔgɔn ma, fɔɔ n’aw fila bɛɛ bɛnn’a la.” (1 Korɛntikaw 7:3-5). O kama, aw fila ka sigi ka baro kɛ o koo la ni kɔnɔgwɛ ye. Ni aw be muɲuli kɛ ani n’aw be ɲɔgɔn faamu, aw ka jɛnɲɔgɔnya bena barika sɔrɔ.

I BE SE KA MIN KƐ:

• Kana ɲinɛ ka wagati kunmabɔ e n’i furuɲɔgɔn fila dɔrɔn kama

• Koo fitinin dɔw kɛ minw b’a yira i furuɲɔgɔn na ko i b’a kanu: miiriya fitinin dɔ sɛbɛ ka ci a ma wala kado fitinin dɔ di a ma

BIBULU BE MIN FƆ: “Kabini i denmisɛn tuma, i ye Ala ka kuma lɔn, min be se ka hakilitigiya d’i ma . . . ka kisi.” (2 Timote 3:15). I k’a latigɛ i bena min kɛ walisa k’i ka denɲɛnin kalan. See kabakoman b’a ye ka koow degi hali k’a sɔrɔ a yɛrɛ ma wolo fɔlɔ. K’a to wolonugu la, i ka denɲɛnin be se k’i kaan faranfasi k’a lɔn ani i dusukunnataw be se ka koo kɛ a la. Kalan kɛ a ye a denɲɛnin tuma na. I be min kalanna a ye, hali n’a t’o faamu, o be se ka kɛ sababu ye kalan be diya a ye n’a kɔrɔbayara.

Kana a miiri ko a ka dɔgɔ kojugu ka Ala kuma mɛn i daa la. A to a k’i ka kumaw lamɛn n’i be Jehova delila (Deteronɔmu 11:19). Hali n’i be tulon kɛra n’a ye, i ka Ala ka danfɛnw kofɔ a ye (Zaburuw 78:3, 4). I deen bonyatɔ, a bena a ye ko i be Jehova kanu ani o bena a dɛmɛ ale fana k’a kanu.

I BE SE KA MIN KƐ:

• Jehova deli a ka hakilitigiya di i ma walisa i ka se k’i ka denɲɛnin lamɔ

• Segi kumadenw ni hakilinata jɔnjɔnw kan walisa i deen k’a daminɛ ka faamuyali kɛ joona