Ala ye cɛmɔgɔba Ibrayima bɔnsɔnw labɛn k’u kɛ siya kelen ye ani a ye sariya dɔw di u ma. A y’o siya weele ko “Israɛl” ani a ye a ka Kuma ni tiɲɛn batoli koo kalifa o siya ma (Zaburuw 147:19, 20). O la, siya tɔɔw bɛɛ tun be se ka duga sɔrɔ Israɛl barika la.​—Zɛnɛsi 22:18 kalan.

Ala ye Israɛldenw sugandi k’u kɛ a seerew ye. Olu ka koo y’a yira cogo min na Ala ka sariyaw sira tagamani be mɔgɔ nafa (Deteronɔmu 4:6). O la, siya tɔɔw tun be se ka tiɲɛn Ala lɔn Israɛldenw sababu fɛ.​—Ezayi 43:10, 12 kalan.

Wagati dɔ nana se, Israɛl siya bɔnɛna Ala ka diyanye la. Jehova ye kerecɛn kafo sugandi ka bila o siya nɔɔ na (Matiyo 21:43; 23:37, 38). Sisan, kerecɛn sɔbɛw lo bilara Israɛldenw nɔɔ na ka kɛ Jehova Seerew ye.​—Kɛwaliw 15:14, 17 kalan.

Yezu y’a ka kalandenw labɛn walisa u ka waajuli kɛ ani ka mɔgɔw kɛ ale ka kalandenw ye siyaw bɛɛ la (Matiyo 10:7, 11; 24:14; 28:19, 20). O baara be sera a gwanniman yɔrɔ la sisan duniɲa nin laban loonw na. A siɲɛ fɔlɔ ye nin ye Jehova ye mɔgɔ miliyɔn caaman lajɛn ten ka bɔ siyaw bɛɛ la ani k’u kaan bɛn tiɲɛn batoli sira kan ( Yirali 7:9, 10). Kerecɛn sɔbɛw labɛnnin lo jɛnkulu kelen kɔnɔ walisa ka ɲɔgɔnw jija ani ka ɲɔgɔnw dɛmɛ. U ka lajɛnw na, u bɛɛ be kalan kelen lo sɔrɔ ka bɔ Bibulu kɔnɔ duniɲa kuru bɛɛ la.​—Eburuw 10:24, 25 kalan.

Mɔgɔw tun y’u mabɔ Bibulu ka tiɲɛn kuma minw na kabi wagati jan, Bibulu kalandenw jɛnkuludennin dɔ y’u bɔ kɛnɛ kan saan 1870 la. U y’a faamu ko Yezu ye kerecɛn kafo labɛn waajuli baara kama. O kama, u ye kanpaɲi dɔ daminɛ ka waajuli kɛ duniɲa kuru bɛɛ kɔnɔ. Saan 1931 la, u ye tɔgɔ la u yɛrɛ kan ko Jehova Seerew.​—Kɛwaliw 1:8; 2:1, 4; 5:42 kalan.

Saan kɛmɛkulu fɔlɔ wagati la, koow ɲɛnabɔla jɛnkulu dɔ lo tun be kerecɛn kafow bɛɛ ɲɛminɛna jamana caaman kɔnɔ. O jɛnkulu tun sɔnna a la ko Yezu lo ye kafo Kuntigi ye (Kɛwaliw 16:4, 5). Bi fana, Koow Ɲɛnabɔla Jɛnkulu dɔ lo be Jehova Seerew ɲɛminɛna duniɲa kuru bɛɛ kɔnɔ. O jɛnkuludenw ye diinan mɔgɔkɔrɔ kolɔnbagaw lo ye. Jehova Seerew ka tɔnbolow la, u be gafew bayɛlɛma kaan 600 ni kɔ la, k’u dilan ani k’u jɛnsɛn Bibulu kalan kama. Koow Ɲɛnabɔla Jɛnkulu lo b’o baara ɲɛminɛ. O sen fɛ, Koow Ɲɛnabɔla Jɛnkulu be tɛmɛ Bibulu fɛ ka kafo 100 000 ni kɔ jija ani k’u ɲɛminɛ duniɲa kuru bɛɛ kɔnɔ. Kafo kelen kelen bɛɛ kɔnɔ, cɛɛ minw be sarati dɔw dafa, olu be kɛ diinan mɔgɔkɔrɔw ye, o kɔrɔ, kɔrɔsibagaw. O cɛɛw b’u janto Ala ka sagakulu la ni kanuya ye.​—1 Piyɛri 5:2, 3 kalan.

Jehova Seerew labɛnnin lo walisa ka kibaro diiman waaju ani ka mɔgɔw kɛ Krista ka kalandenw ye. An be Yezu ka cidenw ladegi ka waajuli kɛ soo ni soo (Kɛwaliw 20:20). Tiɲɛn koo ka di mɔgɔ minw ye sɔbɛ la, an b’a ɲini ka bibulukalan kɛ n’olu ye. Nka Jehova Seerew tɛ diinan jɛnkulu dama ye. An ye Faa kanutigi dɔ ka denbayamɔgɔw lo ye. An ye balimaw ye minw b’u janto ɲɔgɔn na (2 Tesalonikaw 1:3). Komi Jehova ka jamakulu ka laɲinita ye k’a koo diya Ala ye ani ka mɔgɔw dɛmɛ, o lo kama an kɛra denbaya hɛɛrɛman ye min ɲɔgɔn tɛ yen dugukolo kan.​—Zaburuw 33:12; Kɛwaliw 20:35 kalan.