ƝININGALI 9
N’ ka ɲi ka la a la ko bɛgɛnw lo yɛlɛma yɛlɛmana ka kɛ mɔgɔw ye wa?
E TUN BENA MUN LO KƐ DO?
Miiri k’a filɛ: Alɛksi hakili ɲagaminin lo. Kabi tumajan, a tun lanin b’a la ko Ala lo ye fɛɛn bɛɛ dan. Nka bi, a ka kalanfa lɔra kelen kan ko lɔnnikɛlaw ka sɛgɛsɛgɛriw y’a yira ka gwɛ ko bɛgɛnw lo yɛlɛma yɛlɛmana ka kɛ mɔgɔw ye. Alɛksi t’a fɛ u k’a miiri ko ale ye naloman ye. A y’a miiri ko: “Ni lɔnnikɛlaw y’a yira ka gwɛ k’o kalan ye tiɲɛn ye, ne ye jɔn ye k’u ka kuma sɔsɔ?”
Ni ele lo tun ye Alɛksi ye, i tun bena sɔn o kalan ma sabu a sɛbɛra gafew kɔnɔ wa?
MIIRI FƆLƆ!
Mɔgɔw ka miiriya mana kɛ min o min ye, u tɛ sigasiga k’a fɔ u lanin be koo min na hali k’a sɔrɔ u yɛrɛ t’a lɔn kuun min kama u lanin b’o la.
-
Dɔw lanin b’a la ko Ala lo ye fɛɛnw dan sabu u ka diinan ɲɛmɔgɔw y’o lo fɔ u ye.
-
Dɔw lanin b’a la ko bɛgɛnw lo yɛlɛma yɛlɛmana ka kɛ mɔgɔw ye sabu o lo fɔra u ye lakɔliso la.
ƝININGALI WƆƆRƆ NUNU LAJƐ
Bibulu b’a fɔ ko: “Boon bɛɛ n’a lɔbaga lo, nga fɛɛn bɛɛ lajɛnnin danbaga ye Ala le ye.” (Eburuw 3:4). Yala mɔgɔ ka ɲi ka la o la wa?
N’an ko Danbaga tɛ yen a be komi an b’a fɔra le ko boon nin lɔra a yɛrɛ ma
DƆW B’A FƆ KO: Fɛɛn belebeleba dɔ lo cira ka mankanba kɛ ani o lo y’a to duniɲa kɛra.
1. O fɛɛn bɔra min ani mun lo y’a kɛ a cira?
2. Miiriya juman lo bɛnnin lo: Yala fɛɛn bɛɛ kɛra u kunfɛ wa? Wala dɔ lo ye fɛɛn bɛɛ dan?
DƆW B’A FƆ KO: Bɛgɛnw lo yɛlɛma yɛlɛmana ka kɛ mɔgɔw ye.
3. Ni bɛgɛnw, i n’a fɔ sulaw lo yɛlɛmana ka kɛ mɔgɔw ye, mun na an hakili ka bon ni sulaw ta ye fɔɔ ka taga ka na?
4. Mun na ninmanfɛn fitininw cogoya be mɔgɔ dabali ban?
DƆW B’A FƆ KO: Koow b’a yira tiɲɛn na ko bɛgɛnw lo yɛlɛma yɛlɛmana ka kɛ mɔgɔw ye.
5. Mɔgɔ min b’o fɔ, yala o tigi yɛrɛ ye sɛgɛsɛgɛri kɛ ka se k’o koo tiɲɛntigiya yira wa?
6. Komi a fɔra ko mɔgɔ hakilitigiw lanin b’a la ko bɛgɛnw lo yɛlɛmana ka kɛ mɔgɔw ye, yala o lo m’a to mɔgɔ caaman lanin b’o koo la wa?
Julia ko: “N’i be tagamana kongoba dɔ kɔnɔ, ani i ye boon dɔ ye, yala i bena a fɔ ko: ‘Boon nin cɛ ka ɲi dɛ! Yiriw lo benna u yɛrɛ ma cogo bɛnnin na ka kɛ o boon ye.’ N’ ma la a la n’i bena o fɔ dɛ! O kɔni tɛ se ka kɛ. N’o lo, yala a daganin lo an k’a miiri ko fɛɛn bɛɛ kɛra u yɛrɛ ma duniɲa kɔnɔ wa?”
Gwen ko: “Miiri k’a filɛ, dɔ b’a fɔ i ye ko fɛɛn dɔ cira ɛnperimɛri boon kɔnɔ ani lankiri serila kogow ni palafɔnw kan ani u yɛlɛmana ka kɛ daɲɛgafe dɔ ye. I bena la o la wa?”
MUN NA I KA ƝI KA LA ALA LA?
Bibulu b’i jija ko i “ka koo bɛɛ sɛgɛsɛgɛ.” (1 Tesalonikaw 5:21). O kɔrɔ ko i man ɲi ka la Ala la koo nunu dɔrɔn kosɔn:
-
I DUSUKUNNAKOW (A be ne kɔnɔ ko sebagaya kabakoman dɔ be yen)
-
MƆGƆ WƐRƐW (N’ sigiɲɔgɔnw lanin be Ala la)
-
I LAMƆCOGO (N’ seko tɛ, n’ bangebagaw ye n’ lamɔ walisa n’ ka la Ala la)
I ka lanaya ka ɲi ka basigi dalilu barikamanw lo kan.
Teresa ko: “Adamaden farikolo be baara kɛ cogo min na, ni n’ ka kalanfa b’o ɲɛfɔra, n’ b’a fɔ n’ yɛrɛ ye ko, siga t’a la Ala be yen. An farikolo yɔrɔ kelen kelen bɛɛ be baara tigitigi dɔ kɛ ani o ka teli ka kɛ an ɲina ma. Adamaden farikolo be mɔgɔ kabakoya tiɲɛn na!”
Richard ko: “Ni n’ be sangasojan, kurunba wala mobili dɔ filɛra, n’ be n’ yɛrɛ ɲininga ko: ‘Jɔn lo y’a dilan?’ Mɔgɔ hakilitigi lo ye mobili dilan sabu a yɔrɔ fitinin fitinin bɛɛ ka kan ka baara kɛ ka ɲɛ walisa mobili ka se ka boli. Ni dɔ lo ye mobili dilan, o kɔrɔ ko adamaden fana danna le.”
Anthony ko: “N’ tun mana lɔnnikɛlaw ka kalanw sɛgɛsɛgɛ, n’ tun b’a faamu ko bɛgɛnw lo ma yɛlɛma yɛlɛma ka kɛ mɔgɔw ye.” A y’a fɔ fana ko a tun ka nɔgɔ ale fɛ ka la a la ko Danbaga be yen, sanni ka la a la ko bɛgɛnw lo be yɛlɛma yɛlɛma ka kɛ mɔgɔw ye.
MIIRI K’A FILƐ
Kabi saan caaman, lɔnnikɛlaw ye sɛgɛsɛgɛri kɛ. Nka, u ma se ka bɛn a la k’a ɲɛfɔ cogo min na bɛgɛnw yɛlɛma yɛlɛmana ka kɛ mɔgɔw ye. Ni lɔnnikɛla ŋanaw yɛrɛ ma bɛn kelen ma, yala a daganin tɛ i k’i yɛrɛ ɲininga n’o kalan ye tiɲɛn ye wa?
