POL ka wagati la, kurunw tun tɛ yen ten minw be mɔgɔw dɔrɔn ta. Minw be doni ta, olu lo tun be yen. O la, ni dɔ tun b’a fɛ ka kurun ta ka taga dugu la, a tun ka ɲi ka ɲiningali kɛ k’a filɛ ni donita kurun dɔ be tagara o dugu la ani n’a bolibaga bena sɔn ka mɔgɔ ta (Kɛw. 21:2, 3). A be tagara dugu min na, hali n’o kurun tɛ tagara yen tigitigi, a be se k’a ta ka jigi kurun lɔyɔrɔ dɔ la. O kɔ, a be kurun wɛrɛ ta min be tagara ale tagayɔrɔ gɛrɛfɛ.—Kɛw. 27:1-6.

Saan kɔnɔ, kurunbolilaw tun be kurun boli wagati dɔw lo la ani u tun tɛ ni porogramu tigitigi ye. Ni saan ɲɛɛ tun man ɲi, u tun b’u ka voyazi bila loon wɛrɛ kan. U tun b’o kɛ fana ngalon lannako dɔw kosɔn. Ɲɛyirali fɛ, ni kaankaan tun sigira kurun lɔgɔjan kan ka to ka kasi wala ni kurunbolilaw tun ye kurun tiɲɛni dɔ ye kɔgɔji daa la, u tun tɛ taga voyazi la o loon na. U tun be fɔɲɔ cogoya filɛ fana. Ni fɔɲɔ tun be fiyɛra u tagayɔrɔ fan fɛ, u tun be kurun boli daminɛ. Ni dɔ tun ye kurun sɔrɔ min bena a ta, a tun be taga lɔ kurunw lɔyɔrɔ gɛrɛfɛ n’a ka minanw ye. A tun be lɔ yen fɔɔ tuma min na u b’a fɔ ko kurun bena taga.

Tarikow sɛgɛsɛgɛbaga dɔ tɔgɔ ko Lionel Casson. A ko: “Ɔrɔmu dugu la, labɛn dɔw tun kɛra minw b’a to a tun ka nɔgɔ ka kurun sɔrɔ. O la, mɔgɔw mako tun t’a la ka kurun ɲini u yɛrɛ ma.” A y’a fɔ tugun ko: “O dugu ka kurunw lɔyɔrɔ tun be Tibr baji daan na, Osti dugu gɛrɛfɛ. Ɔsti dugu la, yɔrɔ belebeleba dɔ tun be yen ani birow tun lɔra k’a lamini. Kurunbolila minw tun be bɔ Narbɔn (o be Faransi bi), olu tun be n’u ka biro ye. Minw tun be bɔ Kartaz (o be Tinizi bi), olu fana tun be ni dɔ ye. Jamana wɛrɛw ka kurunbolilaw fana tun be n’u ka birow ye. O la, mɔgɔ o mɔgɔ tun b’a fɛ ka taga voyazi la, dugu minw b’a ka sira kan, a tun be se ka don olu ka birow la ka ɲiningali kɛ.”

Mɔgɔ minw tun be kurun ta ka taga voyazi la, olu tun be se joona nka, farati tun b’o voyazi la. Ɲɛyirali fɛ, Pol ye voyazi minw kɛ a ka misɔndenya baara la, kurun tiɲɛna n’a ye kɔgɔji kan siɲɛ caaman.—2 Kor. 11:25.