Ni kerecɛnw b’a latigɛra u bena u yɛrɛ latanga ani k’u yɛrɛ lafasa cogo min na, u ka ɲi ka Bibulu ka sariyakolow sira tagama. O sariyakolow b’a yira ko a bɛnnin tɛ kerecɛn ka kɛ ni marifa, i n’a fɔ pistole, lasasi wala a ɲɔgɔnnaw ye walisa k’a yɛrɛ latanga mɔgɔ wɛrɛw ma. An ka miiri koo nunu na:

Jehova be adamaden niin jati fɛɛn senuman ye. Zaburu sɛbɛbaga Dawuda tun b’a lɔn ko “mɔgɔ be nii na [ Jehova] le sababu la.” (Zab. 36:10). Kerecɛn be se k’a latigɛ ka labɛn ɲuman dɔw kɛ walisa k’a yɛrɛ wala a ka bololafɛnw latanga. Nka, a k’a seko bɛɛ kɛ walisa a kana mɔgɔ niin bɔ ani ka kɛ mɔgɔfagala ye.—Deter. 22:8; Zab. 51:16.

An mana tɛmɛ fɛɛn o fɛɛn fɛ k’an yɛrɛ latanga, o be se k’a to an be mɔgɔ faga. Nka, a ka nɔgɔ ka mɔgɔ faga ni marifa b’an fɛ. An be se ka tugu k’o kɛ wala an be se k’o kɛ k’a sɔrɔ an yɛrɛ m’a lawuli a kama. * Ka fara o kan, mɔgɔ min nana an kama a be se ka kɛ ko a hakili siginin tɛ. N’a y’a ye ko marifa b’an fɛ, o ka teli ka koo tɔɔ juguya ani ka laban ni fagari ye.

Yezu ka suu laban na dugukolo kan, a y’a fɔ a ka kalandenw ye k’u ka murujan dɔ ta u yɛrɛ kun. Nka, a tun t’a miirila k’u ka ɲi k’u yɛrɛ latanga n’a ye (Luka 22:36, 38). Yezu tun b’a fɛ a ka kalandenw ka koo dɔ lo faamu: u man kan ka murujan ta kɛlɛ kama, hali ni jamaba nana u kama ni murujanw ye (Luka 22:52). Tuma min na Piyɛri ye murujan bɔ ka sarakalasebagaw kuntigiba ka baaraden tulo tigɛ, Yezu y’a fɔ a ye ko: “I ka murujan don a nɔɔ na.” O kɔ, Yezu ye sariyakolo dɔ fɔ min b’a ka kalandenw ɲɛminɛna kabi o wagati. A ko: “Mɔgɔ minw be kɛlɛ kɛ ni murujan ye, murujan le bena u faga fana.”—Mat. 26:51, 52.

Ka kɛɲɛ ni Mise 4:3 ye, Ala sagokɛlaw b’u ‘ka murujanjanw bugɔ k’u kɛ dabaw ye, u b’u ka tamanw kɛ wɔrɔsɔw ye.’ O b’a yira ko kerecɛn sɔbɛw ye hɛɛrɛkɛlaw ye. Ala tɛmɛna ciden Pol fɛ ka ladili min di, u b’o sira tagama: “Aw kana kojugu juru sara . . . Aw k’aw seko bɛɛ kɛ ka to hɛrɛ la ni mɔgɔ bɛɛ ye, n’o be se ka kɛ.” (Ɔrɔm. 12:17, 18). Pol ye gwɛlɛya caaman sɔrɔ. Ɲɛyirali fɛ, “benkannikɛlaw” y’a tɔɔrɔ. O bɛɛ n’a ta, a ye min fɔ, a tun b’o sira tagama. A m’a ɲini ka Ala ka sariyaw tiɲɛ walisa k’a yɛrɛ latanga (2 Kor. 11:26). Nka, a y’a jigi la Ala kan ani a tun b’a lɔn ko hakilitigiya min be sɔrɔ Ala ka Kuma kɔnɔ, o “ka fisa ni kɛlɛkɛminanw ye.”—Waaj. 9:18.

Kerecɛnw b’a jati ko niin nafa ka bon ka tɛmɛ bololafɛnw kan. Bibulu b’a fɔ ko: “Mɔgɔ ka nafolo caya o caya, a ka ɲɛnamaya tɛ bɔ o la.” (Luka 12:15, ABM ). Ni soon nana i kama ni marifa ye, kuma a fɛ ni dususuman ye. N’a ma sɔn o ma, i ka Yezu ka ladili nin sira tagama: “Ni dɔ y’i ka foroca bɔsi i la, i kan’a bali k’i ka deleke fana ta.” O kɔrɔ ko, a tigi be fɛɛn o fɛɛn fɛ, a to a k’u ta (Luka 6:29; Mat. 5:39, 40). * Min ka fisa, o ye k’i jija walisa soon kana ɲɛbɔ i fɛ. Kana wasoya kɛ. A to i sigiɲɔgɔnw k’a lɔn ko i ye Jehova Seere ye ani ko hɛɛrɛ ka d’i ye. O la, n’a sɔrɔ o bena a to mɔgɔjuguw tɛna ɲɛbɔ i fɛ.—1 Zan 2:16; Talenw 18:10.

Kerecɛnw b’u janto mɔgɔ wɛrɛw dusukunnakow la (Ɔrɔm. 14:21). Ni balimaw y’a lɔn ko kafoden dɔ b’a yɛrɛ latanga mɔgɔ wɛrɛw ma ni marifa ye, o be se k’u dɔw kɔnɔ gwan wala k’u kunnatiɲɛ yɛrɛ. Kanuya b’an lasun ka tɔɔw nafa ɲini fɔlɔ hali n’an ka ɲi ka ban koo dɔw la k’a sɔrɔ a daganin lo k’o kɛ.—1 Kor. 10:32, 33; 13:4, 5.

Kerecɛnw b’u jija ka kɛ ɲɛyirali ɲumanw ye (2 Kor. 4:2; 1 Piyɛri 5:2, 3). Ni kerecɛn dɔ be marifa mara a yɛrɛ fɛ walisa k’a yɛrɛ latanga mɔgɔ wɛrɛ ma, diinan mɔgɔkɔrɔw be se ka tɛmɛ Bibulu fɛ k’a ladi. N’a ma sɔn o ladiliw ma, a tɛ se ka jati ɲɛyirali ɲuman ye. Ka fara o kan, a tɛ saratiw dafa walisa ka kunkanbaaraw wala nɛɛma baaraw sɔrɔ kafo kɔnɔ. O kelen lo fana ni kerecɛn dɔ be yaala ni marifa ye a ka baara kosɔn. N’a ye baara wɛrɛ ɲini o ka fisa! *

Kerecɛn yɛrɛ lo ka ɲi k’a latigɛ a bena a yɛrɛ, a ka denbaya wala a ka bololafɛnw latanga cogo min na. Ale lo b’a latigɛ fana a bena baara min kɛ. Nka, a ka ɲi k’o koow latigɛ ka kɛɲɛ ni Bibulu ka sariyakolow ye. O sariyakolow be Ala ka hakilitigiya n’a ka kanuya yira. Ka kɛɲɛ n’o sariyakolow ye, kerecɛn minw be jɛnɲɔgɔnya ɲuman kɛ ni Ala ye, olu t’a ɲini k’u yɛrɛ latanga mɔgɔ wɛrɛ ma ni marifa ye. U b’a lɔn ko n’u b’u jigi la Ala kan ani ka koow kɛ ka kɛɲɛ ni Bibulu ka sariyakolow ye, u bena latangali sɔbɛ sɔrɔ fɔɔ abada!—Zab. 97:10; Talenw 1:33; 2:6, 7.