SAAN kɛmɛkulu fɔlɔ la, kerecɛnw ye jijaliba kɛ walisa ka Ala ka Masaya “kibaru diman” fɔ mɔgɔ caamanba ye (Mat. 24:14). Dɔw yɛrɛ tagara jamana wɛrɛw la. Ɲɛyirali fɛ, ciden Pol ye tagama minw kɛ a ka misɔndenya baara sen fɛ, a ye waajuli kɛ kosɔbɛ mara dɔw la, Turki be sɔrɔ yɔrɔ min na bi. * Saan 2 000 o kɔ, saan 2014 la, kanpaɲiba dɔ kɛra tugun Turki. Mun na balimaw y’o kanpaɲi labɛn? Jɔn lo y’a seen don o kanpaɲi la?

Weleweledala 2 800 ni kɔ lo be Turki. Nka, mɔgɔ miliyɔn 79 lo b’o jamana na. O kɔrɔ ko, weleweledala kelen ka ɲi ka mɔgɔ 28 000 ɲɔgɔn lo waaju. A tɛ bari an na, k’a ye ko weleweledalaw sera ka kibaro diiman fɔ mɔgɔ damanin dɔrɔn lo ye. O kanpaɲi kuun tun ye ka kibaro diiman lase mɔgɔ caamanba ma wagati kunkurunin kɔnɔ. Weleweledala minw be Turkikan fɔ, u mɔgɔ 550 ɲɔgɔn bɔra jamana wɛrɛw la ka na Turki. U ye waajuli kɛ n’o yɔrɔ balimaw ye o kanpaɲi wagati la. U sera ka mun lo kɛ do?

Seereyaba kɛra. Istanbul dugu la, kafo dɔ y’a sɛbɛ ko: “Mɔgɔw tun mana an ye, u tun b’an ɲininga ko: ‘An be Jehova Seerew yera yɔrɔ bɛɛ! Lajɛn kɛrɛnkɛrɛnnin dɔ lo b’aw fɛ wa?’ ” Izmir dugu la, kafo dɔ y’a sɛbɛ fana ko: “Taksi bolila dɔ gwɛrɛla diinan mɔgɔkɔrɔ dɔ la ani k’a ɲininga ko: ‘Mun lo be yen? Aw ye dɔ fara aw ka baara kan le wa?’ ” Tiɲɛn na, mɔgɔw bɔra a kala ma ko Jehova Seerew tun be kanpaɲiba dɔ kɛra.

Balima minw bɔra jamana wɛrɛw la ka na, o waajuli baara y’olu ninsɔndiya kosɔbɛ. Steffen bɔra Danemarki, ale ko: “Loon o loon, n’ ye kibaro diiman fɔ mɔgɔw ye minw tun ma deli ka Jehova koo mɛn. N’ y’a ye ko n’ tun be mɔgɔw dɛmɛna tiɲɛn na ka Jehova tɔgɔ lɔn.” Jean-David be bɔ Faransi, ale y’a sɛbɛ ko: “Sira kelen dɔrɔn kan, an ye waajuli kɛ lɛri caaman kɔnɔ. O tun ye ninsɔndiyaba yɛrɛ lo ye! Mɔgɔ caaman tun tɛ Jehova Seerew lɔn. Luuw fanba kɔnɔ, an sera ka baro kɛ, ka videwow yira ani ka gafew di mɔgɔw ma.”

Mɔgɔ 550 minw bɔra jamana wɛrɛw la ka na, olu sera ka gafe 60 000 ɲɔgɔn di mɔgɔw ma lɔgɔkun fila dɔrɔn kɔnɔ. Seereyaba kɛra o kanpaɲi sen fɛ.

Dɔ farala u ka kisɛya kan waajuli baara la. Balima minw be Turki, o kanpaɲi y’olu jija waajuli baara la. O y’a to u caaman y’a latigɛ ka kudayi cidenya baara daminɛ. Saan kelen o kanpaɲi kɔ, mɔgɔ 82 farala kudayi piyɔniyew hakɛ kan.

Balima minw bɔra jamana wɛrɛw la ka na, olu y’a fɔ k’o kanpaɲi y’u dɛmɛ u ka waajuli baara la hali u kɔseginin kɔ u ka jamanaw na. O kanpaɲi y’u dɛmɛ cogo di? Balimamuso Şirin be bɔ Alemaɲi, ale y’a sɛbɛ ko: “Balima minw be Turki, a ka nɔgɔ olu fɛ kosɔbɛ ka tɛmɛ sababu dɔw fɛ ka waajuli kɛ. Ne tun be siran ka waajuli kɛ o cogo la. Nka o balimaw, o kanpaɲiba ani delili caaman ye n’ dɛmɛ n’ sera ka waajuli kɛ sababu dɔw sen fɛ. N’ sera ka waajuli kɛ tɛrɛn kɔnɔ ani ka sɛbɛninw di mɔgɔw ma! Sisan, n’ tɛ siran i k’o fɔlɔ la.”

Johannes fana be bɔ Alemaɲi, ale ko: “Ne ye koo dɔw faamu minw ye ne dɛmɛ n’ ka waajuli baara la. Balima minw be Turki, olu b’a fɛ sɔbɛ la ka kibaro diiman fɔ mɔgɔ caamanba ye. O kama, u be tɛmɛ sababu bɛɛ sen fɛ ka seereya kɛ. N’ kɔsegira Alemaɲi tuma min na, n’ y’a latigɛ k’o ɲɔgɔn kɛ. Sisan, ne be mɔgɔ caaman waaju ka tɛmɛ fɔlɔ kan.”

Zeynep be bɔ Faransi ani a ko: “O kanpaɲi ye ne dɛmɛ kosɔbɛ n’ ka waajuli baara la. A ye dɔ fara n’ ka jagwɛlɛya kan ani ka n’ dɛmɛ ka n’ jigi la Jehova kan kosɔbɛ.

A ye weleweledalaw ka balimaya sabati. Hali k’a sɔrɔ balimaw tun bɔra jamana caaman na, kanuya ni bɛɛn min tun be u ni ɲɔgɔn cɛ, u tɛ ɲinɛ o kɔ. Jean-David min kofɔra ka tɛmɛ, ale ko: “Balimaw y’an ladon ka ɲɛ. U y’an jati u teriw ani u somɔgɔw ye. U ye an ladon u ka soo. N’ tun y’a kalan an ka gafew kɔnɔ siɲɛ caaman ko an ye balimaw ye duniɲa kuru bɛɛ kɔnɔ. Nka sisan, ne yɛrɛ ɲɛɛ lara o kan. Ne dusu ka di kosɔbɛ sabu n’ ye Jehova sagokɛla dɔ ye ani n’ b’a waleɲuman lɔn kosɔbɛ o nɛɛmaba kosɔn.”

Claire be bɔ Faransi. A ko: “Minw bɔra Danemarki, Faransi, Alemaɲi wala Turki, an bɛɛ tun ye denbaya kelen mɔgɔw ye. Daan minw be jamanaw ni ɲɔgɔn cɛ, a tun be komi Ala y’o jɔsi ka bɔ yen.”

Stéphanie fana be bɔ Faransi, ale ko: “O kanpaɲiba y’a yira an na ko an be ni kanuya min ye Jehova koo la, o lo b’a to an kaan bɛnnin lo. An ka siya n’an bɔyɔrɔ tɛ.”

Balima minw tun bɔra jamana wɛrɛw la, olu caaman y’a daminɛ ka miiri k’a filɛ n’u be se ka taga sigi Turki walisa ka dɛmɛ don waajuli baara la. Baara kɛta caaman bele be o jamana na. Mɔgɔ damanin yɛrɛ yɛlɛmana o jamana na ka ban. O dɛmɛbagaw koo ka di balimaw ye kosɔbɛ.

Weleweledala 25 be jɛnkulu dennin dɔ kɔnɔ ani u yɔrɔ man surun kafo dɔ la. Saan caaman kɔnɔ, diinan mɔgɔkɔrɔ kelen dɔrɔn lo tun be yen. Saan 2015 la, balima 6 bɔra Alemaɲi ani Peyi-Ba ka na u dɛmɛ. Miiri k’a filɛ o jɛnkuludenw ninsɔndiyara cogo min na!

Balima minw be dɛmɛ donna waajuli baara la Turki kabi wagati damanin, olu ye mun lo fɔ u ka ɲɛnamaya koo la yen? Tiɲɛn lo ko a man nɔgɔ tuma bɛɛ. Nka, ninsɔndiyaba b’a la ka taga dɛmɛ don jamana wɛrɛ la. An k’a filɛ dɔw ye min fɔ:

Federico furunin lo ani a be bɔ Ɛsipaɲi. A be ni saan 40 ni kɔ ye. Ale ko: “Bololafɛn caaman tun tɛ n’ fɛ, n’ tun be se ka n’ masiri minw na. O kama, n’ niin tun degunnin tɛ ani o ye n’ dɛmɛ ka n’ ɲɛɛ jɔlen to koo kɔrɔtaninw kan.” Yala o balimacɛ be mɔgɔw jija u ka taga dɛmɛ don jamana wɛrɛw la wa? A ko: “Ɔnhɔn, n’ be mɔgɔw jija o la! N’i tagara jamana wɛrɛ la walisa ka mɔgɔw dɛmɛ ka Jehova lɔn, i b’i yɛrɛ kalifara a ma le. I b’a ye ko Jehova b’a janto i la ka tɛmɛ sanga ni wagati bɛɛ kan.”

Rudy be ni saan 60 ɲɔgɔn ye ani a furunin lo. Ale be bɔ Peyi-Ba ani a ko: “Jamana dɔw la weleweledalaw man ca. Ka fara o kan, mɔgɔ caaman ma deli ka kibaro diiman mɛn yen. Ka taga dɛmɛ don yen ani k’o mɔgɔw dɛmɛ ka Jehova lɔn, o be mɔgɔ ninsɔndiya kosɔbɛ! Mɔgɔw be ɲagali cogo min na n’u ye tiɲɛn lɔn Jehova koo la, o be ne ninsɔndiya yɛrɛ le!”

Sascha be ni saan 40 ni kɔ ye, a be bɔ Alemaɲi ani a furunin lo. A ko: “Tuma o tuma ni ne be waajuli la, n’ be mɔgɔw kunbɛn minw siɲɛ fɔlɔ lo ka kibaro diiman mɛn. Ka se k’o tigiw dɛmɛ ka Jehova lɔn, o be ne ninsɔndiya yɛrɛ le!”

Atsuko be ni saan 35 ɲɔgɔn ye, a be bɔ Zapɔn ani a furunin lo. A ko: “Fɔlɔ la, n’ tun b’a fɛ Arimagedɔn ka se joona joona. Nka, kabi n’ tagara sigi Turki, n’ be Jehova fo sabu a bele be muɲuli kɛra. Ni ne y’a ye Jehova be waajuli baara ɲɛminɛna cogo min na duniɲa kuru bɛɛ kɔnɔ, n’ b’a fɛ ka to ka n’ magwɛrɛ a la kosɔbɛ.”

Alisa be ni saan 30 ɲɔgɔn ye, a be bɔ Irisi jamana na. A ko: “Ka baara kɛ Jehova ye o cogo la, o ye ne dɛmɛ k’a lɔn ko Jehova ka ɲi.” (Zab. 34:9). A y’a fara a kan ko: “Jehova tɛ ne Faa ye dɔrɔn, nka n’ teri sɔbɛ lo fana. Koo caaman ye n’ dɛmɛ ka Jehova lɔn kosɔbɛ. Koo ɲumanw ye n’ sɔrɔ n’ ka ɲɛnamaya kɔnɔ. N’ ye ninsɔndiya wagatiw ani duga caaman sɔrɔ fana!”

Kanpaɲiba min kɛra Turki, mɔgɔ caaman ye kibaro diiman mɛn o sababu fɛ. Nka, yɔrɔ caaman bele be yen kibaro diiman ma fɔ yɔrɔ minw na. Balima minw tagara dɛmɛ don Turki, loon o loon, u be mɔgɔ caaman kunbɛn minw ma deli ka Jehova koo mɛn. Yala a bena diya i ye ka taga waajuli kɛ o yɔrɔ ɲɔgɔn na wa? N’o lo, an b’i jija i k’i “ɲɛw kɔrɔta ka forow filɛ. Suman kɔgɔra, a tigɛ tuma sera.” (Zan 4:35). Duniɲa yɔrɔ minw na “suman kɔgɔra,” yala i tɛ se ka taga dɛmɛ don yen wa? N’i be se, a daminɛ ka labɛnw kɛ sisan walisa k’i ka laɲinita dafa. La a la ko n’i be kibaro diiman jɛnsɛn “fɔɔ ka taga se diɲɛ faan bɛɛ la,” i bena dugaba sɔrɔ o la ka tɛmɛ sanga ni wagati bɛɛ kan!—Kɛw. 1:8