JOHN facɛ batizera ka kɛ Jehova Seere ye saan 1960 fan fɛ Gujarati dugu la, Ɛndi jamana na. Nka, John, a kɔrɔmuso n’a dɔgɔnin mɔgɔ naani ani u bamuso tun kisɛyanin lo kojugu Katoliki diinan na. O kama, u tun b’u facɛ kɛlɛ a ka lanaya kosɔn.

Loon dɔ, John facɛ ko a ka taga lɛtɛrɛ dɔ di ale tericɛ dɔ ma, o min ye Jehova Seere ye. O loon sɔgɔma, John tun y’a bolokunnanden mandimi barikon nɛgɛlaman dɔ dayɛlɛtɔ. Nka, komi a tun b’a fɛ ka mɛnni kɛ a facɛ fɛ, a ye fɛɛn dɔ meleke a bolokunnanden na walisa joli ka lɔ ani a tagamana ka taga a facɛ ka cira kɛ.

John sera lɛtɛrɛ diyɔrɔ tuma min na, a facɛ tericɛ muso lo y’o lɛtɛrɛ minɛ. Ale fana tun ye Jehova Seere dɔ ye. A y’a kɔrɔsi ko John bolokunnanden mandiminin lo. A ko a k’a to ale b’a joli furakɛ. A bɔra ni furakɛli minanw ye, k’o joli ko ni fura dɔ ye ani ka bandi meleke a la. O kɔ, a ye tee dɔ gwan k’a di John ma. O wagati bɛɛ la, a tora ka kuma John fɛ teriya la Bibulu koo la.

O balimamuso ka ɲumanya kosɔn, John y’a daminɛ k’a ka miiriyaw yɛlɛmana Jehova Seerew koo la. O kama, a y’a ɲininga a facɛ ka lannako fila dɔw la, o minw be dan na n’ale taw ye: Yala Yezu ye Ala ye wa? Yala kerecɛnw ka ɲi ka Mariyamu deli wa? Balimamuso tun ye gujaratikan degi. A basigira Bibulu kan ka John jaabi o kaan na. O kɔ, a ye sɛbɛ nin di a ma: “Cette bonne nouvelle du royaume.”

Kɔfɛ, o gafe kalantɔ, John y’a faamu k’o kumaw ye tiɲɛn ye. A tagara mɔnpɛricɛ fɛ ani k’a ɲininga o koo fila la. Mɔnpɛricɛ dimina kosɔbɛ ani a ye Bibulu fili John kan n’a be sɔngɔra ko: “E kɛra Sutana lo ye! A yira n’ na Bibulu kɔnɔ yɔrɔ min na a fɔra ko Yezu tɛ Ala ye. Yɔrɔ juman lo fana a fɔra ko an man ɲi ka Mariyamu bato? O yira n’ na!” O koo ye John dabila ban. O kama, a y’a fɔ mɔnpɛricɛ ye ko: “Ne tɛna n’ seen don Katolikiw ka legilizi kɔnɔ tugun.” A fana m’a seen don yen fewu!

John ye bibulukalan daminɛ ni Jehova Seerew ye. A sɔnna tiɲɛn batoli ma ani a y’a daminɛ ka Jehova bato. Kɔfɛ, a somɔgɔ caaman fana y’o lo kɛ. A saan 60 ɲɔgɔn ye ni ye John tun y’a bolokunnanden mandimi ani o jolinɔ bele be yen. Nka, kerecɛn dɔ ye ɲumanya wale min kɛ a ye, a tɛ ɲinɛ o kɔ abada. O lo y’a lasun ka Jehova bato a sii tɔɔ bɛɛ la.—2 Kor. 6:4, 6.