BIBULU sɛbɛwagati la, ni cɛɛ ni muso somɔgɔw tun bɛnna furu koo la, furunafolo tun be di muso somɔgɔw ma. O furunafolo tun be se ka kɛ fɛɛn sɔngɔ gwɛlɛw ye, bɛgɛnw wala wari ye. Mɔgɔ tun be furunafolo sara fana a kɛtɔ ka taga baara kɛ a buranw ye. Misali la, Yakuba ye baara kɛ saan wolonfila a burancɛ ye walisa ka Arasɛli sɔrɔ furu la (Zɛnɛzi 29:17, 18, 20). O landa kuun tun ye mun lo ye?

Bibulu sɛgɛsɛgɛla Carol Meyers ko: “Ni bangebagaw tun ye u denmuso di furu la, u tun be bɔnɛ u ka baarakɛla dɔ la min tun ye u dɛmɛba ye [foro baara la]. O la, furunafolo tun be di u ma walisa u ka se k’u bolo dɛmɛ n’o ye.” Jɛnɲɔgɔnya min be cɛɛ ni muso somɔgɔw cɛ, furunafolo tun be se ka kɛ sababu ye fana o be sabati. O jɛnɲɔgɔnya tun be se k’a to o somɔgɔ fila be ɲɔgɔn dɛmɛ gwɛlɛyaw wagati la. Ni furunafolo tun sarala, o tun b’a yira ko sunguru bolo dira furu la ani ko a furunin kɔ, a cɛɛ lo bena a janto a la ani k’a latanga sisan.

Ka furunafolo sara, o kɔrɔ tɛ ko muso ye feerefɛn ye. Gafe dɔ b’a fɔ ko: “Waajibi tun lo Israɛldenw fɛ ka warida dɔ wala a ɲɔgɔnna di muso somɔgɔw ma. O tun b’a to Israɛldenw ka furu tun be kɛ komi sanni feere lo. Nka, [furunafolo] kuun tun t’o ye. A kuun tun ye ko muso somɔgɔw k’u bolo dɛmɛ.”—Les institutions de l’Ancien Testament.

Bi jamana dɔw la, mɔgɔw bele be to ka furunafolo sara. Bangebaga minw ye kerecɛnw ye, u ka ɲi k’u janto “ka kɛ mɔgɔsabalininw ye tuma bɛɛ.” U man ɲi ka furunafolo sɔngɔ gwɛlɛya (Filip. 4:5; 1 Kor. 10:32, 33). O cogo la, u b’a yira ko u tɛ wari kanu wala u tɛ natabaw ye (2 Tim. 3:2). Ka fara o kan, ni furunafolo sɔngɔ man ca, o bena a to furucɛ tɛna a ka furu wagati janya sabu a ka ɲi ka wari caaman ɲini walisa ka furunafolo sara. Wala o tɛna furucɛ waajibiya k’a ka piyɔniye baara dabila walisa ka baloɲini baara kɛ wagati bɛɛ furunafoloba sarali kama.

Jamana dɔw la, faamanw ye sariya sigi furunafolo koo la. O yɔrɔw la, bangebaga minw ye kerecɛnw ye, u ka ɲi k’o sariyaw labato. Mun na do? Sabu Ala ka Kuma b’a ɲini kerecɛnw fɛ u k’u “yɛrɛ majigi faamaw kɔrɔ” ani k’u ka sariyaw labato n’o sariyaw tɛ Ala taw kɛlɛ.—Ɔrɔm. 13:1; Kɛw. 5:29.