I be se ka min kɛ walisa i ka Bibulu kalan k’i nafa ani k’i ninsɔn diya

A LAMƐN KAAN NIN NA

ZOZUWE tun ka ɲi ka Israɛldenw ɲɛminɛ ka don n’u ye layidu jamana kɔnɔ. O tun man nɔgɔ. Nka, Jehova y’a hakili sigi ani k’a jija ko: “I ka barika don i yɛrɛ la k’i jaa gwɛlɛya kosɔbɛ.” A y’a fɔ Zozuwe ye ko a ka ɲi ka ale ka sariya kalan ani k’a sira tagama. O lo bena a dɛmɛ ka desizɔn ɲumanw ta ani koow bena ɲɛ a bolo.—Zozuwe 1:7, 8.

An be “waati gɛlɛnw” lo la. O kama, an fana be gwɛlɛya dɔw sɔrɔ (2 Tim. 3:1, ABM). N’an b’a fɛ ka see sɔrɔ o gwɛlɛyaw kan i ko Zozuwe, an ka ɲi ka mun lo kɛ do? Jehova ye ladili minw di Zozuwe ma, an ka ɲi k’u sira tagama. An ka ɲi ka Bibulu kalan loon o loon ani ka Bibulu ka sariyakolow sira tagama walisa k’an ka gwɛlɛyaw ɲɛnabɔ.

An caaman bena sɔn a ma ko an tɛ Bibulu kalanbaga ɲumanw ye ani ko kalan man di an ye. Nka, a kɔrɔtanin lo kosɔbɛ an ka to ka Bibulu kalan. Koorilen nin lajɛ: “ Baara kɛ ni ladili nunu ye k’a filɛ.” I bena ladili ɲuman dɔw sɔrɔ yen minw bena i dɛmɛ walisa i ka bibulukalan k’i nafa ani i ka ninsɔndiya sɔrɔ a la.

Zaburu sɛbɛbaga dɔ y’a fɔ dɔnkili la ko: “Masaba, a to ne k’i ka fɔta sira taama, o le ka di ne ye haali.” (Zab. 119:35). E fana be se ka ninsɔndiya sɔrɔ Ala ka Kuma kalan na. N’i tora ka Bibulu kalan, i bena miiriya ɲuman caaman sɔrɔ.

Hali n’i tɛ siya dɔ ɲɛminɛna i ko Zozuwe, gwɛlɛyaw b’i fana kan. O kama, i ka Ala ka Kuma kalan ani k’a sira tagama i ko Zozuwe. N’i y’o kɛ, i bena se ka desizɔn ɲumanw ta ani ka koow kɛ ni hakilitigiya ye.

BAARA KƐ NI LADILI NUNU YE K’A FILƐ

Delili kɛ ka sɔrɔ ka kalan daminɛ. Sebagayabɛɛtigi Ala ka miiriyaw lo be Bibulu kɔnɔ ani u sɛbɛra i nafa lo kosɔn. O kama, n’i be Bibulu kalanna, Jehova deli a k’i dɛmɛ k’a faamu, k’a miiriyaw to i hakili la ani ka basigi u kan walisa ka desizɔn ɲumanw ta.—Ɛsid. 7:10.
To k’i yɛrɛ ɲininga. N’i be Bibulu wala an ka gafew kalanna, to k’i yɛrɛ ɲininga ko: “Yɔrɔ nin be mun lo yira ne la Jehova koo la? O ɲɛsinnin be Bibulu ka barokun jɔnjɔn ma cogo di? Ne be se ka mɔgɔ wɛrɛw dɛmɛ n’o miiriya ye cogo di?”
I ye min kalan, miiri o la. Kalan lalɔ dɔɔni ani miiri: “Nin koo be mun kɛ ne la ani mun na? Koo minw ye ne sɔrɔ ka tɛmɛ, minw be n’ kan sisan wala minw be se ka n’ sɔrɔ loon nataw la, o kumaw ɲɛsinna u ma cogo di? Ne ye sariyakolow ni ladili minw sɔrɔ, n’ be se k’u sira tagama cogo di?” (Zɔbu 23:5; Zab. 49:4). Jatiminɛ kɛ k’a filɛ n’i be se k’a ɲɛfɔ fɛɛn min kama Ala y’a ka mɔgɔw jija ko u k’u yɛrɛ tanga koo dɔw ma. Wala miiri k’a filɛ n’u tun ma mɛnni kɛ Jehova fɛ, o nɔfɛkow tun be se ka kɛ min ye.—Deter. 32:28, 29.
A kɛ komi i be yen o koow kɛyɔrɔ la. Ɲɛyirali fɛ, a kɛ komi i tun be yen tuma min na Yusufu balimaw y’a feere Isimayɛlidenw ma (Zɛnɛzi 37:18-28). I ɲɛɛ be mun lo la? I be mankan ani kasa juman lo mɛnna? I yɛrɛ bila o mɔgɔw nɔɔ na. O koo be mun lo kɛra u la ani u be miirila mun lo la? N’i be jatiminɛ kɛ o cogo la, i ka kalan bena i nafa kosɔbɛ.
Baara kɛ ni sɛgɛsɛgɛrikɛ minanw ye. Ɔriganisasiyɔn ye minan dɔw labɛn minw b’an dɛmɛ ka sɛgɛsɛgɛri kɛ nɔgɔman na. N’u dɔw be sɔrɔ i ka kaan na ɛntɛrɛnɛti kan wo, papiye kan wo, baara kɛcogo degi n’u ye. Kana siran k’a ɲini mɔgɔ wɛrɛw fɛ u k’i dɛmɛ ka se baara kɛcogo la koɲuman n’o minanw ye. Ɲɛyirali fɛ, Index des publications des Témoins de Jéhovah wala Guide de recherche bena i dɛmɛ k’a lɔn min sɛbɛra ka ɲɛsin koo dɔw ma ani ka ɲɛfɔli sɔrɔ vɛrise caaman koo la. I be se ka baara kɛ ni sɛbɛ nin ye fana: Guide d’étude de la Parole de Dieu. An be se ka kunnafoni nafamanw sɔrɔ: yɔrɔw, wagatiw, fɛɛnw gwiliya, u hakɛ, u janya wala a ɲɔgɔnnaw koo la.
Segi miiriya jɔnjɔnw kan walisa u ka to i hakili la. N’i b’u kofɔ mɔgɔ wɛrɛw ye, o yɛrɛ lo ɲɔgɔn tɛ yen. Yala miiriya dɔ be yen i be se ka mɔgɔw dɛmɛ ni min ye waajuli la wa? N’i y’o koo fila kɛ, miiriya jɔnjɔnw bena to i hakili la ani i ye min kalan, o bena mɔgɔ wɛrɛw fana nafa.