Tɔɔrɔba min kofɔra Bibulu kɔnɔ, o ye mun lo ye?
Bibulu ka jaabili
O bena kɛ ɲagaminiba wagati ye, adamadenw ma deli ka min ɲɔgɔn ye. Bibulu ka kiraya kumaw b’a fɔ k’o bena kɛ “laban tuma” wala “laban waati” la (2 Timote 3:1; Daniyɛli 12:4). O “tɔɔrɔ bena boɲa kojugu. O tɔɔrɔ ɲɔgɔn ma sɔrɔ fɔlɔ kabini Ala ye diɲɛ dan fɔɔ ka na se bii ma. O tɔɔrɔ ɲɔgɔn fana tena kɛ tugu abada.”—Mariki 13:19; Daniyɛli 12:1; Matiyo 24:21, 22.
Koo minw bena kɛ o tɔɔrɔba wagati la
Ngalon diinan bena halaki. Ngalon diinan bena bari ka halaki yɔrɔninkelen (Yirali 17:1, 5; 18:9, 10, 21). Politiki jɛnkuluw, o minw tagamasiɲɛ ye ONU ye, olu lo bena ngalon diinan halaki ka Ala sago dafa. ONU, o ye jamanaw ka jɛnkulu ye (Organisation des Nations Unies).—Yirali 17:3, 15-18. a
U bena wuli tiɲɛn diinan kama. Ezekiyɛli ka yelifɛn dɔ la, a y’a ye ko duniɲa ka jamanaw bena fara ɲɔgɔn kan ka kɛ jɛnkulu kelen ye min be weele ko “Gɔgi . . . min be Magɔgi jamana na.” O jɛnkulu ben’a ɲini ka tiɲɛn diinan mɔgɔw halaki pewu. Nka Ala bena a sagokɛlaw kisi o halakili ma.—Ezekiyɛli 38:1, 2, 9-12, 18-23.
Kiti bena tigɛ dugukolo kan mɔgɔw kan. Yezu bena kiti tigɛ adamadenw bɛɛ kan ani a bena u “faran k’u bɔ ɲɔgɔn na i n’a fɔ sagadɛndɛbaga be sagaw faran ka bɔ baaw la cogo min na.” (Matiyo 25:31-33). Yezu bena basigi mun lo kan k’u kiti? A ben’a filɛ minw y’a ‘balimaw’ dɛmɛ ani minw ma sɔn k’u dɛmɛ. A “balimaw” ye mɔgɔ minw bena jɛn n’a ye ka kuntigiya kɛ sankolo la.—Matiyo 25:34-46.
U bena Ala ka Masaya kuntigiw lajɛn. Ala ye mɔgɔ kantigi minw sugandi walisa u ka taga masaya kɛ ni Krista ye, olu ka ɲɛnamaya bena ban dugukolo kan ani u bena kunu walisa ka taga sankolo la.—Matiyo 24:31; 1 Korɛntikaw 15:50-53; 1 Tesalonikaw 4:15-17.
Arimagedɔn. O kɛlɛ min bena “wili Setigi Ala ka lonba loon na,” o be weele fana ko “Ala ka loon.” (Yirali 16:14, 16; Ezayi 13:9; 2 Piyɛri 3:12). Kiti tɛna diya minw na, Krista bena olu halaki (Sofoni 1:18; 2 Tesalonikaw 1:6-10). Duniɲa nin ka politiki jɛnkuluw fana bena halaki. Bibulu kɔnɔ, u lakalila i ko sogo dɔ min be ni kungolo wolonwula ye.—Yirali 19:19-21.
Koo minw bena kɛ o tɔɔrɔba wagati kɔ
U bena Sutana n’a ka jinaw datugu. Mɛlɛkɛ setigi dɔ bena Sutana ni jinaw fili “dingɛjugu” kɔnɔ. O dingɛjugu ye tagamasiɲɛ ye min b’a yira ko Sutana ni jinaw bena kɛ i n’a fɔ u tɛ niin na tugun, u tɛna se ka foyi le kɛ (Yirali 20:1-3). Ka Sutana to o dingɛjugu kɔnɔ, a bena kɛ i n’a fɔ a be kaso kɔnɔ le. See foyi tɛna kɛ a ye tugun.—Yirali 20:7.
Saan waa kelen mara bena daminɛ. Ala ka Masaya bena a ka saan 1 000 mara daminɛ. O bena kɛ duga caaman sababu ye adamadenw fɛ (Yirali 5:9, 10; 20:4, 6). “Jamaba” dɔ bena kisi ka ‘bɔ tɔɔrɔba nin na.’ Mɔgɔ si tɛ se k’u jati k’u daa lɔn. Saan waa kelen mara bena daminɛ olu ɲɛɛ na dugukolo kan.—Yirali 7:9, 14; Zaburuw 37:9-11.
a Yirali ka kitabu kɔnɔ, ngalon diinan kofɔra ko “kakalamuso”, “Babilɔni duguba [Babilonɛba]” (Yirali 17:1, 5). Sogo wuleman min bena Babilonɛba halaki, o ye jɛnkulu dɔ tagamasiɲɛ ye min ka laɲinita ye ka duniɲa nin ka jamanaw kaan bɛn ani ka koow kɛ u tɔgɔ la. A daminɛ na, a tun be weele ko Société des Nations. Sisan, a be weele ko ONU.
Découvrez aussi…
BIBULU KA KALAN JƆNJƆNW
Mun na Ala ye dugukolo dan?
Dugukolo fanin lo danfɛn cɛɲumanbaw la. Ala y’a sigi k’a yɔrɔ janya tile la cogo bɛnnin na. A y’a dan k’a jɛngɛ cogo bɛnnin na. A y’a kɛ a be munumunu a yɛrɛ kan cogo bɛnnin na. Mun na Ala y’a sɔbɛ don ten ka dugukolo dan?