TA 25

Aleke Mawɔ Aɖu Ameɖokuigbɔdɔdɔ Ƒe Numame Dzi?

“Ƒe enyie mexɔ esime mete ɖokuinye gbɔ dɔdɔ. Emegbe meva nya Mawu ƒe susu le nuwɔna sia ŋu. Ɣesiaɣi si mekpɔ gome le nuwɔna sia me la, eɖea fu nam vevie ŋutɔ. Mebiaa ɖokuinye be: ‘Aleke Mawu ate ŋu alɔ̃mee?’”—Luiz.

NE ÈLE tsitsima, gbɔdɔdɔ ƒe dzodzrowo nu ate ŋu asẽ ɖe mewò. Esia ate ŋu awɔe be àva nɔ ɖokuiwò gbɔ dɔm. * Ame geɖe agblɔ be esia menye nu gbegblẽ o. Woagblɔ be: “Mèwɔ nu vevi ame aɖeke o ɖe.” Gake anyo be nàƒo asa na nuwɔna sia. Apostolo Paulo gblɔ be: ‘Eya ta miwu miaƒe ŋutinuwo le gbɔdɔdɔ ƒe dzodzro gome.’ (Kolosetɔwo 3:5) Ameɖokuigbɔdɔdɔ mewua gbɔdɔdɔ ƒe dzodzro o, ɖe wònyɔnɛ ɖe ame me boŋ. Azɔ hã, bu nya siwo gbɔna ŋu kpɔ:

● Ameɖokuigbɔdɔdɔ nana ame bua eɖokui ɖeɖe ko ŋu. Le kpɔɖeŋu me, ame si le eɖokui gbɔ dɔm la ƒe susu katã le ale si wòle sesem le eɖokui me ŋu.

● Ameɖokuigbɔdɔdɔ nana wobua ame siwo ƒe vidzinu to vovo la be enye nu si ame atsɔ aɖi kɔ na eɖokui dzro ko.

● Esi ameɖokuigbɔdɔdɔ nana ame dia eɖokui tɔ taa, ne ame ma va ɖe srɔ̃a, esesẽna nɛ be wòaɖi kɔ na srɔ̃a ƒe gbɔdɔdɔ ƒe dzodzrowo ale si dze.

Le esi nàdi be yeadɔ ye ɖokui gbɔ atsɔ aɖi kɔ na dzodzro sesẽwo teƒea, dze agbagba nàɖu ɖokuiwò dzi boŋ. (1 Tesalonikatɔwo 4:4, 5) Biblia ɖo aɖaŋu nyui aɖe si ate ŋu akpe ɖe ŋuwò nàwɔ esia. Eyae nye be, nàƒo asa na nu siwo anyɔ gbɔdɔdɔ ƒe dzodzro ɖe mewò. (Lododowo 5:8, 9) Gake ne ameɖokuigbɔdɔdɔ zu numame na wò, eye wòle sesẽm na wò be nàdzudzɔ ya ɖe? Ðewohĩ èdze agbagba ʋuu wòglo. Ele bɔbɔe be nàƒo nya ta be yemagate ŋu atrɔ o, eye be Mawu ƒe mɔfiamewo dzi magate ŋu anya wɔ na ye o. Nenemae ɖekakpui aɖe si ŋkɔe nye Pedro se le eɖokui me. Egblɔ be: “Ne dzodzro sia ɖu dzinye la, eɖea fu nam ŋutɔ. Mesena le ɖokuinye me be nyemate ŋu awɔ naneke atsɔ alé avu ɖe nu si mewɔ ta o. Gbedodoɖa sesẽna nam.”

Ne nenemae wò hã nèsena le ɖokuiwò mea, dzi megaɖe le ƒowò o. Mègagblɔ be evɔ na ye o. Sɔhɛ kple ame tsitsi geɖe te ŋu va ɖu ameɖokuigbɔdɔdɔ dzi. Wò hã àte ŋui!

Tenɔnɔ Ðe Fɔbuameɖokui Nu

Abe ale si míegblɔe va yi xoxo ene la, ame siwo ɖokuigbɔdɔdɔ zu numame na la bua fɔ wo ɖokui zi geɖe. Ðikeke mele eme o be, “mawumenuxaxa” ate ŋu aʋã wò nàɖu numame sia dzi. (2 Korintotɔwo 7:11) Ke hã, fɔbubu ɖokuiwò fũ akpa ate ŋu agblẽ nu le ŋuwò. Ate ŋu ana dzi naɖe le ƒowò ale gbegbe be nàdi be yeana ta ko evɔ.—Lododowo 24:10.

Eya ta dze agbagba nàkpɔ ale si nɔnɔmea le ŋutɔŋutɔ. Ðokuigbɔdɔdɔ nye makɔmakɔnyenye ƒomevi aɖe. Ate ŋu ana nàzu ‘nudzodzro kple vivisese vovovowo ƒe kluvi,’ eye ate ŋu ana nɔnɔme manyomanyo aɖewo nava nɔ asiwò. (Tito 3:3) Ke hã, menye gbɔdɔdɔ manɔsenu ƒe nuwɔnae wònye o. (Yuda 7) Ne ɖokuigbɔdɔdɔ nye kuxi na wò la, mehiã be nàƒo nya ta be yewɔ nu vɔ̃ si womate ŋu atsɔ ake o. Egbɔkpɔnue nye be nàdze agbagba atsi dzodzro ma nu, eye mègana ta le avu sia me gbeɖe o!

Ɣeaɖewoɣi la, ele bɔbɔe be dzi naɖe le ƒowò ne ègawɔe ake. Ne edzɔ nenema la, ɖo ŋku nya siwo le Lododowo 24:16 la dzi, be: “Ne ame dzɔdzɔe dze anyi zi adre hã la, agafɔ, ke ame vɔ̃ɖiwo ya la, vɔ̃ ahe wo aƒu anyi.” Ɣeyiɣi vi aɖe ƒe gbɔdzɔgbɔdzɔ mefia be èzu ame vɔ̃ɖi o. Eya ta mègana ta o. Ke boŋ kpɔe ɖa be nu ka gbɔe wòtso be yegawɔe ake hã, eye nàdze agbagba aƒo asa na nu siwo akplɔ wò ade ewɔwɔ ake me.

Di ɣeyiɣi nàde ŋugble le Mawu ƒe lɔlɔ̃ kple nublanuikpɔkpɔ ŋu. Hakpala David, ame si gbɔdzɔgbɔdzɔ menye nu yeye na o la, gblɔ be: “Ale si vifofo kpɔa nublanui na viawoe la, nenemae Yehowa kpɔa nublanui na ame siwo vɔ̃nɛ. Elabena enya míaƒe wɔwɔme nyuie, eɖoa ŋui be kewɔe míenye.” (Psalmo 103:13, 14) Ɛ̃, Yehowa nyae be míede blibo o, eye ‘elɔ̃a tsɔtsɔke.’ (Psalmo 86:5) Gake edi be míadze agbagba vevie atrɔ asi le míaƒe nɔnɔmewo ŋu. Ekema nu ŋutɔŋutɔ kawoe nàte ŋu awɔ atsɔ aɖu wò numamea dzi?

Lé ŋku ɖe nu siwo nètsɔna ɖea modzakae ŋu. Ðe nèkpɔa video alo television dzi wɔna siwo nyɔa gbɔdɔdɔ ƒe dzodzro ɖe ame me alo kpɔa wo le Internet dzia? Hakpala aɖe si dze nunya la do gbe ɖa na Mawu be: “Ðe nye ŋku ɖa le nu dzodzrowo kpɔkpɔ ŋu.” *—Psalmo 119:37.

Dze agbagba nàna wò susu natrɔ ɖe nu bubuwo ŋu. Kristotɔ aɖe si ŋkɔe nye William ɖo aɖaŋu be: “Hafi nàmlɔ anyia, xlẽ Biblia alo Biblia-srɔ̃gbalẽ aɖe. Ele vevie ŋutɔ be nu mamlɛtɔ si anɔ susu me na wò nàtsɔ amlɔ anyii la naku ɖe Mawu ŋu.”—Filipitɔwo 4:8.

Ðo dze tso kuxia ŋu na ame aɖe. Ŋukpe ate ŋu ana wòasesẽ na wò be nàkɔ nu le nyaa dzi na ame aɖe si dzi nèka ɖo. Gake egbɔgblɔ ate ŋu akpe ɖe ŋuwò nàɖu numame sia dzi! Nenemae Kristotɔ aɖe si ŋkɔe nye David kpɔe. Egblɔ be: “Meɖo dze tso eŋu na tɔnye. Nyemaŋlɔ nya si wògblɔ nam la be akpɔ o. Eko alɔgbɔnu hegblɔ nam be: ‘Mekpɔ dzidzɔ ɖe ŋuwò ŋutɔ be nète ŋu gblɔe nam.’ Enya be agbagba bliboe medze hafi te ŋu gblɔe na ye. Eƒe nyawo de dzi ƒo nam hena megaɖoe kplikpaa be nyemana ta o.

“Emegbe tɔnye na míexlẽ mawunyakpukpui ʋɛ aɖewo be woakpe ɖe ŋunye makpɔe be nye nuwɔna mefia be menye ame vɔ̃ɖi o; gake míegaxlẽ kpukpui bubu aɖewo hã, siwo na mekpɔe be enye ŋkubiãnya. Egblɔ nam be manɔ asi trɔm le nɔnɔmea ŋu va se ɖe esime míagaɖo dze tso eŋu. Egblɔ nam hã be ne megawɔe akea, dzi megaɖe le ƒonye o; ke boŋ madze agbagba aɖu ɖokuinye dzi, ale be ne agadzɔ hã, ɣeyiɣi didi aɖe nava yi hafi.” Aleke David ƒo nya tae? Egblɔ be: “Enyanya be ame aɖe nya nu tso nye kuxia ŋu eye wòle kpekpem ɖe ŋunye be maɖu edzi la ɖe vi nam ale gbegbe.” *

LE TA SI KPLƆE ÐO ME

Gbɔdɔdɔ menye fefenya o. Kpɔ nu si tae míegblɔ nenema ɖo.

[Etenuŋɔŋlɔwo]

MAWUNYAKPUKPUI VEVI

“Si le sɔhɛmenɔɣi ƒe nudzodzrowo nu, ke boŋ ti dzɔdzɔenyenye, xɔse, lɔlɔ̃ kple ŋutifafa yome hekpe ɖe ame siwo yɔa Aƒetɔ la tso dzi dzadzɛ me la ŋu.”—2 Timoteo 2:22.

KPEKPEÐEŊU

Do gbe ɖa hafi dzodzroawo nu nava sẽ ɖe edzi le mewò. Bia Yehowa Mawu be wòana wò “ŋusẽ si gbɔ dzɔdzɔmetɔ ŋu” be nàtsɔ aɖu tetekpɔwo dzi.​—2 Korintotɔwo 4:7.

ÈNYAA . . .?

Ame si gbɔdzɔ la teŋu ɖea mɔ gbɔdɔdɔ ƒe dzodzrowo ɖua edzi bɔbɔe. Gake ame si sẽŋu ŋutɔŋutɔ la ɖua eɖokui dzi le ɣaɣlaƒe gɔ̃ hã.

NU SIWO MAWƆ!

Mate ŋu atsɔ nye susu aɖo nu siwo le dzadzɛ la ŋu ne ․․․․․

Le esi teƒe be maɖe mɔ dzodzroawo naɖu dzinye la, nu si mawɔ boŋue nye ․․․․․

Nya si madi be mabia dzinyelawo tso nya sia ŋue nye ․․․․․

NU KAE NÈSUSU?

● Nu ka tae wòle vevie be wòanɔ susu me na wò be Yehowa “lɔ̃a tsɔtsɔke”?​—Psalmo 86:5.

● Esi wònye be Mawu si de gbɔdɔdɔ ƒe dzodzro mewò la kee bia tso asiwò be nàɖu ɖokuiwò dzi ɖe, nu ka dzie wòka ɖo be nàte ŋu awɔ?

[Nya si ɖe dzesi]

Tso esime meɖu kuxia dzia, nye dzitsinya ŋu kɔ le Yehowa ŋkume, eye naneke mele vevie nam wu ema o!’’—Sarah

[Nɔnɔmetata]

Ne èle du ƒum hedze anyia, mefia be ele be nàgbugbɔ ayi megbe agadze dua ƒuƒu gɔme o. Nenema kee ne èdzudzɔ ɖokuiwò gbɔ dɔdɔ gake gava wɔea, mefia be agbagba siwo nèdze va yi la zu dzodzro o