Yeremiya 4:1-31
4 Yehowa be: “Oo Israel, ne èbe yeatrɔ gbɔ,Ne èbe yeatrɔ va gbɔnye,Eye ne àɖe wò legba nyɔŋuwo ɖa le nye ŋkuta la,Ekema màganye tsatsala o.+
2 Eye ne èka atam be,‘Zi ale si Yehowa le agbe!’ eye nèwɔe le nyateƒe, ʋɔnudɔdrɔ̃ dzɔdzɔe kple nuteƒewɔwɔ me la,Ekema dukɔwo ayra wo ɖokuiwo to eya amea dzi,Eye eya mee woaƒo adegbe le.”+
3 Elabena ale Yehowa gblɔ na Yudatɔwo kple Yerusalem ye nye esi:
“Mide agble ɖe anyigba wɔnu dzi,Eye miganɔ nu ƒãm ɖe ŋùwo me o.+
4 Mi Yudatɔwo kple Yerusalem nɔlawo,Mitso aʋa na mia ɖokuiwo na Yehowa,Eye mitso aʋa na miaƒe dziwo,+Ne nye dɔmedzoe nagafla abe dzo ene,Eye wòabi le miaƒe nu vɔ̃ɖi wɔwɔwo ta,+Eye ame aɖeke mate ŋu atsii o.”
5 Migblɔe le Yuda, eye miɖe gbeƒãe le Yerusalem.
Mido ɣli, eye miku lãdzo le anyigba la katã dzi.+
Mido ɣli sesĩe miagblɔ be: “Miƒo takpliNe míasi ayi du sesẽawo me.+
6 Mido dzesiti ɖe dzi ɖo ɖe Zion.
Midi bebeƒe, eye migatɔ ɖi o,”
Elabena mehe gbegblẽ tso dziehe gbɔna,+ gbegblẽ si teƒe makɔ o.
7 Edo abe dzata si do tso eƒe avekɔe me ene;+Dukɔwo gblẽla la ho.+
Eho tso enɔƒe be wòana wò anyigba la nazu ŋɔdzinu.
Wò duwo azu aƒedo, eye ame aɖeke manɔ wo me o.+
8 Eya ta mita akpanya.+Mifa konyi,* eye mifa avi sesĩe,Elabena dɔmedzoe helĩhelĩ si Yehowa do ɖe mía ŋu la nu mefa o.
9 Yehowa be: “Ava eme gbe ma gbe be, dzi aɖe le fiaKple amegãwo ƒo;+Nunɔlawo alulu, eye nyagblɔɖilawo ƒe nu aku.”+
10 Eye megblɔ be: “Aléle, Oo, Aƒetɔ Dziɖulagã Yehowa! Vavãe, èflu dukɔ sia+ kple Yerusalem, esi nègblɔ be, ‘Mianɔ ŋutifafa me,’+ evɔ yi le vehlo dzi na mí.”*
11 Ɣemaɣi la, woagblɔ na dukɔ sia kple Yerusalem be:
“Ya xɔdzo aɖe ƒo tso togbɛ ƒeƒlewo dzi to gbegbe gbɔna ɖeNye dukɔ ƒe vinyɔnu* gbɔ;Menye be woatsɔ agbɔ nui alo ana nu me nadza o.
12 Ya sesẽ si teƒe mekɔ o, si ƒo tso teƒe siawo la tso gbɔnye.
Azɔ madrɔ̃ ʋɔnu wo.
13 Kpɔ ɖa! Aho ava abe alilikpo dodo ene,Eye eƒe tasiaɖamwo le abe ahom ene.+
Eƒe sɔwo ƒua du wu hɔ̃.+
Baba na mí, elabena míetsrɔ̃ vɔ!
14 Oo Yerusalem, klɔ nu vɔ̃ɖi wɔwɔ ɖa le wò dzi ŋu, ne woaxɔ na wò.+
Ɣekaɣi nàdzudzɔ susu vɔ̃wo bubu ase ɖo?
15 Elabena gbe aɖe le ɖiɖim tso Dan,+Eye wòle gbeƒã ɖem gbegblẽ tso Efrayim tonuto la me.
16 Migblɔe na dukɔwo;Miɖe gbeƒãe be egbɔna Yerusalem dzi.”
“Dzɔlawo* tso anyigba didi aɖe dzi gbɔna,Eye woana woƒe ɣli nade dzi ɖe Yuda duwo ŋu.
17 Woɖe to ɖe Yerusalem le goawo katã me abe agbleŋudzɔlawo ene,+Elabena edze aglã ɖe ŋunye,”+ Yehowa ye gblɔe.
18 “Woaɖo wò zɔzɔme kple wò nuwɔnawo teƒe na wò.+
Aleke gbegbe wò gbegblẽ la ave kaɖikaɖie nye esi;Elabena ede keke wò dzi gbɔ ke!”
19 Oo, mele veve sem,* mele veve sem!
Vevesesea nu sẽ heɖo nye dzi* me ke.
Nye dzi le tsotsom kpokpokpo le menye.
Nyemate ŋu azi ɖoɖoe o,Elabena mese* lãdzo ƒe ɖiɖi,Mese aʋaɣli.+
20 Wohe nyatakaka vɛ be gbegblẽ kplɔ gbegblẽ ɖo,Elabena wogblẽ anyigba blibo la katã.
Kasia wogblẽ nye agbadɔwo,Eye wogblẽ nye agbadɔvɔwo le aɖabaƒoƒo ɖeka me.+
21 Ɣekaɣi manɔ dzesiti la kpɔkpɔ dzi,Eye manɔ lãdzo ƒe ɖiɖi sem ase ɖo?+
22 “Elabena nye dukɔ tsi bome;+Womedze sim o.
Vi manyanuwoe wonye, eye womesea nu gɔme o.
Wobi ɖe* nu vɔ̃ɖi wɔwɔ me,Ke womedze si nu nyui wɔwɔ ya o.”
23 Meɖe ŋku ɖe anyigba, eye kpɔ ɖa, ele ƒuƒlu heɖi gbɔlo.+
Meɖe ŋku ɖe dziƒowo, ke woƒe kekeli megali o.+
24 Meɖe ŋku ɖe towo, eye kpɔ ɖa, wole dzodzom kpekpekpe,Eye togbɛwo katã le ʋuʋum.+
25 Meɖo ŋku anyi, eye kpɔ ɖa, amegbetɔ aɖeke meli o,Eye dziƒoxewo katã si.+
26 Meɖo ŋku anyi, eye kpɔ ɖa, atikutsetsebɔ la zu gbegbe,Eye wogbã eƒe duwo katã.+
Yehowae wɔ esiaLe eƒe dɔmedzoe helĩhelĩ la ta.
27 Elabena ale Yehowa gblɔe nye esi: “Anyigba blibo la azu gbegbe,+Gake nyematsrɔ̃ nuwo katã keŋkeŋ o.
28 Esia tae anyigba la afa konyi,+Eye dziƒowo ado viviti.+
Elabena meƒo nu, meɖo tame,Eye nyematrɔ susu* loo alo agbe ewɔwɔ o.+
29 Dua me nɔlawo katã se sɔdolawo kple aŋutrɔdalawo ƒe hoowɔwɔ,Eye ame sia ame si.+
Woge ɖe avewo me,Eye wolia agakpewo.+
Wogblẽ duawo katã ɖi,Eye ame aɖeke megale wo me o.”
30 Esi wodo aƒedo wò azɔ ɖe, nu ka wɔ ge nàla?
Tsã la, èdoa awu dzĩHetsɔa sikanuwo ɖoa atsyɔ̃ na ɖokuiwò,Eye nèɖoa tu ɖe ŋku.
Ke dzodzroe nèwɔ leke na ɖokuiwò,+Elabena ame siwo wò nu léa dzi na la gbe wò;Azɔ wole wò ku* dim.+
31 Elabena mese gbe aɖe abe nyɔnu si le dɔ lém la tɔ ene,Ŋeŋe si le abe nyɔnu si le eƒe ŋgɔgbevi dzim la tɔ ene,Zion vinyɔnu si gbɔgbɔtsixe tsi ƒo na la ƒe gbee.
Eke eƒe abɔwo me gblɔ be:+
“Baba nam, elabena amewulawo na nu ti kɔ nam!”*
Etenuŋɔŋlɔ
^ Alo, “Miƒo akɔta.”
^ Alo, “evɔ yi de keke míaƒe luʋɔ gbɔ ke.”
^ Woƒo nu tso dukɔa ŋu abe ame ene, ɖewohĩ tsɔ ɖe veveseɖeamenu alo nublanuikpɔkpɔ fia.
^ Egɔmeɖeɖe tẽe, “Nukpɔlawo,” efia, ame siwo léa ŋku ɖe du ŋu be yewoanya ɣeyiɣi si yewoadze wo dzi.
^ Egɔmeɖeɖe tẽe, “Oo, nye dɔkaviwo.”
^ Egɔmeɖeɖe tẽe, “dzixɔ.”
^ Egɔmeɖeɖe tẽe, “nye luʋɔ se.”
^ Alo, “Nunyalawo wonye le.”
^ Alo, “mavem.”
^ Alo, “wò luʋɔ.”
^ Alo, “na nye luʋɔ.”
