Wotrɔ asi le ʋutɔkaɖi 4,500 kloe siwo le Los Angeles si le California ŋu wowɔa dɔ aduadu. Dua ƒe teƒe siwo katã wowɔ ɖoɖo sia le ƒe kekeme ade kilometa 1,215. The New York Times gblɔ be, Los Angeles ye nye “xexemedu gã gbãtɔ si me wowɔ nu sia le kpɔ.”

Numekuku siwo wowɔ tso lãmesẽnyawo ŋu le xexea me ɖee fia be ame siwo lolo akpa ƒe agbɔsɔsɔ dzi ɖe edzi 82 le alafa me le ƒe 1990 kple 2010 dome. Togbɔ be nuɖuɖunyawo gale fu ɖem le dukɔ geɖewo me hã la, ame siwo kuna le lolo akpa ta sɔ gbɔ wu ame siwo kuna le nu nyui makpɔɖu ta ƒe teƒe etɔ̃. Le nyateƒe me la, numekula mawo ƒe tatɔwo dometɔ ɖeka si ŋkɔe nye Majid Ezzati gblɔ be: “Míeɖe xexe aɖe si me amewo mekpɔa nu ɖuna ɖia ƒo o le la ɖe megbe ƒe 20 aɖewoe nye esia heva le xexe aɖe si me nuɖuɖu kple nuɖuɖu siwo medea lãmesẽ dzi o ɖuɖu fũu na míele dɔ lém la me, eye ele alea le dukɔ madeŋgɔwo gɔ̃ hã me.”

Woka nya ta be xe si woyɔna be Laysan albatross si nye “xexea me ƒe xe tsitsitɔ si ŋu wònya nu tsoe” la gaƒo viwo. Ƒe nenie xe sia xɔ? Axɔ abe ƒe atɔ̃ ene esi wode dzesi eŋu le ƒe 1956 me, si fia be exɔ wu ƒe 60 fifia. Albatross sia anya dzo kilometa miliɔn 3 va ɖo 4 le eƒe agbenɔɣi, didime sia sɔ kple mɔzɔzɔ tso anyigba dzi yi ɣleti dzi, yiyi kple gbɔgbɔ zi ene va se ɖe zi ade sɔŋ.

Numekuku aɖe ɖee fia be South Africa nyɔnu ɖeka le etɔ̃ me zãa ŋutikodzalẽ kple ŋutikomiwo tsɔ koa alo klɔa ŋuti. Ŋutikonu siawo gblẽa nu le ame ŋu, eya ta dukɔ geɖe de se ɖe wo nu. Afɔku siwo nu siawo zazã hena vɛ la dometɔ aɖewoe nye kansadɔ vovovowo, ayikudɔ, dzimaɖitsitsi, blanuiléledɔ kple ŋutsetse, eye wofiãa amewo ƒe ŋutigbalẽ hã.