ESI tɔnye, si ŋkɔe nye Arthur Guest, nye ɖekakpui si vɔ̃a Mawu ta la, edi vevie be yeava zu Metodisttɔwo ƒe nunɔla. Gake esi wòxlẽ Biblia Nusrɔ̃viwo ƒe agbalẽ eye wòte hadede kpli wo ko la, etrɔ eƒe susu. Exɔ nyɔnyrɔ le ƒe 1914 me esi wòxɔ ƒe 17. Xexemeʋa Gbãtɔ nɔ edzi yim ɣemaɣi, eye dziɖuɖua yɔe be wòava wɔ asrafodɔ. Esi wògbe be yemayi aʋa o ta la, wodrɔ ʋɔnui heka ɣleti ewo nɛ be wòatsɔ anɔ gaxɔ me le Kingston Gakpɔ si le Ontario, Canada, la me. Esi Papa do le gaxɔ me la, edze nyanyuikakadɔa (mɔɖeɖedɔa) wɔwɔ gɔme.

Le ƒe 1926 me la, Papa ɖe Hazel Wilkinson. Hazel Wilkinson nɔ xɔ nyateƒea le ƒe 1908 me. Wodzim le April 24, 1931, dzi. Mí ame enee wodzi, eye nyee nye evelia. Yehowa subɔsubɔe nye nu vevitɔ na míaƒe ƒomea, eye ale si Papa dea bubu Biblia ŋui la wɔe be míawo hã míeva lɔ̃ Mawu ƒe Nyaa vevie. Ƒome bliboa kpɔa gome le tso aƒe me yi aƒe me subɔsubɔdɔa me ɖekae.—Dɔw. 20:20.

Xexemeʋa Evelia fe ati le ƒe 1939 me, eye woɖo asi Yehowa Ðasefowo ƒe dɔa dzi le Canada le ƒe si kplɔe ɖo me. Wowɔa dulɔlɔ̃ kɔnuwo le dziɖuɖua ƒe sukuwo; wodoa gbe na aflaga, eye wodzia dukɔa ƒe hawo hã. Ne ɣeyiɣia de be woawɔ kɔnu siawo la, wonyaa nye kple daanye, Dorothy, doa go le sukuxɔa me. Gbe ɖeka, esi míaƒe nufiala di be yeado ŋukpem ta la, egblɔ be menye vɔvɔ̃nɔtɔ; ewɔ nuku nam ŋutɔ. Esi míedo yina aƒe me gbe ma gbea, nye sukuhatiwo va dze dzinye eye wotutum ƒu anyi. Gake woƒe nuwɔwɔ ɖe ŋunye alea na megaɖoe kplikpaa wu tsã be “[maɖo] to Mawu abe dziɖula ene wu amewo.”—Dɔw. 5:29.

Le July 1942 me, esi mexɔ ƒe 11 la, wonyrɔm ɖe tsi me le agble aɖe ƒe tsigo gã aɖe me mezu Yehowa subɔla. Meƒoa ɖokuinye ɖe mɔkeke mɔɖeɖedɔ (si míeyɔna fifia be kpekpeɖeŋu mɔɖeɖedɔ) la me  le sukumɔkeɣiwo ƒe sia ƒe, eye mesea vivi nɛ ŋutɔ. Le ƒe aɖe mea, nye kple nɔviŋutsu etɔ̃ bubuwo míeyi ɖaɖe gbeƒã na atimulawo le nuto saɖeaga aɖe me le Ontario ƒe dziehe gome.

Medze gbesiagbe mɔɖeɖedɔa wɔwɔ gɔme le May 1, 1949, dzi. Wonɔ xɔtudɔwo wɔm le alɔdzedɔwɔƒea ɣemaɣi, eye wokpem be maɖakpe asi ɖe dɔa ŋu. Le December 1, dzi la, mezu Canada Betel ƒomea me tɔ. Wode dɔ asi nam le agbalẽtaƒea eye mesrɔ̃ agbalẽtamɔ̃ gbadzatɔ zazã. Mewɔ zãdɔ kwasiɖa geɖe henɔ trakt si ƒo nu tso yometiti si me tom Yehowa ƒe amewo nɔ le Canada ŋu la tam.

Emegbe, esi meva nɔ dɔ wɔm le Subɔsubɔ Dɔdzikpɔƒe si le alɔdzedɔwɔƒea la, mebia gbe gbe sia gbe mɔɖela siwo va alɔdzedɔwɔƒea kple susu be yewoato edzi aɖaɖe gbeƒã le Quebec, afi si wonɔ nɔviwo yome tim vevie le la. Wo dometɔ ɖeka ŋkɔe nye Mary Zazula si tso Edmonton, Alberta. Esi wònye be woa kple foa, Joe wogbe be yewomadzudzɔ Biblia-sɔsrɔ̃ o ta la, wo dzila siwo nye Orthodɔkstɔ dovevienuwo la nya wo do go le aƒe me. Wo ame evea siaa xɔ nyɔnyrɔ le June 1951 me, eye ɣleti ade megbea, wodze mɔɖeɖedɔa gɔme. Esi menɔ gbe biam mɔɖelaawo la, mekpɔ xɔse sẽŋu si gbegbe le Mary si, eye esia wɔ dɔ ɖe dzinye ŋutɔ. Megblɔ na ɖokuinye be, ‘Ne nu sia nu yi nyuiea, ɖetugbui siae maɖe.’ Míeɖe mía nɔewo le ɣleti asieke megbe, le January 30, 1954 dzi. Kwasiɖa ɖeka megbea, wokpe mí be míava xɔ hehe na nutome sue dzi kpɔkpɔ dɔa wɔwɔ, eye míesubɔ nutome sue aɖe si le Ontario ƒe dziehe gome le ƒe eve siwo kplɔe ɖo me.

Esi gbeƒãɖeɖedɔa nɔ ta kekem le xexea me katã ta la, wokpe nɔviwo na dutanyanyuigbɔgblɔdɔa. Míesusui be esi míetea ŋu nɔa te ɖe ale si yame fana miamiamia le Canada le vuvɔŋɔli kple mu siwo ɖea fu na ame ale gbegbe le dzomeŋɔli nu ta la, ke míate ŋu akpe akɔ kple nɔnɔme madeamedzi ɖe sia ɖe si míado goe le afi sia afi si míasubɔ le. Míewu Gilead Sukua ƒe klass 27 lia nu le July 1956 me, eye kaka November naɖo la, míenɔ Brazil, dukɔ si me woɖo mí ɖo.

Esi míeɖo alɔdzedɔwɔƒe si le Brazil la, míedze Portugalgbe sɔsrɔ̃ gɔme. Esi míesrɔ̃ gbedoname kple dzeɖomɔnu kpuiwo kpakple miniti ɖeka ƒe kpɔɖeŋudzeɖonya si míatsɔ ana magazinewo vɔ la, míeƒo mía ɖokui ɖe gbeadzisubɔsubɔdɔa me. Wogblɔ na mí be ne aƒemenɔlaa tsɔ ɖe le eme la, míaxlẽ mawunyakpukpui siwo ƒo nu tso Mawu Fiaɖuƒea ŋu nɛ. Ŋkeke gbãtɔ si míeyi gbeadzi la, nyɔnu aɖe lé to ɖe gbedeasia ŋu nyuie, eya ta mexlẽ Nyaɖeɖefia 21:3, 4 nɛ; kasia, meku ƒenyi! Nutoa me ƒe dzoxɔxɔ memam haɖe o, eye esia ɖe fu nam ɣeyiɣi didi aɖe.

Míaƒe anyigbamamae nye Campos dugã, afi si hame 15 le fifia. Esi míeɖo afi ma la, saɖeagaƒuƒoƒo ɖeka pɛ kple dutanyanyuigblɔlawo ƒe aƒe ɖeka  koe nɔ anyi. Nɔvinyɔnu enee nɔ aƒea me; woawoe nye: Esther Tracy, Ramona Bauer, Luiza Schwarz kple Lorraine Brookes (si nye Wallen fifia). Dɔ si mewɔna le aƒea mee nye nunyanya kple nakedidi na míaƒe nuɖaɖa. Le Dzoɖagbe fiẽ aɖe me esi míewu míaƒe Gbetakpɔxɔ Nusɔsrɔ̃a nu vɔ la, amedzro aɖe si míenɔ kpɔm na o va dze mí. Srɔ̃nye dra ɖe zikpui lɔbɔɔa me eye míenɔ dze ɖom tso ŋkekea me nudzɔdzɔwo ŋu. Esi wòkɔ ta dzi be yeatso la, kasia da aɖee nye ema do si na zi tɔ le xɔa me va de asi na esime mewui!

Esi míesrɔ̃ Portugalgbea ƒe ɖeka vɔ la, woɖom nutome sue dzikpɔla. Míenɔ agbe tsɛ le kɔƒenutoawo me—elektrikkaɖi menɔ anyi o, míeɖoa aba ɖe anyigba mlɔa edzi, eye míedoa sɔwo alo ɖoa tasiaɖam tsɔ zɔa mɔe. Esi míeyi ɖawɔ ɖaseɖiɖidɔ tɔxɛ aɖe le anyigbamama si womede asi na hame aɖeke o me la, míeɖo keteke yi du aɖe si le tonutowo me eye míedze amedzrodzeƒe aɖe. Alɔdzedɔwɔƒea ɖo magazine 800 ɖe mí be míazã le gbeadzi. Eva hiã be míanɔ posudɔwɔƒea yim anɔ gbɔgbɔm zi gbɔ zi geɖe aɖafɔ aɖakago siwo me magazineawo le la katã ava míaƒe dzeƒea.

Le ƒe 1962 me la, wowɔ Fiaɖuƒe Subɔsubɔ Suku le Brazil ƒe anyigbamama bliboa me na nɔviŋutsuwo kple nɔvinyɔnu dutanyanyuigblɔlawo. Wode dɔ asi nam be maɖafia nu le sukuawo dometɔ ɖe sia ɖe me, si wɔe be menɔ mɔzɔzɔ dzi ɣleti ade sɔŋ, gake nyemezɔ mɔa kple Mary o. Mefia nu le suku siwo wowɔ le Manaus, Belém, Fortaleza, Recife kple Salvador. Mewɔ ɖoɖo ɖe nutome gã takpekpe si míewɔ le Manaus ƒe fefewɔƒe xɔŋkɔa me ŋu. Tsi gã aɖe dza ɣemaɣi si lɔ ɖi kɔ ɖe tsi nonoawo me eye wòwɔe hã be takpekpea ƒe nuɖuƒea wɔ ba finyafinya. (Ɣemaɣi la, míeɖaa nu na vavalawo le takpekpewo me.) Mebia kpekpeɖeŋu tso asrafowo gbɔ, eye asrafomegã dɔmenyotɔ aɖe wɔ ɖoɖo wotsɔ tsi nono si ade na takpekpea valawo katã vɛ na mí eye wòdɔ asrafo aɖewo ɖa wova tu agbadɔ gã eve hena míaƒe dzodoƒea kple nuɖuƒea.

Esi menɔ nye mɔzɔzɔa dzi la, Mary ya nɔ ɖase ɖim le nuto si me asitsala Portugalgbedolawo nɔ la me; gadidi kple asitsanyawo ko ŋue wolɔ̃a dzeɖoɖo tsoe. Esia wɔe be mete ŋu ɖo dze kple ame aɖeke tso Biblia me nyawo ŋu o; eya ta egblɔ na nɔvi siwo le Betel la dometɔ aɖewo be, “Anyigba ƒe teƒe si nyemadi kura be manɔ o ye nye Portugal.” Gake nukunya aɖe dzɔ! Eteƒe medidi o, míexɔ lɛta aɖe si me wobia tso mía si le be míayi aɖasubɔ le Portugal. Ɣemaɣi la, woɖo asi míaƒe dɔa dzi le dukɔ ma me, eye togbɔ be edze Mary kpo le gɔmedzedzea me hã la, míelɔ̃ xɔ dɔdeasia.

Míeɖo Lisbon, Portugal, le August 1964 me. Portugal adzamekpovitɔwo (PIDE) nɔ mía nɔviwo  yome tim vevie ɣemaɣi. Esi nɔnɔmea nɔ alea ta la, enyo be nɔvi aɖeke meva kpe mí o, eye míeƒo asa na kadodo kple Ðasefo siwo le dukɔa me. Míedze amedzrodzeƒe aɖe henɔ lalam be míaxɔ dukɔa me nɔnɔ ƒe mɔɖegbalẽvi. Esi míexɔ míaƒe visawo vɔ la, míehaya aƒe aɖe. Le January 1965 me la, míeva do ka kple alɔdzedɔwɔƒea mlɔeba. Ɣemaɣie nye zi gbãtɔ míede kpekpeawo le ɣleti atɔ̃ me, eye dzi dzɔ mí ŋutɔ!

Míesee be kpovitɔwo nɔ mía nɔviwo ƒe aƒewo me tsam ŋkubiãtɔe gbe sia gbe. Eye esi wònye be kpovitɔwo nɔ Fiaɖuƒe Akpatawo túm ta la, míewɔa hamea ƒe kpekpewo le nɔviwo ƒe aƒe me. Wolé Ðasefo alafa geɖe yi kpovitɔwo ƒe dɔwɔƒe henɔ gbe biam wo. Wowɔ fu nɔviŋutsuwo koŋ kple susu be woaʋu go nɔvi siwo kpɔa kpekpeawo dzi la ƒe ŋkɔwo. Esia ta, nɔviwo va nɔ aƒemeŋkɔ ko yɔm na wo nɔewo, abe José alo Paulo ene, ke womeyɔa woƒe ƒomeŋkɔ na wo nɔewo o. Eya ta míawo hã míewɔe nenema.

Nu si nɔ vevie na mí ye nye mía nɔviwo ƒe gbɔgbɔmenuhiahiãwo gbɔ kpɔkpɔ. Mary ƒe dɔdeasie nye be wòatsɔ mɔ̃ aƒo Gbetakpɔxɔ Nusɔsrɔ̃nyatiwo kple agbalẽ bubuwo me nyawo ɖe stɛnsil alo pepa si wotsɔ taa kɔpi bubuwo la dzi.

Le June 1966 me la, ʋɔnunya vevi aɖe fɔ ɖe te le Lisbon. Wokplɔ Feijó Hame bliboa si me tɔwo le ame 49 la yi ʋɔnu le esi wode hame ƒe kpekpe si nu wode se ɖo la le aƒe aɖe me ta. Medzra nɔviawo ɖo nyuie ɖe ʋɔnudɔdrɔ̃a ŋu, eye mewɔ abe nyee nye senyala si atsɔ nya ɖe wo ŋu ene henɔ gbe biam wo ŋkubiãtɔe. Míenyae be womatso afia dzɔdzɔe na mí o, gake míeka ɖe edzi be esia anye ɖaseɖiɖi gã aɖe na amewo. Le ʋɔnua la, senyala si ʋli mía ta la yɔ Gamaliel si nɔ anyi le ƒe alafa gbãtɔ me ƒe nyawo tsɔ ƒo eƒe nyawo ta dzinɔameƒotɔe. (Dɔw. 5:33-39) Woka gaxɔmenɔɣi vovovowo na nɔvi 49-awo, tso ŋkeke 45 dzi va ɖo ɣleti atɔ̃ kple afã dzi, eye nyadzɔdzɔgbalẽwo ƒo nu tso ʋɔnudrɔ̃nyaa ŋu. Edzɔ dzi na mí ŋutɔ be senyala si ʋli mía ta dzinɔameƒotɔe la va nɔ Biblia srɔ̃m henɔ kpekpewo dem hafi wòva dɔ alɔ̃ le ku me.

Le December 1966 me la, woɖom alɔdzedɔwɔƒea dzi kpɔla eye mezã ɣeyiɣi geɖe ɖe senyawo gbɔ kpɔkpɔ ŋu. Míewɔ nu sia nu si míate ŋui be míaʋli Yehowa Ðasefowo ƒe mawusubɔsubɔ ƒe ablɔɖe ta. (Flp. 1:7) Wova de míaƒe habɔbɔa agbalẽ me le se nu mlɔeba le December 18, 1974 dzi. Nɔviŋutsu Nathan Knorr kple Frederick Franz wotso habɔbɔa ƒe dɔwɔƒegã va Portugal be yewoakpɔ dzidzɔ kpli mí le takpekpe tɔxɛ si ame geɖe maŋlɔ be o, si míewɔ le Oporto kple Lisbon la me; ame 46,870 ye de takpekpe ma.

Yehowa na gbeƒãɖeɖedɔa keke ta yi ƒukpo geɖe siwo dzi wodoa Portugalgbe le, siwo dome Azores,  Cape Verde, Madeira kpakple São Tomé kple Príncipe hã le dzi. Dɔa dzi ɖe edzi kabakaba ale gbegbe be eva hiã be woakeke míaƒe alɔdzedɔwɔƒea ɖe enu le ƒe 1988 me. Le April 23 lia dzi la, Nɔviŋutsu Milton Henschel va kpɔ xɔ yeyeawo ŋu kɔkɔ ƒe wɔnaa dzi. Nɔvi 45,522 siwo de wɔnaa teƒe la kpɔ dzidzɔ ale gbegbe. Ewɔ dɔ ɖe ame dzi ŋutɔ be nɔviŋutsu kple nɔvinyɔnu 20 siwo wɔ dutanyanyuigbɔgblɔdɔa le Portugal kpɔ hã va wɔnaa teƒe.

Hadede kple nɔvi wɔnuteƒewo ɖe vi geɖe na mí le agbe me. Esi menɔ Nɔviŋutsu Theodore Jaracz ŋu míeyi ɖasrã alɔdzedɔwɔƒe aɖe kpɔ la, mesrɔ̃ nu vevi aɖe. Ehiã be alɔdzedɔwɔƒea nakpɔ nya sesẽ aɖe gbɔ eye Alɔdzekɔmitia me tɔwo wɔ nu sia nu si woate ŋui, gake gbeɖegbeɖea koe. Nɔviŋutsu Jaracz na woƒe dzi dze eme esi wògblɔ na wo be: “Fifia, ɣeyiɣia de be míaɖe mɔ na gbɔgbɔ kɔkɔea wòawɔ eƒe dɔ.” Ƒe gbogbo aɖewoe nye esi va yi la, nye kple srɔ̃nye Mary míeɖi tsa yi Brooklyn eye míebɔ ha kple Nɔviŋutsu Franz kple nɔvi bubu aɖewo le fiẽsi aɖe me. Esi míebia tso Nɔviŋutsu Franz si be wòagblɔ nu si kpe ɖe eŋu wòte ŋu le Yehowa subɔm ƒe geɖee nye esia la, egblɔ be: “Aɖaŋu si maɖoe nye be: Nɔ Yehowa ƒe habɔbɔa ƒe akpa si le anyigba dzi la ŋu le ɣeyiɣi nyuiwo kple ɣeyiɣi madeamedziwo siaa me. Habɔbɔ sia ɖeɖe koe le dɔ si Yesu de se na eƒe nusrɔ̃lawo be woawɔ la wɔm, si nye gbeƒãɖeɖe Mawu Fiaɖuƒe ŋuti nya nyuia!”

Nenema tututue nye kple srɔ̃nye míewɔ, eye míekpɔ dzidzɔ geɖe. Míeɖoa ŋku alɔdzedɔwɔƒe siwo míeyi ɖasrã kpɔ la dzi kple dzidzɔ. Sasrãkpɔ mawo na mɔnukpɔkpɔ mí míekafu nɔvi tsitsiwo kple sɔhɛwo siaa ɖe subɔsubɔdɔ si wɔm wole na Yehowa nuteƒewɔwɔtɔe la ta, eye míedea dzi ƒo na wo be woayi edzi alé mɔnukpɔkpɔ tɔxɛ si su wo si be woasubɔ Yehowa la me ɖe asi.

Ƒeawo va yi kabakaba, eye mí ame evea siaa míexɔ ƒe 80 kple edzivɔ fifia. Mary le lãmesẽkuxi geɖewo me tom. (2 Kor. 12:9) Nɔnɔme sesẽwo na míaƒe xɔse ganyo ɖe edzi eye wodo ŋusẽ tame si míeɖo kplikpaa be míalé nuteƒewɔwɔ me ɖe asi. Ne míede ŋugble le nu siwo me míeto le agbe me ŋu la, míekpɔnɛ dzea sii kɔtɛ be Yehowa ve mía nu le mɔ geɖe ŋutɔ nu. *