KRISTOTƆ siwo nɔ anyi le ƒe alafa gbãtɔ me la ku kutri geɖe be yewoana ame geɖe ale si nu yewoate ŋui nase “Fiaɖuƒe ŋuti nya nyui” la. (Mat. 24:14) Wo dometɔ aɖewo yi ɖaɖe gbeƒã nya nyuia le duta gɔ̃ hã. Le kpɔɖeŋu me, apostolo Paulo yi nuto si me Turkey le egbea la me ɖaɖe gbeƒã nya nyuia tsitotsito le eƒe dutanyanyuigbɔgblɔmɔzɔzɔwo me. * Le ƒe 2014 me, si nye ƒe 2,000 aɖewo megbe la, wogawɔ nya nyui kaka dɔ tɔxɛ aɖe le Turkey. Nu ka tae wowɔ ɖoɖo ɖe dɔ tɔxɛ sia ŋu? Ame kawoe kpɔ gome le eme?

Gbeƒãɖela 2,800 kple edzivɔe le Turkey, ke hã, dukɔa me tɔwo ƒe xexlẽmee nye miliɔn 79. Esia fia be gbeƒãɖela siwo le Turkey la dometɔ ɖe sia ɖe aɖe gbeƒã na ame 28,000 le mama dedie nu. Àte ŋu akpɔe le akɔntabubu sia me be dukɔa me tɔ ʋɛ aɖewo koe gbeƒãɖelawo te ŋu gblɔ nya nyuia na. Taɖodzinu si nɔ gbeƒãɖeɖedɔ tɔxɛ sia ŋue nye be woaɖe gbeƒã nya nyuia na ame geɖe ale si nu woate ŋui le ɣeyiɣi kpui aɖe me. Nɔviŋutsu kple nɔvinyɔnu Turkeygbedola siwo ade 550 tso dukɔ bubuwo me yi Turkey heɖe gbeƒã aduadu kple gbeƒãɖela siwo le dukɔa me le dɔ tɔxɛ sia me. Nu kawoe do tso eme?

Enye ɖaseɖiɖi na ame geɖe. Hame si le Istanbul la ŋlɔ bena: “Esi amewo kpɔ mí la, wobia be: ‘Ðe miele takpekpe tɔxɛ aɖe wɔm le afi sia? Míekpɔ Yehowa Ðasefowo le afi sia afi!’” Hame aɖe si le du si nye Izmir me la ŋlɔ bena: “Ŋutsu aɖe si wɔa dɔ le ʋuɖoƒe aɖe la te ɖe hamemetsitsi aɖe ŋu hebiae be, ‘Nu kae le edzi yim? Ðe miedzi miaƒe gbeƒãɖeɖedɔa ɖe edzia?’” Ɛ̃, amewo de dzesi dɔ tɔxɛ si wowɔ la.

Nɔvi siwo tso duta ɖakpe asi ɖe dɔa ŋu la se vivi nɛ ale gbegbe. Steffen, si tso Denmark, gblɔ be: “Gbe sia gbe la, meɖea gbeƒã na ame siwo mese nu tso Yehowa ŋu kpɔ o. Mese le ɖokuinye me be mele gbeƒã ɖem Yehowa ƒe ŋkɔa.” Jean-David si tso France ŋlɔ bena: “Míeɖe gbeƒã tso aƒe me yi aƒe me le ablɔ ɖeka pɛ ko me gaƒoƒo geɖe. Dɔa vivi ŋutɔ! Ame akpa gãtɔ menya Yehowa Ðasefowo o. Woxɔ mí le aƒe ɖe sia ɖe kloe me, míedzea dzeɖoɖo gɔme kple aƒemenɔlaa, míeɖea míaƒe videoawo dometɔ ɖeka nɛ, eye míenaa agbalẽe.”

Gbeƒãɖela 550 siwo kpɔ gome le dɔa me la ma agbalẽ  60,000 le kwasiɖa eve pɛ ko me! Dɔ tɔxɛa nye ɖaseɖiɖi gã aɖe na amewo vavã.

Ede dzo nɔviwo me ɖe gbeƒãɖeɖedɔa ŋu. Dɔ tɔxɛ sia ʋã gbeƒãɖela siwo le dukɔa me be woawɔ geɖe. Wo dometɔ geɖe va te ɣeyiɣiawo katã ƒe subɔsubɔdɔa ŋu bubu. Eye le nyateƒe me la, gbeƒãɖela 82 sɔŋ dze mɔɖeɖedɔa gɔme le Turkey le ɣleti 12 siwo kplɔe ɖo me.

Gbeƒãɖela siwo va kpɔ gome le dɔa me la gblɔ ale si gomekpɔkpɔ le dɔ tɔxɛ sia me na woƒe subɔsubɔdɔa ganyo ɖe edzi esi wotrɔ yi aƒe gɔ̃ hã. Şirin, si nye nɔvinyɔnu aɖe si tso Germany la ŋlɔ bena: “Nɔvi siwo le Turkey tea ŋu ɖia vomeɖase bɔbɔe. Ekpea ŋu nam ŋutɔ be maɖi vomeɖase. Gake edzɔ dzi nam ŋutɔ be mekpɔ gome le dɔ tɔxɛ sia me, elabena nutoa me nɔviwo ƒe kpɔɖeŋu kple gbedodoɖa edziedzi kpe ɖe ŋunye mete ŋu le vomeɖaseɖiɖidɔ si menya wɔna nam tsã o la wɔm azɔ. Meɖe gbeƒã hema traktwo le ketekedzeƒewo gɔ̃ hã! Fifia, ŋu megakpeam abe tsã ene o.”

Johannes, si tso Germany gblɔ be, “Mesrɔ̃ nu vevi aɖewo siwo akpe ɖe ŋunye le nye subɔsubɔdɔa me. Nɔvi siwo le Turkey la dina vevie be yewoagblɔ nyateƒea na ame geɖe ale si nu yewoate ŋui. Wowɔa mɔnukpɔkpɔ ɖe sia ɖe ŋu dɔ ɖia ɖase na amewo. Meɖoe be nye hã mawɔ nenema ke ne metrɔ yi Germany. Eye meɖea gbeƒã na ame geɖe fifia wu ale si mewɔnɛ tsã.”

Zeynep, si tso France gblɔ be, “Dɔ tɔxɛ sia na nye subɔsubɔdɔa nyo ɖe edzi fifia wu tsã. Ekpe ɖe ŋunye be dzi va le ƒonye geɖe wu eye meɖoa ŋu ɖe Yehowa ŋu geɖe wu.”

Ena kadodo kplikplikpli va le gbeƒãɖelawo dome. Togbɔ be nɔviawo tso dukɔ vovovowo me hã la, lɔlɔ̃ kple ɖekawɔwɔ nɔ wo dome, eye esia wɔ dɔ ɖe nɔviawo dzi ŋutɔ. Jean-David, si ŋu míeƒo nu tsoe va yi la gblɔ be, “‘Míeɖɔ’ nɔviawo ƒe amedzrowɔwɔ kpɔ.” Egblɔ kpee be, “Woxɔ mí abe wo xɔlɔ̃wo kple woƒe ƒometɔwo ene. Woxɔ mí nyuie ɖe woƒe aƒewo me. Menya be xexea me katã ƒe nɔviwo ƒe habɔbɔe míenye; mexlẽ nu tso eŋu zi geɖe le míaƒe agbalẽwo me. Gake fifia, nye ŋutɔ mekpɔ eteƒe. Enye dada nam fifia wu tsã gɔ̃ hã be nye hã menye Yehowa ƒe amewo dometɔ ɖeka, eye medaa akpe nɛ ɖe mɔnukpɔkpɔ gã sia ta.”

 Claire, si tso France gblɔ be, “Míeɖanye Denmark, France, Germany, alo Turkey, tɔwo o, ƒome ɖekae mí katã míenye. Ðeko wòle abe ɖe Mawu tsɔ nututunu gã aɖe tutu dukɔwo ƒe liƒowo ɖa ene.”

Stéphanie, si tso France hã gblɔ be: “Gbeƒãɖeɖedɔ tɔxɛa na míekpɔe be menye dekɔnuwo alo gbegbɔgblɔwo tae míewɔ ɖeka ɖo o, ke boŋ esi mí katã míelɔ̃ Yehowa tae.”

Nɔvi siwo tso duta ɖakpɔ gome le dɔa me la dometɔ geɖe va nɔ eŋu bum be yewoaʋu ayi Turkey aɖakpe asi ɖe dɔ gã nyadri si gakpɔtɔ li woawɔ le afi ma ŋu. Wo dometɔ aɖewo ʋu yi xoxo. Nutoa me nɔviwo kpɔa ŋudzedze ɖe wo ŋu ŋutɔ.

Eƒe kpɔɖeŋu ɖekae nye esi: Ƒuƒoƒo aɖe si me gbeƒãɖela 25 le la le saɖeaganuto aɖe me. Nɔviŋutsu ɖeka koe nye hamemetsitsi le ƒuƒoƒo ma me ƒe geɖe. Kpɔ ale si gbegbe woakpɔ dzidzɔe esi nɔvi ade aɖewo tso Germany kple Netherlands ʋu va wo gbɔ le ƒe 2015 me be yewoakpe ɖe wo ŋui ɖa!

Nya kae gbeƒãɖela siwo yi Turkey ɖakpe asi ɖe dɔa ŋu hena ɣeyiɣi aɖe la gblɔ tso ale si agbea le le afi ma ŋu? Ele eme be, agbea sesẽna ɣeaɖewoɣi ya, gake dzidzɔ geɖe le subɔsubɔdɔa wɔwɔ le afi si gbeƒãɖela geɖe wu hiã le me. Nya si wo dometɔ aɖewo gblɔe nye esi:

Federico, si nye srɔ̃tɔ si xɔ ƒe 41 la ʋu tso Spain yi ɖakpe asi ɖe dɔa ŋu le Turkey. Egblɔ be: “Esi nunɔamesi geɖe mele asinye le afi sia o ta la, ena mevo, eye metsɔ susu ɖo nu siwo le vevie wu la ŋu.” Esi wobiae be, ɖe wòade dzi ƒo na ame bubuwo hã be woawɔ dɔ sia hã la, eɖo eŋu be: “Godoo! Ne èʋu yi duta kple taɖodzinu be yeaɖakpe ɖe amewo ŋu woanya Yehowa la, efia be ètsɔ ɖokuiwò de asi na Yehowa. Àkpɔ ale si gbegbe Yehowa léa be na wòe la geɖe wu.”

Rudy, si nye srɔ̃ŋutsu si xɔ ƒe 57 la ʋu tso Netherlands yi Turkey ɖakpe asi ɖe dɔa ŋu. Egblɔ be: “Subɔsubɔ le afi si gbeƒãɖela geɖe wu hiã le kple nya nyuia gbɔgblɔ na ame geɖe siwo mese nu tso eŋu kpɔ o la  nana míekpɔa dzidzeme geɖe. Ale si gbegbe nyateƒea nyanya doa dzidzɔ na amewo la teƒe kpɔkpɔ nana míekpɔa dzidzɔ ŋutɔ.”

Sascha, si nye srɔ̃ŋutsu si xɔ ƒe 42, si ʋu tso Germany ɖakpe asi ɖe dɔa ŋu la gblɔ be: “Ɣesiaɣi si mele gome kpɔm le gbeƒãɖeɖedɔa me la, medoa go ame siwo mese nu tso nyateƒea ŋu kpɔ o. Dzidzeme gã aɖee wònyena nam be mele kpekpem ɖe ame siawo ŋu be woanya nu tso Yehowa ŋu.”

Atsuko, si nye srɔ̃nyɔnu si xɔ ƒe 36, si tso Japan ɖakpe asi ɖe dɔa ŋu la gblɔ be: “Tsã la, medina be Armagedon nava kaba. Gake esi meʋu yi Turkey la, meda akpe na Yehowa be ekpɔtɔ le dzi gbɔm ɖi na amewo. Zi ale si mekpɔ ale si Yehowa le mɔ fiam xexea me katã ƒe gbeƒãɖeɖedɔa la, zi nenemae esia ʋãam be mate ɖe eyama ŋu kplikplikpli wu.”

Alisa, si nye nɔvinyɔnu aɖe si xɔ ƒe 31, si tso Russia la gblɔ be: “Yehowa subɔsubɔ le mɔ sia nu kpe ɖe ŋunye meɖɔ eƒe nyuiwɔwɔwo katã kpɔ.” (Ps. 34:8) Egblɔ kpee be: “Menye Fofonye koe Yehowa thanksnye o, ke enye Xɔ̃nye kplikplikpli si meganyana ɖe edzi wu le nɔnɔme ɖe sia ɖe si me meto me. Fifia, mele dzidzɔ kpɔm ale gbegbe, nuteƒekpɔkpɔ nyuiwo su asinye, eye mekpɔ yayrawo le mɔ geɖe nu!”

Dɔ tɔxɛ si wowɔ le Turkey la na ame gbogbo aɖewo va se nya nyuia. Ke hã, teƒe geɖe gakpɔtɔ le dukɔ ma me siwo womeɖe gbeƒã le kpɔ o. Gbe sia gbe la, nɔvi siwo ʋu yi Turkey be yewoasubɔ le afi si gbeƒãɖela geɖe wu hiã le la doa go ame siwo mese nu tso Yehowa ŋu kpɔ o. Àdi be yeasubɔ le anyigbamama sia tɔgbi mea? Ne èdii la, ekema míele dzi dem ƒo na wò be: ‘Fɔ mo dzi ne nàkpɔ agbleawo dzi ɖa, be woƒu na ŋeŋe.’ (Yoh. 4:35) Ðe nàte ŋu akpe asi ɖe dɔa ŋu le xexea ƒe akpa aɖe si agbleawo ‘ƒu na ŋeŋe’ lea? Ne àte ŋui la, ke dze afɔ siwo sɔ la ɖeɖe gɔme fifia be nàɖo taɖodzinu ma gbɔ. Nu ɖeka aɖe si ŋu kakaɖedzi le ye nye be: Ne èkpɔ gome le gbeƒãɖeɖedɔa me geɖe wu tsɔ kpe asi ɖe nya nyuia kaka ŋu be wòaɖo “anyigba ƒe seƒe ke” la, àkpɔ yayra manyagblɔ!—Dɔw. 1:8.