1. Nu ka tae wònyo be míadzra ɖo ɖe afɔku ŋu?

 WODOA lo be: “Dze aʋa ɖia, aʋa mesinɛ o.” Le kpɔɖeŋu me, ne afɔku dzɔa, zi geɖea, ame siwo dzra ɖo ɖe eŋue tea ŋu tsia agbe eye wokpena ɖe ame bubuwo ŋu. Dɔmenyohabɔbɔ aɖe si le Europa gblɔ be: “Dzadzraɖo nyuie tea ŋu xɔa ame ɖe agbe.”

2. Nu ka tae wòle be míadzra ɖo ɖe xaxa gãa ŋu? (Mateo 24:44)

² “Xaxa gã” la afe ati kpoyi. (Mat. 24:21) Gake manɔ abe afɔku siwo va lilia ame sia ame ene o. Míawo ya míenya be ava, elabe ƒe 2,000 kloe nye esi va yia, Yesu xlɔ̃ nu eyomedzelawo be woadzra ɖo ɖe ŋkeke ma ŋu. (Xlẽ Mateo 24:44.) Ne míedzra ɖo ɖe eŋua, anɔ bɔbɔe na mí be míado dzi le ɣeyiɣi sesẽ mawo me eye míakpe ɖe ame bubuwo hã ŋu be woado dzi.—Luka 21:36.

3. Aleke dzidodo, dɔmetɔtrɔ, kple lɔlɔ̃ akpe ɖe mía ŋu be míanɔ dzadzraɖoɖi na xaxa gãa?

³ Nɔnɔme vevi etɔ̃ ate ŋu akpe ɖe mía ŋu míanɔ dzadzraɖoɖi na xaxa gãa. Ne wobia tso mía si be míaɖe gbeƒã ʋɔnudrɔ̃nya sesẽ aɖe eye amewo tsi tsitre ɖe mía ŋua, nu kae míawɔ? (Nyaɖ. 16:21) Ɣemaɣia, míahiã na dzidodo be míate ŋu aɖo to Yehowa eye míaka ɖe edzi be akpɔ mía ta. Ke ne edzɔ be mía nɔviwo bú woƒe nunɔamesi aɖewo alo wo katã gɔ̃ hã ɖe? (Hab. 3:17, 18) Dɔmetɔtrɔ aʋã mí be míakpe ɖe wo ŋu. Ke ne dukɔwo ƒo ƒu dze mía dzi eye wòva hiã be mía kple mía nɔviwo míamimi ɖe teƒe sue aɖe hena ɣeyiɣi aɖewo ɖe? Aleke míawɔ nui? (Eze. 38:10-12) Ehiã be míalɔ̃ mía nɔviwo vevie fifia be míate ŋu ato ɣeyiɣi sesẽ mawo me.

4. Nɔnɔme kawoe Biblia de dzi ƒo na mí be míatu ɖo?

⁴ Mawu ƒe Nyaa de dzi ƒo na mí be míasrɔ̃ dzidodo, míaƒe dɔme natrɔ ɖe ame ŋu, eye míalɔ̃ amewo. Le kpɔɖeŋu  me, Luka 21:19 gblɔ be: “Ne miedo dzi la, miaɖe miaƒe agbewo.” Kolosetɔwo 3:12 gblɔ be: “Mido dɔmetɔtrɔ.” Eye 1 Tesalonikatɔwo 4:9, 10 gblɔ be: “Mawu fia miawo ŋutɔwo be mialɔ̃ mia nɔewo. . . . Ke míele nu xlɔ̃m mi, nɔviwo, be miayi edzi awɔe geɖe wu.” Yehowa subɔla siwo nɔ nɔnɔme nyui siawo ɖem fia xoxoe woŋlɔ kpukpui siawo me nyawo na. Ke hã, ele be woayi edzi anɔ nɔnɔme siawo tum ɖo. Esia tututue wòle be míawo hã míawɔ. Nu kae akpe ɖe mía ŋu? Míakpɔ ale si Kristotɔ gbãtɔwo ɖe nɔnɔme siawo fia. Eyome míakpɔ ale si míasrɔ̃ woƒe kpɔɖeŋua ale be míanɔ dzadzraɖoɖi na xaxa gãa.

5. Nu kae kpe ɖe Kristotɔ gbãtɔwo ŋu wodo dzi le nɔnɔme sesẽwo me?

⁵ Ehiã be Kristotɔ gbãtɔwo nado dzi. (Heb. 10:36) Woto kuxi siwo me ame akpa gãtɔ siwo nɔ anyi le woƒe ɣeyiɣia me toa me. Eye esi wonye Kristotɔwo taa, wogato kuxi bubuwo hã me. Le kpɔɖeŋu me, Yuda subɔsubɔhakplɔlawo, Roma dziɖuɖua, kple woawo ŋutɔwo ƒe ƒometɔwo ti wo yome. (Mat. 10:21) Eye le hamea me gɔ̃ hãa, ehiã be woaku kutri vevie be xɔsegbela siwo le agbagba dzem vevie be yewoato yewoƒe nufiafia dzi ade mama hamea mea nagakpɔ ŋusẽ ɖe wo dzi o. (Dɔw. 20:29, 30) Togbɔ be enɔ nenema hãa, Kristotɔ mawo do dzi. (Nyaɖ. 2:3) Nu kae kpe ɖe wo ŋu? Wode ŋugble le Hiob kple ame siwo ŋu Ŋɔŋlɔawo ƒo nu tsoe be wodo dzia ƒe kpɔɖeŋuwo ŋu. (Yak. 5:10, 11) Wodo gbe ɖa be Mawu nado ŋusẽ yewo. (Dɔw. 4:29-31) Woƒe susu nɔ ale si Yehowa aɖo eteƒe na wo ne wodo dzia ŋu.—Dɔw. 5:41.

6. Nu kae nèsrɔ̃ tso nu si Merita wɔ be wòte ŋu do dzia me?

⁶ Míawo hã míate ŋu axlẽ nu tso dzidodo ƒe kpɔɖeŋu siwo ŋu Biblia ƒo nu tsoe kple esiwo le míaƒe agbalẽwo mea ŋu eye míade ŋugble le wo ŋu. Esiae nɔvinyɔnu Merita si le Albania wɔ be wòte ŋu do dzi esi eƒe ƒomea tsi tsitre ɖe eŋu vevie. Egblɔ be: “Hiob ƒe ŋutinya si le Biblia me la wɔ dɔ ɖe dzinye ale gbegbe. Ekpe fu vevie, eye togbɔ be menya ame si na wònɔ fu kpem o hãa, egblɔ be: ‘Nyemaɖe asi le nye fɔmaɖimaɖi ŋu va se ɖe esime maku o!’ (Hiob 27:5) Ena mekpɔe be nu siwo me tom melea mede Hiob tɔ nu kura o. Hiob menya ame si gbɔ eƒe kuxiawo tso o, gake nye ya menya ame si gbɔ tɔnyeawo tso.”

7. Ne míele nɔnɔme sesẽ aɖeke me tom fifia o hãa, nu kae wòle be míanɔ wɔwɔm?

⁷ Nu bubu si míate ŋu awɔ be míado dzi ye nye be míanɔ nu si me tom míelea gblɔm na Yehowa edziedzi. (Flp. 4:6; 1 Tes. 5:17) Ðewohĩ mèle nɔnɔme sesẽ aɖeke me tom fifia o. Gake ɖe nèdia Yehowa ƒe mɔfiame ɣesiaɣi si nèdo dziku, nu te ɖe dziwò alo nètɔtɔa? Ne ètrɔna ɖe Yehowa ŋu edziedzi be wòakpe ɖe ŋuwò le kuxi suesuesue siwo nèdoa goe mea, anɔ bɔbɔe na wò be nàte ɖe eŋu geɖe wu ne èdo go kuxi sesẽwo le etsɔme. Esia ana dzi naɖo ƒowò nàka ɖe edzi be Yehowa nya nu si tututu wòawɔ atsɔ akpe ɖe ŋuwò le ɣeyiɣi nyuitɔ dzi.—Ps. 27:1, 3.

8. Aleke Mira ƒe kpɔɖeŋua na míekpɔe be ne míedo dzi le nɔnɔme sesẽwo me fifia, akpe ɖe mía ŋu be míado dzi le etsɔme? (Yakobo 1:2-4) (Kpɔ fotoa hã.)

⁸ Ne míedoa dzi le xaxa siwo me tom míele egbea mea, anɔ bɔbɔe na mí be míado dzi le xaxa gã si le ŋgɔ hã me. (Rom. 5:3) Nu ka tae míegblɔe nenema? Nɔvi  geɖewo de dzesii be ɣesiaɣi si yewote ŋu do dzi le xɔse ƒe dodokpɔ aɖe mea, ekpena ɖe yewo ŋu yewogatea ŋu doa dzi le bubu hã me. Esia doa ŋusẽ woƒe xɔse eye wogakana ɖe edzi be Yehowa le klalo be yeakpe ɖe wo ŋu. Eye esi woxɔ Yehowa dzi se alea taa, wotea ŋu doa dzi ne nɔnɔme sesẽ bubu gava. (Xlẽ Yakobo 1:2-4.) Mira, si nye mɔɖela le Albania, de dzesii be ale si yete ŋu do dzi le nɔnɔme sesẽwo me va yia kpe ɖe ye ŋu yegate ŋu le dzi dom fifia. Egblɔ be ewɔna na ye ɣeaɖewoɣi be yeƒe kuxiwo sɔ gbɔ wu ame sia ame tɔ. Gake ne yeɖo ŋku ale si gbegbe Yehowa kpe ɖe ye ŋu le ƒe 20 siwo va yi mea, yegblɔna na ye ɖokui be: ‘Yi edzi nàwɔ nuteƒe. Kpɔ ale si gbegbe Yehowa kpe ɖe ŋuwò le nɔnɔme sesẽ siwo me nèto le ƒe siwo va yi mea ɖa! Ðe nàdzudzɔ esubɔsubɔ wòazu dzodzroa? Ao ɖe!’ Wò hã àte ŋu ade ŋugble le ale si Yehowa kpe ɖe ŋuwò nèdo dzi va yia ŋu. Ka ɖe edzi be ɣesiaɣi si nèdo dzi le nɔnɔme sesẽ aɖe mea, edea dzesii eye aɖo eteƒe na wò. (Mat. 5:10-12) Azɔ hã anɔ bɔbɔe na wò be nàyi edzi ado dzi ne xaxa gãa dze egɔme, elabe èsrɔ̃ dzidodo xoxo.

9. Aleke nɔvi siwo le Antiokia le Siria ɖe dɔmetɔtrɔ fia?

⁹ Bu nu si dzɔ esi dɔ gã aɖe to le Yudea ŋu kpɔ. Esi nɔvi siwo le Antiokia le Siria se be dɔ to le Yudea, ɖikeke mele eme o be woƒe dɔme trɔ ɖe Kristotɔ siwo le afi ma ŋu, eye wowɔ nane tsɔ kpe ɖe wo ŋu. “[Woɖoe] be yewoaɖo kpekpeɖeŋununana, ale si wo dometɔ ɖe sia ɖe ate ŋui, ɖe nɔvi siwo le Yudea.” (Dɔw. 11:27-30) Togbɔ be afi si dɔa to le didi hãa, nɔvi siwo le Antiokia ɖoe kplikpaa be yewoakpe ɖe yewo nɔvi siwo le afi maa ŋu.—1 Yoh. 3:17, 18.

10. Mɔ kawo nue míate ŋu aɖe dɔmetɔtrɔ afia le ne afɔku dzɔ ɖe mía nɔviwo dzi? (Kpɔ fotoa hã.)

¹⁰ Egbea hãa, ne afɔku dzɔ ɖe mía nɔviwo dzia, ele be míaƒe dɔme natrɔ ɖe wo ŋu eye míaɖe afɔ enumake atsɔ akpe ɖe wo ŋu. Míate ŋu awɔ esia ne míetsɔ mía ɖokui na faa kpe asi ɖe kpekpeɖeŋunadɔwo ŋu, ne míedzɔ nu tsɔ do alɔ xexea me katã ƒe dɔa, alo míedo gbe ɖa ɖe ame siwo dzi afɔkua dzɔ ɖo la ta. b (Lod. 17:17) Le kpɔɖeŋu me, le ƒe 2020 mea, woɖo Afɔku Kpekpeɖeŋunakɔmiti 950 kple edzivɔ le xexea me godoo be woakpe ɖe ame siwo ŋu corona dɔvɔ̃a gblẽ nu lea ŋu. Nɔvi siwo wɔa dɔ le kpekpeɖeŋunakɔmitiwo mea dze na kafukafu ŋutɔ. Ale si woƒe dɔme trɔ ɖe wo nɔviwo ŋua wɔe be wokpe ɖe wo ŋu le ŋutilã me eye wokpe ɖe wo ŋu be woayi edzi asubɔ Yehowa. Eye ɣeaɖewoɣia, eva hiãna be woadzra woƒe aƒe alo tadeaguƒewo ɖo alo agbugbɔ wo atu.—Tsɔe sɔ kple 2 Korintotɔwo 8:1-4.

11. Ne míaƒe dɔme trɔna ɖe ame ŋua, aleke esia nana wokafua mía Fofo si le dziƒo?

¹¹ Ne míaƒe dɔme trɔ ɖe nɔvi siwo dzi afɔku dzɔ ɖo ŋu eye míekpe ɖe wo ŋua, amewo dea dzesii. Le kpɔɖeŋu me, le ƒe 2019 mea, ahom sesẽ aɖe si woyɔ be Dorian gbã Fiaɖuƒe Akpata aɖe le Bahamas. Esi mía nɔviwo gbugbɔ nɔ Fiaɖuƒe Akpataa tum la, eva hiã be woana xɔtudɔwɔƒe aɖe nawɔ dɔa ƒe akpa aɖe. Esi wobia dɔnunɔlaa, si menye Ðasefo o, be wòagblɔ nu siwo dɔa wɔwɔ abia la, egblɔ be: “Mazã nye ŋutɔ nye dɔwɔnuwo kple dɔwɔviwo, kpakple nu sia nu si ahiã atsɔ awɔ dɔa na  mi, eye nyemaxɔ naneke o. Ðeko medi be makpe ɖe miaƒe habɔbɔa ŋu. Ale si mielɔ̃ mia nɔewo wɔa dɔ ɖe dzinye ŋutɔ.” Ame geɖe siwo li egbea menya Yehowa o. Gake wo dometɔ geɖe dea dzesi nu si Yehowa Ðasefowo wɔna tsɔ kpena ɖe amewo ŋu. Dzidzɔe wònye na mí be ale si míaƒe dɔme trɔna ɖe amewo ŋua wɔa dɔ ɖe amewo dzi eye wòtea wo ɖe mía Mawu si ƒe “nublanuikpɔkpɔ sɔ gbɔ” la ŋu!—Ef. 2:4.

12. Ne míesrɔ̃ ale si míaƒe dɔme natrɔ ɖe ame ŋu fifia, aleke wòadzra mí ɖo ɖe xaxa gãa ŋu? (Nyaɖeɖefia 13:16, 17)

¹² Nu ka tae wòahiã be míaƒe dɔme natrɔ ɖe ame ŋu le xaxa gãa me? Biblia na eme kɔ be ame siwo made xexea me dziɖuɖuwo dzi oa ato nɔnɔme sesẽ geɖewo me fifia kple xaxa gãa siaa me. (Xlẽ Nyaɖeɖefia 13:16, 17.) Ahiã be míakpe ɖe mía nɔviwo ŋu be woate ŋu akpɔ woƒe gbe sia gbe nuhiahiãwo gbɔ. Ne míaƒe Fia, Kristo Yesu, va be yeadrɔ̃ ʋɔnu amewoa, neva eme be wòakpɔ mí be míenye ame siwo ƒe dɔme trɔna ɖe ame ŋu eye wòakpe mí be ‘míanyi Fiaɖuƒea’ ƒe dome.—Mat. 25:34-40.

13. Abe ale si wòdze le Romatɔwo 15:7 enea, aleke Kristotɔ gbãtɔwo ɖe lɔlɔ̃ fia wo nɔewo?

¹³ Lɔlɔ̃e ɖe dzesi le Kristotɔ gbãtɔawo dome. Gake ɖe wònɔ bɔbɔe na wo be woalɔ̃ wo nɔewoa? Bu ame siwo nɔ Roma hamea mea ŋu kpɔ. Wo dometɔ aɖewo nye Yudatɔ siwo nya Mose ƒe Sea nyuie eye wowɔna ɖe edzi tso ɖevime ke, gake ɖewo hã tso trɔ̃subɔdukɔwo me eye woƒe dekɔnuwo to vovo. Anɔ eme be wo dometɔ aɖewo nye kluviwo eye bubuwo nye ablɔɖemewo. Eye kluviwo anya nɔ wo dometɔ aɖewo gɔ̃ hã si. Togbɔ be ele alea hãa, Kristotɔ siawo te ŋu yi edzi lɔ̃ wo nɔewo. Nu kae kpe ɖe wo ŋu? Apostolo Paulo de dzi ƒo na wo be ‘woaxɔ wo nɔewo.’ (Xlẽ Romatɔwo 15:7.) Nu kae nya mawo fia? Nya si gɔme woɖe be ‘woaxɔ’ fia be woaxɔ ame dɔmenyotɔe alo awɔ amedzro nɛ alo alɔ̃ faa adze xɔlɔ̃ ame bubuwo hã. Le kpɔɖeŋu me, Paulo gblɔ na Filemon be wòakɔ dɔme ‘axɔ’ eƒe kluvi Onesimo si si dzo le egbɔa “faa.” (Filem. 17) Eye Priskila kple Akwila xɔ Apolo, ame si menya nu boo tso Kristotɔnyenye ŋu o, eye “wokplɔe ɖe wo ɖokui ŋu.” (Dɔw. 18:26) Kristotɔ mawo meɖe mɔ vovototo mawo de mama wo dome o, ke boŋ woxɔ wo nɔewo faa.

14. Aleke Anna kple srɔ̃a ɖee fia be yewolɔ̃ nɔviawo?

¹⁴ Míawo hã míate ŋu aɖee afia be míelɔ̃ mía nɔviwo ne míedzea xɔ̃ wo eye míekpɔa vovo ɖe wo ŋu. Esia ana be woawo hã woaɖe lɔlɔ̃ afia mí. (2 Kor. 6:11-13) Bu Anna kple srɔ̃a siwo nye dutanyanyuigblɔlawo ƒe kpɔɖeŋua ŋu kpɔ. Esi woɖo wo ɖe Ɣetoɖoƒe Afrika teti koe corona dɔvɔ̃a dze egɔme. Le dɔvɔ̃a taa, womate ŋu ado go nɔvi siwo le woƒe hamea mea ŋkume kple ŋkume o. Aleke atsu kple asi sia awɔ aɖe lɔlɔ̃ afia nɔviawo? Woɖoa dze kple nɔviawo to videokadodowo dzi eye wogblɔa ale si wodina vevie be yewoanya wo nyuiea na wo. Esia wɔ dɔ ɖe nɔviawo dzi, si wɔe be woawo hã yɔa wo eye woŋlɔa nu ɖona ɖe wo edziedzi. Nu ka tae Anna kple srɔ̃a dze agbagba be yewoanya nɔviawo nyuie? Anna gblɔ be, “Lɔlɔ̃ si nɔviwo ɖe fia nye kple nye ƒomea le nɔnɔme deamedziwo kple nɔnɔme madeamedziwo mea tsi susu kple dzi me nam. Esia ʋãm be nye hã maɖe lɔlɔ̃ afia amewo.”

15. Aleke Vanessa ƒe kpɔɖeŋua kpe ɖe ŋuwò be nàlɔ̃ nɔviwo katã? (Kpɔ fotoa hã.)

¹⁵ Mía dometɔ geɖe le hame siwo me  nɔviŋutsu kple nyɔnu siwo ƒe dekɔnuwo kple amenyenyewo to vovo lea me. Ne míaƒe susu le woƒe nɔnɔme nyuiwo ŋua, míayi edzi alɔ̃ wo. Esesẽ na nɔvinyɔnu Vanessa si le New Zealand be wòade ha kple nɔvi aɖewo le woƒe hamea me. Le esi wòaɖe eɖokui ɖe aga tso nɔvi mawo gbɔ teƒea, etiae be yeade ha kpli wo anya wo nyuie. Esia kpe ɖe eŋu wòva de dzesi nɔnɔme nyui siwo le wo si, si tae Yehowa lɔ̃ wo ɖo. Egblɔ be: “Tso esime srɔ̃nye va zu nutome sue dzikpɔlaa, míedoa go nɔvi geɖe siwo ƒe amenyenye le vovovo, eye ele bɔbɔe nam be mawɔ nu kpli wo ɖekae. Ale si míele vovovoa va nye nane si dzɔa dzi nam. Eye edzɔa dzi na Yehowa hã, elabe eyae he ame ƒomevi vovovowo be woava subɔ ye.” Ne míebua amewo abe ale si Yehowa bua woe enea, esia ɖenɛ fiana be míelɔ̃ wo.—2 Kor. 8:24.

16. Nu ka tae wòahiã be míalɔ̃ mía nɔviwo vevie le xaxa gãa me? (Kpɔ fotoa hã.)

¹⁶ Ahiã be míalɔ̃ mía nɔewo vevie le xaxa gãa me. Ne xaxa gãa dze egɔmea, aleke Yehowa akpɔ mía tae? Bu mɔfiame si Yehowa na eƒe amewo esi futɔwo dze blema Babilon dua dzi ŋu kpɔ. Egblɔ be: “Nye dukɔ, yi ɖe wò xɔgãwo me, eye nàtu ʋɔa ɖe ɖokuiwò nu. Ɣla ɖokuiwò vie va se ɖe esime dziku la nu nava yi.” (Yes. 26:20) Ahiã be míawo hã míawɔ ɖe mɔfiame mawo dzi ne xaxa gã la dze egɔme. ‘Xɔgã’ si woyɔ le afi sia ate ŋu afia míaƒe hamewo me. Le xaxa gãa mea, Yehowa awɔ ɖe ŋugbe si wòdo be yeakpɔ mía taa dzi ne míeyi edzi subɔ kple mía nɔviwo ɖekae. Eya ta menye ɖeko míadze agbagba anɔ ŋutifafa me kple mía nɔviwo fifia o, ke ele be míaku kutri alɔ̃ wo vevie tso dzi me hã. Esia ate ŋu axɔ mí ɖe agbe.

17. Ne míedzra ɖo fifia, nu kawoe míate ŋu awɔ le xaxa gãa me?

¹⁷ “Yehowa ƒe ŋkeke gã la” ahe xaxa ava ameƒomea dzi. (Zef. 1:14, 15) Yehowa ƒe amewo hã ato nɔnɔme sesẽwo me. Gake ne míedzra ɖo fifia, akpe ɖe mía ŋu be míaɖe dzi ɖi eye míakpe ɖe ame bubuwo ŋu. Neva eme be míado dzi le nɔnɔme sesẽ ɖe sia ɖe si ava mía dzi me. Ne mía nɔviwo le nɔnɔme sesẽwo me tom la, míawɔ mía tɔ sinua be míaƒe dɔme natrɔ ɖe wo ŋu eye míakpɔ woƒe hiahiãwo gbɔ na wo. Ne míelɔ̃ mía nɔviwo fifia, anɔ bɔbɔe na mí be míalɔ̃ wo le etsɔme hã. Ekema Yehowa ana míanɔ agbe tegbee le xexe si me afɔkuwo kple xaxawo maganɔ o me.—Yes. 65:17.