1, 2. (a) Nu kae míate ŋu asrɔ̃ tso Gideon kple eƒe ame 300-awo ƒe dzidodo me? (Kpɔ nɔnɔmetata si le nyati sia ƒe gɔmedzedze.) (b) Le Luka 21:19 me nyawo nu la, nu ka tae dzidodo hiã vevie?

ISRAEL-VIWO kple woƒe futɔwo kpe aʋa sesẽ aɖe. Ʋɔnudrɔ̃la Gideon le Israel-srafowo kplɔm woti Midiantɔwo kple dukɔ siwo wɔ ɖeka kpli wo la yome zã bliboa abe kilometa 32 sɔŋ ene! Biblia gblɔ be: “Gideon va Yordan nu eye wòtso tɔa. Ðeɖi te eya kple ŋutsu alafa etɔ̃ siwo le eŋu la ŋu.” Gake aʋaa mewu enu haɖe o. Futɔ 15,000 sɔŋ gasusɔ. Midiantɔ siawo te Israel-viwo ɖe anyi ƒe geɖe, eya ta Israel-viwo medi be yewoana ta kura o. Eya ta Gideon kple eŋumewo ti wo yome va se ɖe esime woɖu aʋaa dzi!—Ʋɔnudrɔ̃lawo 7:22; 8:4, 10, 28.

² Egbea míawo hã míele aʋa sesẽ si tea ɖeɖi ame ŋu la wɔm. Míaƒe futɔwoe nye Satana, xexea kple míaƒe blibomademade. Mía dometɔ aɖewo le aʋa wɔm kple futɔ siawo ƒe geɖe. Eye Yehowa kpe ɖe mía ŋu míeɖu aʋa geɖe dzi le agbe me xoxo. Ke hã míeɖu aʋa gãtɔ dzi haɖe o. Ðeɖi ate mía ŋu ɣeaɖewoɣi le aʋa si wɔm míele me. Alo nu ate  ŋu ati kɔ na mí esi míele nuɖoanyi vɔ̃ɖi sia ƒe nuwuwu lalam. Yesu xlɔ̃ nu mí be dodokpɔ sesẽwo kple yometiti geɖewo me to ge míala le ŋkeke mamlɛ siawo me. Gake egblɔ kpee be ne míedo dzi la, míate ŋu aɖu dzi. (Xlẽ Luka 21:19.) Ke nu kae nye dzidodo? Nu kae akpe ɖe mía ŋu míado dzi? Nu kae míate ŋu asrɔ̃ tso ame siwo do dzi la ƒe kpɔɖeŋuwo me? Eye aleke míate ŋu ana “dzidodo nawu eƒe dɔwɔwɔ nu”?—Yakobo 1:4.

3. Nu kae wòfia be woado dzi?

³ Le Biblia me la, dzidodo mefia be míazi kpi kpoo le xaxawo me ko evɔ o. Ke boŋ ale si míebua kuxia hesena le mía ɖokui me tso eŋu hã le eme. Dzidodo kpena ɖe mía ŋu be míeléa dzi ɖe ƒo, míewɔa nuteƒe, eye míegbɔa dzi ɖi. Numekugbalẽ aɖe gblɔ be, dzidodo kpena ɖe mía ŋu míaƒe mɔkpɔkpɔ me sẽna eye míenaa ta le dodokpɔwo me o. Edoa ŋusẽ mí míenɔa te sesĩe maʋamaʋã le nɔnɔme sesẽtɔwo gɔ̃ hã me. Eye wòkpena ɖe mía ŋu be míeɖua dzi elabena enana míaƒe susu nɔa nu si minyam míele ŋu, ke menye fukpekpeawo ŋu o.

4. Nu ka tae míate ŋu agblɔ be lɔlɔ̃ ye ʋãa mí míedoa dzi?

⁴ Lɔlɔ̃ ʋãa mí míedoa dzi. (Xlẽ 1 Korintotɔwo 13:4, 7.) Le nu kawo me? Lɔlɔ̃ na Yehowa ʋãa mí míedoa dzi le nu sia nu si ŋu wòɖe mɔ ɖo la me. (Luka 22:41, 42) Lɔlɔ̃ na mía nɔviwo kpena ɖe mía ŋu míedoa dzi tsɔa woƒe gbɔdzɔgbɔdzɔwo. (1 Petro 4:8) Eye lɔlɔ̃ na srɔ̃wò ana nàdo dzi le “xaxa” siwo me srɔ̃tɔ kpɔdzidzɔwo gɔ̃ hã tona me, eye esia ado ŋusẽ wò srɔ̃ɖeɖea.—1 Korintotɔwo 7:28.

5. Nu ka ta Yehowa ye dze nyuie akpe ɖe mía ŋu be míado dzi?

⁵ Bia Yehowa be wòado ŋusẽ wò. Yehowa nye “Mawu si naa dzidodo kple akɔfafa” mí. (Romatɔwo 15:5) Eya ɖeka koe sea míaƒe nɔnɔmewo, míaƒe seselelãmewo kple nu siwo me tom míele la gɔme bliboe. Eya ta enya nu si tututu míehiã be míado dzi. Biblia gblɔ be: “Ewɔa ame siwo vɔ̃nɛ la ƒe didi dzi na wo; esea woƒe ɣlidodo, eye wòxɔna na wo.” (Psalmo 145:19) Ke aleke Mawu ɖoa gbe siwo míedona ɖa be wòado ŋusẽ mí míado dzi ŋui?

6. Aleke Yehowa naa ‘mɔ si dzi míato ado le dodokpɔwo me’ la mí abe ale si wòdo ŋugbee le Biblia me ene?

⁶ Yehowa do ŋugbe be ‘yeana mɔ si dzi míato ado le dodokpɔwo me’ la mí ne míebiae be wòakpe ɖe mía ŋu míado dzi (Xlẽ 1 Korintotɔwo 10:13.) Aleke wòwɔa esiae? Eɖea mí le dodokpɔwo me ɣeaɖewoɣi. Gake zi geɖe la, edoa ŋusẽ mí ale be ‘míado dzi bliboe le dzigbɔgbɔ blewu kple dzidzɔ me.’ (Kolosetɔwo 1:11) Eye esi Yehowa nya míaƒe ŋutetewo ƒe seƒe kpakple míaƒe susuwo  kple seselelãmewo nyuie ta la, maɖe mɔ gbeɖe be míato dodokpɔ siwo nu míate ŋu anɔ te ɖo o la me o.

7. Wɔ nu si tae míehiã gbɔgbɔmenuɖuɖu be míado dzi la ƒe kpɔɖeŋu.

⁷ Na Biblia me nyateƒea nado ŋusẽ wò xɔse. Nu ka tae Biblia kple míaƒe agbalẽwo sɔsrɔ̃ le vevie? Míawɔ eƒe kpɔɖeŋu ale: Ne ame aɖe di be yealia to kɔkɔtɔ si le xexea me la, ele be wòaɖu nuɖuɖu si me ŋutilãnyinu gbogbo aɖe le. Esia fia be wòaɖu nuɖuɖu si me ŋutilãnyinu si eƒe ŋutilãa ahiã le ŋkeke etɔ̃ alo ene sɔŋ me la le ŋkeke ma dzi. Nenema kee míawo hã míehiã gbɔgbɔmenuɖuɖu geɖe si míatsɔ anɔ mía ɖokui nyim be míado dzi va se ɖe esime míeɖo míaƒe taɖodzinua gbɔ. Esia bia be míazã ɣeyiɣi geɖe ɖe ɖokuisinusɔsrɔ̃ ŋu eye míagana kpekpeawo nato mía ŋu o. Nu siawo akpe ɖe mía ŋu míado ŋusẽ míaƒe xɔse.—Yohanes 6:27.

8, 9. (a) Abe ale si wòdze le Hiob 2:4, 5 ene la, nu kae xaxawo dona kpɔna? (b) Ne èle xaxawo me tom la, nɔnɔme kae wòle be nàkpɔ le susu me?

⁸ Wò susu nenɔ nuteƒewɔwɔ na Mawu ŋu. Ne míele tetekpɔ me tom la, menye fu koe míekpena o. Ke boŋ wodoa míaƒe nuteƒewɔwɔ na Mawu hã kpɔna. Ale si míewɔa nu le tetekpɔwo me ɖenɛ fiana nenye be míelɔ̃ ɖe edzi be Yehowae dze be wòanye xexea me katã Dziɖula. Nu ka tae míegblɔe alea? Elabena Satana tsi tre ɖe Mawu ƒe dziɖuɖu ŋu. Eɖu fewu le Yehowa ŋu be nu siwo kpɔm amegbetɔwo le tso egbɔ tae wole esubɔm ɖo. Satana gblɔ be: “Amegbetɔ atsɔ nu sia nu si le esi la ana ɖe eƒe agbe ta.” Eye wòyi edzi gblɔ le Hiob ŋu be: “Gake ne èdo wò asi ɖa ka asi eƒe ƒu kple eƒe ŋutilã ŋu la, aƒo fi ade wò le wò ŋutɔ wò ŋkume godoo.” (Hiob 2:4, 5) Ðe Satana trɔ susu fifia? Kura o! Satana yi edzi nɔ Mawu subɔla wɔnuteƒewo nu tsom kaka va se ɖe esime wotsɔe ƒu gbe ɖo ɖe anyigba dzi. (Nyaɖeɖefia 12:10) Va ɖo egbea la, Satana gakpɔtɔ le esia wɔm hele gbɔgblɔm be nu siwo kpɔm amegbetɔwo le tso Mawu gbɔ tae wole esubɔm ɖo. Nu si dim wòle koe nye be míagbe Mawu ƒe dziɖuɖu ahadzudzɔ Yehowa subɔsubɔ.

⁹ Ne xaxawo tu wò la, wò ya dze agbagba nàkpɔ nɔnɔme sia ɖa le susu me: Satana kple eƒe gbɔgbɔ vɔ̃woe nye ema le akpa ɖeka. Wole ŋku lém ɖe wò nuwɔnawo ŋu hele gbɔgblɔm be àna ta le dodokpɔa me. Eye Yehowa, míaƒe Fia Yesu Kristo, amesiamina siwo wofɔ ɖe tsitre kple mawudɔla akpeakpewo hã le akpa kemɛ. Woawo hã wole wò agbagbadzedzewo kpɔm, wole megbe na wò hele dzi dem ƒo na wò! Dzi le wo dzɔm be èle dzi dom hele nuteƒe wɔm na Yehowa. Kasia, èse Yehowa wòle gbɔgblɔm na wò be: “Vinye, dze nunya, be nàdo dzidzɔ na nye dzi, ne mate ŋu aɖo nya ŋu na ame si le alɔme ɖem le ŋunye.”—Lododowo 27:11..

10. Aleke nàwɔ asrɔ̃ Yesu le dzidodo me?

¹⁰ Wò ŋku nenɔ fetu la dzi. Tsɔe be  èle mɔ zɔm. Eye eva hiã be nàto tomemɔ aɖe si woɖe la me. Tomemɔa didi eye wòdo viviti ale gbegbe. Gake ènya be ne yeyi mɔzɔzɔa dzi heɖo tomemɔa ƒe nuwuƒe la, yeagakpɔ kekeli ake. Míaƒe agbe le abe mɔzɔzɔ ma ene. Àto nɔnɔme sesẽwo me le agbe me eye ate ŋu awɔ na wò ɣeaɖewoɣi be kuxiawo wu tsɔtsɔ na ye. Ðewohĩ Yesu hã se le eɖokui me nenema. Woklãe ɖe fuwɔameti ŋu, woɖu fewu le eŋu, eye wòse veve geɖe. Anɔ eme be ɣemaɣie wòto nɔnɔme sesẽtɔwo me le agbe me! Nu kae kpe ɖe eŋu wòdo dzi? Biblia gblɔ be enɔ “dzidzɔ si wotsɔ ɖo eŋkume” la kpɔm ɖaa le susu me. (Hebritɔwo 12:2, 3) Yesu ƒe ŋku nɔ nu si ado tso eƒe dzidodoa me ŋu, eye nu si nɔ vevie nɛ ye nye be, yeakɔ Mawu ƒe ŋkɔ ŋu ahade eƒe dziɖuɖua dzi. Enya be ɣeyiɣi kpui aɖe ko ƒe xaxae wòanye, ke teƒeɖoɖoa ya anɔ anyi tegbee le dziƒo. Xaxa siwo me tom wò hã nèle egbea nu ate ŋu asẽ eye wòana nàse veve, gake ɖo ŋku edzi be ɣeyiɣi kpui aɖe ko ƒe xaxae.

11. Nu ka tae wòle be míadzro “ame siwo doa dzi” ƒe nuteƒekpɔkpɔwo me?

¹¹ Menye wò ɖeka koe le dzi dom o. Apostolo Petro de dzi ƒo na Kristotɔwo be woado dzi le Satana ƒe tetekpɔwo me. Egblɔ be: “Mitsi tsitre ɖe eŋu, minɔ te sesĩe le xɔse me, esi mienyae be mia nɔviwo ƒe habɔbɔ blibo si le xexea me la hã le fukpekpe mawo ke me tom ta.” (1 Petro 5:9) “Ame siwo doa dzi” ƒe nuteƒekpɔkpɔwo kpena ɖe mía ŋu míewɔa nuteƒe hekana ɖe edzi be míate ŋu aɖu aʋa dzi, eye wòɖoa ŋku edzi na mí be woaɖo míaƒe nuteƒewɔwɔ teƒe na mí godoo. (Yakobo 5:11) Na míadzro wo dometɔ aɖewo ƒe kpɔɖeŋuwo me kpɔ. ^[1]—Kpɔ dzesidenya la.

12. Nu kae míate ŋu asrɔ̃ tso kerubi siwo woɖo Eden-bɔa nu la ƒe kpɔɖeŋu me?

¹² Kerubiwo nye mawudɔla siwo le ɖoƒe kɔkɔ. Esi Adam kple Xawa wɔ nu vɔ̃ la, Yehowa de dɔ yeye aɖe asi na kerubi aɖewo le anyigba dzi. Dɔ sia to vovo kura na esi wowɔna le dziƒo. Woƒe kpɔɖeŋua ate ŋu afia ale si míado dzi ne wode dɔ sesẽ aɖe asi na mí la mí. Biblia gblɔ be Yehowa tsɔ “kerubiwo kple yi aɖe si le bibim hele totrom le eɖokui si la, ɖo Eden-bɔ la ƒe ɣedzeƒe gome, be woadzɔ agbeti la ƒe mɔ nu.” ^[2] (Kpɔ dzesidenya la.) (1 Mose 3:24) Biblia megblɔ be kerubiawo to nyatoƒoe alo bu be yewo kɔkɔ wu dɔ ma o. Dɔa meti kɔ na wo o eye womena ta o. Ke boŋ woyi  edzi wɔe kaka va se ɖe nuwuwu, ɖewohĩ va se ɖe esime Tsiɖɔɖɔa va le ƒe 1,600 kple edzivɔwo megbe!

13. Nu kae kpe ɖe Hiob ŋu wòdo dzi le tetekpɔ siwo me wòto la me?

¹³ Nuteƒewɔla Hiob. Etena ɖe mía dzi ŋutɔ ne mía xɔlɔ̃wo alo ƒometɔwo gblɔ nya siwo ate ŋu aɖe dzi le mía ƒo. Ðewohĩ dɔléle sesẽ aɖe alo wò lɔlɔ̃tɔ aɖe ƒe ku na nèle nu xam. Ke hã, nu ka ke me tom nèɖale o, Hiob ƒe kpɔɖeŋua ate ŋu afa akɔ na wò. (Hiob 1:18, 19; 2:7, 9; 19:1-3) Togbɔ be Hiob menya nu si gbɔ eƒe fukpekpea tso o hã la, mena ta gbeɖe o. Nu kae kpe ɖe eŋu wòdo dzi? Gbã la, elɔ̃ Yehowa ale gbegbe be medi be yeawɔ naneke si ado nuxaxa nɛ o. (Hiob 1:1) Hiob di vevie be yeawɔ Mawu ƒe lɔlɔ̃nu le ɣeyiɣi nyuiwo kple ɣeyiɣi vɔ̃wo siaa me. Evelia, Yehowa ƒo nu tso eƒe nuwɔwɔ wɔnuku aɖewo ŋu na Hiob be wòade dzesi yeƒe ŋusẽ triakɔ la. Esia na Hiob ka ɖe Yehowa dzi be aɖe ye le fukpekpe me le ɣeyiɣi nyuitɔ dzi. (Hiob 42:1, 2) Eye eva eme nenema hã. “Yehowa ɖe Hiob ƒe xaxawo ɖa eye wòna Hiob gazu kesinɔtɔ. Yehowa ɖo nu siwo katã nɔ esi tsã la teƒe nɛ zi gbɔ zi eve. Hiob tsi, eye agbenɔnɔ ɖi kɔ nɛ hafi wòku.”—Hiob 42:10, 17.

14. Abe ale si wòdze le 2 Korintotɔwo 1:6 ene la, aleke Paulo ƒe dzidodo ɖe vi na nɔvi bubuwoe?

¹⁴ Apostolo Paulo. Ðe amewo le tsitre tsim ɖe ŋuwò alo le yowòme tim veviea? Hamemetsitsi alo nutome sue dzikpɔlae nènye eye wòwɔ na wò abe ɖe agbanɔamedziwo wu tsɔtsɔ na ye enea? Ekema Paulo ƒe kpɔɖeŋu ate ŋu aɖe vi na wò. Woti Paulo yome kutɔkutɔe, eye wòtsia dzimaɖi ɖe hameawo ŋu ɣesiaɣi. (2 Korintotɔwo 11:23-29) Gake Paulo mena ta gbeɖe o, eye eƒe kpɔɖeŋua do ŋusẽ nɔviawo. (Xlẽ 2 Korintotɔwo 1:6.) Wò hã wò dzidodo ate ŋu ade dzi  ƒo na nɔvi bubuwo woawo hã woado dzi.

15, 16. (a) “Dɔwɔwɔ” ka nue wòle be míana dzidodo nawu? (b) Gblɔ ale si míate ŋu ana “dzidodo nawu eƒe dɔwɔwɔ nu” ƒe kpɔɖeŋu.

¹⁵ Gbɔgbɔ ʋã nusrɔ̃la Yakobo wògblɔ be: “Mina dzidodo nawu eƒe dɔwɔwɔ nu bliboe, ale be mianɔ blibo, eye miade keŋkeŋ le goawo katã me, eye naneke nagahiã mi o.” (Yakobo 1:4) Aleke nàwɔ ana dzidodo nawu eƒe “dɔwɔwɔ” nu bliboe? Ne èle dodokpɔwo me tom la, àva de dzesii be yehiã nɔnɔme aɖewo abe dzigbɔɖi, ŋudzedzekpɔkpɔ ɖe nu ŋu, alo lɔlɔ̃ ene geɖe wu. Dzidodo ana nàsrɔ̃ ale si nàɖe Kristotɔwo ƒe nɔnɔme nyui siawo kple bubuawo afia geɖe wu.

¹⁶ Dzidodo nana míezua Kristotɔ ɖɔʋuwo, eya ta mele be míada le Yehowa ƒe se aɖeke dzi ale be míakpɔ gbɔdzɔe le tetekpɔ me o. De ŋugble le kpɔɖeŋu siawo ŋu kpɔ: Nu kae nàwɔ ne èle avu wɔm kple gbɔdɔdɔ ƒe dzodzro vɔ̃wo? Mègana wòaɖu dziwò o! Bia Yehowa be wòakpe ɖe ŋuwò nàho susu vɔ̃ mawo ɖa. Ke ne ƒometɔ aɖe le tsitre tsim ɖe ŋuwò ya ɖe? Mègana ta o! Ðoe kplikpaa be yeasubɔ Yehowa ɖaa. Esia ana nàka ɖe Yehowa dzi bliboe wu. Ðo ŋku edzi be, hafi Mawu nakpɔ ŋudzedze ɖe ŋuwò la, ele be nàdo dzi.—Romatɔwo 5:3-5; Yakobo 1:12.

17, 18. (a) Kpɔɖeŋu kae ɖe ale si wòle be míado dzi va se ɖe nuwuwu fia? (b) Nu ka dzie wòle be míaka ɖo esi míele nuwuwua gogom?

¹⁷ Ele be míado dzi, menye ɣeyiɣi vi aɖe ko o, ke va se ɖe nuwuwu. Tsɔe be tɔdziʋu aɖee nye ema le nyɔnyrɔm. Hafi ʋua me nɔlawo natsi agbe la, ele be woaƒu tsia ava ɖi go. Ame si ƒu tsia vie ko nu ti kɔ nɛ wòna ta la anyrɔ. Ame si ƒu tsia ʋuu wòkpɔtɔ vie wòaɖi go gake wòna ta la hã anyrɔ. Eya ta ne míedi be míaɖo xexe yeyea me la, ele be míado dzi va se ɖe nuwuwu. Mina míanɔ abe apostolo Paulo ene; egblɔ be: “Míenaa ta o.”—2 Korintotɔwo 4:1, 16.

¹⁸ Abe Paulo ene la, míeka ɖe edzi vevie be Yehowa akpe ɖe mía ŋu míado dzi va se ɖe nuwuwu. Paulo gblɔ be: “Míeɖua dzi bliboe to ame si lɔ̃ mí la dzi. Elabena meka ɖe edzi bliboe be, eɖanye ku o, eɖanye agbe o, eɖanye mawudɔlawo o, eɖanye dziɖuɖuwo o, eɖanye nu siwo li fifia o, eɖanye nu siwo le vava ge o, eɖanye ŋusẽwo o, eɖanye kɔkɔƒe o, eɖanye gogloƒe alo nuwɔwɔ bubu aɖe o, mate ŋu ama mí ɖa tso Mawu ƒe lɔlɔ̃ si le Kristo Yesu, mía Aƒetɔ, me la gbɔ o.” (Romatɔwo 8:37-39) Nyateƒee, ɖeɖi tea mía ŋu ɣeaɖewoɣi. Ðeɖi te Gideon kple eŋumewo hã ŋu, gake womena ta o, “wogati woƒe futɔawo yome kokoko”; eya ta mina míasrɔ̃ wo, ado dzi va se ɖe nuwuwu!—Ʋɔnudrɔ̃lawo 8:4.