NA SRƆ̃TƆWO
3: Bubu
NU SI WÒFIA
Ne srɔ̃tɔwo dea bubu wo nɔewo ŋu la, wolɔ̃a wo nɔewo ne kuxiwo do mo ɖa gɔ̃ hã. Agbalẽ aɖe (Ten Lessons to Transform Your Marriage) gblɔ be: “Womeɖea mɔ kuxia gblẽa woƒe ƒomedodoa me o. Ke boŋ woƒoa nu tso masɔmasɔ ɖe sia ɖe si do mo ɖa ŋu. Woɖoa to sea susu si le wo nɔewo si bubutɔe eye wodia nu si ana woakpɔ kuxia gbɔ.”
BIBLIA ƑE MƆFIAME: “Lɔlɔ̃ . . . media ye ŋutɔ tɔ o.”—1 Korintotɔwo 13:4, 5.
“Be made bubu srɔ̃nye ŋu fia be made asixɔxɔ eŋu eye nyemedina be mawɔ naneke si agblẽ nu le eŋu alo le míaƒe srɔ̃ɖeɖea ŋu o.”—Micah.
NU SI TA WÒLE VEVIE
Numekulawo gblɔ be nyahehe, gbedada ɖe ame gbɔ kple gbɔɖiamenyawo gbɔgblɔ ɖe ame ŋu xɔa srɔ̃tɔ siwo medea bubu wo nɔewo ŋu o ƒe dzeɖoɖowo me, eye wonye dzesi siwo fiana be srɔ̃tɔ siawo gbɔna wo nɔewo gbe ge.
“Nya madzetowo gbɔgblɔ, ahamasisi, alo hatsekaka le ame srɔ̃ ŋu ana dzi naɖe le eƒo eye wòasusu be yemeɖi naneke le gbɔwò o, eye esia ana srɔ̃ɖeɖea me nagblẽ.”—Brian.
NU SI NÀTE ŊU AWƆ
DO ÐOKUIWÒ KPƆ
Na wò susu nanɔ wò dzeɖoɖowo kple wò nuwɔnawo ŋu hena kwasiɖa ɖeka. Emegbe nàbia ɖokuiwò be:
-
‘Zi nenie mehe nya ɖe srɔ̃nye ŋu, eye zi nenie mekafui?’
-
‘Nu kawo koŋ mee mede bubu srɔ̃nye ŋu le?’
WÒ KPLE SRƆ̃WÒ MIÐO DZE TSO NYA SIAWO ŊU
-
Nuwɔna kple nyagbɔgblɔ kawoe afia be miede bubu mia nɔewo ŋu?
-
Nuwɔna kple nyagbɔgblɔ kawoe fia be miede bubu mia nɔewo ŋu o?
AÐAŊUÐOÐOWO
-
Ŋlɔ nu etɔ̃ siwo me nàdi be woade bubu ye ŋu le la ɖi. Na srɔ̃wò hã nawɔe nenema. Tsɔ tɔwòa na srɔ̃wò, eye wò hã nàxɔ etɔ eye miadze agbagba awɔ ɖe nu siwo miede dzesii la dzi atsɔ ade bubu mia nɔewo ŋu.
-
Ŋlɔ srɔ̃wò ƒe nɔnɔme siwo nyoa ŋuwòa ɖi. Emegbe gblɔ ale si gbegbe nèkpɔa ŋudzedze ɖe nɔnɔme mawo ŋu la nɛ.
“Be made bubu srɔ̃nye ŋu fia be mato nye nuwɔnawo dzi aɖee afia be medea asixɔxɔ eŋu eye medina be wòakpɔ dzidzɔ. Mele be wòanye nu gã aɖe ɣesiaɣi o; ɣeaɖewoɣia nuwɔna suesuesue aɖewoe fiana be medea bubu eŋu.”—Megan.
Nyaa koe nye be menye ale si nèsusu be yedea bubu ye srɔ̃ ŋu ye nye nyaa o, ke boŋ ale si srɔ̃wò sena le eɖokui mee le vevie.
BIBLIA ƑE MƆFIAME: “Mido dɔmetɔtrɔ kple nublanuikpɔkpɔ, dɔmekɔkɔ, ɖokuibɔbɔɖeanyi, dɔmefafa, dzigbɔgbɔ blewu.”—Kolosetɔwo 3:12.
Ɖewohĩ Esia Hã Adzɔ Dzi Na Wò
GBETAKPƆXƆ
Ale Si Nàde Bubu Srɔ̃wò Ŋu
NYƆ!
Ale Si Nàde Bubu Srɔ̃wò Ŋu
Bubudede ame nɔewo ŋu le srɔ̃ɖeɖe me menye nu si adzro ame hafi wòawɔe o ke boŋ enye nu si wòle be woawɔ. Aleke nàte ŋu aɖee afia be yedea bubu ye srɔ̃ ŋu?
NYƆ!
Ðee Fia Be Yekpɔa Ŋudzedze Ðe Nu Ŋu
Ne srɔ̃ŋutsu kple srɔ̃a ɖoe be yewoade dzesi yewo nɔewo ƒe nɔnɔme nyuiwo la, wo dome va vivina wu. Nu kae akpe ɖe ŋuwò be nànye ame si kpɔa ŋudzedze ɖe nu ŋu?
NYƆ!
Ale Si Miaƒo Asa Na Nya Tɔamewo Gbɔgblɔ
Nu kae nàte ŋu awɔ ne nya tɔamewo gbɔgblɔ le nu gblẽm le miaƒe srɔ̃ɖeɖea ŋu?
