MENYE kesinɔtɔ alo ŋusẽtɔe wònye o. Aƒe menɔ eya ŋutɔ gɔ̃ hã si o. Ke hã eƒe nufiafiawo kpɔ ŋusẽ ɖe ame miliɔn geɖe dzi. Gake ɖe Yesu Kristo nɔ anyi kpɔ ŋutɔŋutɔa? Nya kae agbalẽnyala siwo li egbea kple esiwo nɔ anyi le blema gblɔ?

• Michael Grant, si nye ŋutinyaŋlɔla kple ame si nya nu tso blematɔwo ƒe ŋkuʋuʋu ŋu gblɔ be: “Ne míatsɔ ŋku si míetsɔ kpɔa blemanuŋlɔɖi siwo me ŋutinyawo le eye míekea ɖi trɔ̃subɔla gbogbo aɖewo ƒe anyinɔnɔ o la ke kpɔ Nubabla Yeyea la ekema míate ŋu agbe be Yesu nɔ anyi kpɔ o.”

• Rudolf Bultmann, si nye nufialagã si srɔ̃ nu tso Nubabla Yeyea ŋu gblɔ be: “Kpeɖodzi mele ɖi si kem amewo le tso Yesu ƒe anyinɔnɔ ŋu la ŋu o, eye mehiã be woaku nu me tso eŋu hã o. Ame siwo ƒe susu le te la dometɔ aɖeke make ɖi be Yesue nye ame gbãtɔ si ɖo ƒuƒoƒo aɖe si nɔ anyi le blema Palestina nuto me, si nye Kristotɔwo la anyi o.”

• Will Durant, si nye ŋutinyaŋlɔla, agbalẽŋlɔla kple xexemenunyala gblɔ be: “Be woagblɔ be ame tsɛ aɖewo [Nyanyuigbalẽa ŋlɔlawo] siwo nɔ anyi le dzidzime ɖeka aɖe me naŋlɔ nu tso ame aɖe si ƒe agbenɔnɔ kpɔ ŋusẽ nyui ɖe amewo dzi, ame si ƒe agbe nyui nɔnɔ de ŋgɔ hedea dzi ƒo na amegbetɔwo be woalé nɔvisi alea la, ke anye nukunu gã si lolo wu ɖe sia ɖe si ŋu nya woŋlɔ ɖe Nyanyuigbalẽawo me.”

• Albert Einstein, si nye Yudatɔ dzɔdzɔmeŋusẽŋununyala si wodzi le Germany gblɔ be: “Yudatɔ menye gake Nazaretetɔ la ƒe nu doa dzidzɔ nam ale gbegbe.” Esi wobiae be esusu be Yesu nɔ anyi kpɔ hã la, eɖo eŋu be: “Ɛ̃! Ame sia ame si axlẽ Nyanyuigbalẽawo la akpɔ ame si Yesu nye adze sii enumake. Eƒe amenyenye dze le nya ɖe sia ɖe kloe me. Ne glimeme aɖee wònye la, manɔ alea o.”

  “Ame sia ame si axlẽ Nyanyuigbalẽawo la akpɔ ame si Yesu nye adze sii enumake.”—Albert Einstein

Míakpɔ Yesu ƒe agbenɔnɔ kple subɔsubɔdɔ ŋuti nya si woŋlɔ ɖi tsitotsito la le Biblia-gbalẽ siwo nye Nyanyuigbalẽawo me—woawoe nye Mateo, Marko, Luka kple Yohanes. Wotsɔ agbalẽawo ŋlɔlawo ƒe ŋkɔwo na agbalẽawo. Tsɔ kpe ɖe eŋu la, ame gbogbo aɖewo siwo menye Kristotɔwo o le blema hã ƒo nu tso Yesu ŋu.

• TACITUS

  (Ƒe 56-120 K.Ŋ., alo Kristotɔwo Ŋɔli lɔƒo) Wobu Tacitus be enye blema Romatɔwo ƒe ŋutinyaŋlɔla gãtɔwo dometɔ ɖeka. Eƒe nuŋlɔɖiwo dze egɔme tso Roma Fiaɖuƒea ƒe dziɖuɣi ƒe ƒe 14 K.Ŋ. va ɖo 68 K.Ŋ. (Yesu ku le ƒe 33 K.Ŋ.) Tacitus ŋlɔ bena esi dzo gã aɖe fiã Roma le ƒe 64 K.Ŋ. la, Wosusu be Fiagã Nero gbɔe wòtso. Gake Tacitus ŋlɔ bena, Nero tsò Kristotɔwo nu be woawo gbɔe wòtso “ale be woatsi wobewobea nu.” Tacitus gagblɔ be: “Le Tiberio ƒe dziɖuɣi la, Pontio Pilato tso kufia na Kristus, ame si to [Kristotɔnyenye] vɛ eye wowui.”—Annals, XV, 44.

• SUETONIUS

  (Ƒe 69 megbe va ɖo 122 K.Ŋ. lɔƒo) Le agbalẽ si nye Kaisarowo Ƒe Agbenɔnɔ si Romatɔwo ƒe ŋutinyaŋlɔla sia ŋlɔ me la, eƒo nu tso nu siwo dzɔ le Roma fiagã 11 gbãtɔwo ƒe dziɖuɣi la ŋu. Agbalẽa ƒe akpa si ƒo nu tso Klaudio ŋu la ƒo nu tso nyahehe aɖe si anya ku ɖe Yesu ŋu si he ʋunyaʋunya de Yudatɔwo dome le Roma la ŋu. (Dɔwɔwɔwo 18:2) Aƒetɔ Suetonius ŋlɔ be: “Esi Krestus [Kristus] dea nyaʋiʋli Yudatɔwo dome ɣeawokatãɣi ta la, Klaudio nya wo le Roma.” (The Deified Claudius, XXV, 4) Togbɔ be Suetonius tsò Yesu nu vodadatɔe be eyae nɔ zitɔtɔa dem ameawo dome hã la, meke ɖi Yesu ƒe anyinɔnɔ o.

• PLINY SUETƆ

  (Ƒe 61-113 K.Ŋ. lɔƒo) Romatɔwo ƒe agbalẽŋlɔla sia si nye Bithynia (egbegbe Turkey) nutoa dzi kpɔla ŋlɔ agbalẽ ɖo ɖe Roma Fiagã Trajan tso ale si woatu nu kple Kristotɔ siwo le nuto ma me ŋu. Pliny gblɔ be yedze agbagba zi Kristotɔwo dzi be woagbe nu le woƒe dzixɔsewo gbɔ, eye yewua ame siwo gbe asiɖeɖe le woƒe dzixɔsewo ŋu. Egblɔ be: ‘Ame siwo gbena be menye Kristotɔwoe yewonye o siwo gblɔa nya siwo megblɔna tsɔ kafua trɔ̃wo ɖe yonyeme, eye wodea bubu wò kpetataa ŋu eye wogbea nu le Kristo gbɔ la, woawo ŋue meɖea asi le.’—Pliny—Letters, Book X, XCVI.

•  FLAVIUS JOSEPHUS

  (Ƒe 37-100 K.Ŋ. lɔƒo) Yudatɔwo ƒe nunɔla kple ŋutinyaŋlɔla sia gblɔ be Ana, si nye Yudatɔwo ƒe nunɔlagã tsã si gakpɔ ŋusẽ le dunyahenyawo me la “ƒo Sanhedrin [Yudatɔwo ƒe Ʋɔnudrɔ̃ƒe Kɔkɔtɔ] la ƒe ʋɔnudrɔ̃lawo nu ƒu, eye wòna wokplɔ ŋutsu aɖe si ŋkɔe nye Yakobo, Yesu si woyɔna be Kristo la nɔvi va wo ŋkume.”—Jewish Antiquities, XX, 200.

• TALMUD LA

  Talmud la, si nye Yudatɔwo ƒe rabiwo ƒe se siwo wogblɔ kple nu siwo nu woƒo ƒu tso ƒe alafa etɔ̃lia va se ɖe alafa adelia Kristotɔwo Ŋɔli la ɖee fia be Yesu ƒe futɔwo gɔ̃ hã lɔ̃ ɖe edzi be enɔ anyi kpɔ. Agbalẽa ƒe akpa aɖe gblɔ be: “Le Ŋutitotoŋkekenyuia ɖuɣi la, wohe Yeshu [Yesu] Nazaretetɔ la ɖe ati ŋu;” eye ŋutinyawo ɖo kpe esia dzi. (Babilontɔwo Ƒe Talmud, Sanhedrin 43a, Munich Blemasinuŋɔŋlɔgbalẽ; kpɔ Yohanes 19:14-16.) Agbalẽa ƒe akpa bubu gblɔ be: “Megadzɔ be míadzi vi aɖe alo sukuvi aɖe si ava do ŋukpe eɖokui le gaglãgbe abe Nazaretetɔ,” si nye dzesideŋkɔ si woyɔna na Yesu la ene o.—Babilontɔwo Ƒe Talmud, Berakoth 17b, etenuŋɔŋlɔ, Munich blemasinuŋɔŋlɔgbalẽ; kpɔ Luke 18:37.

Nyanyuigbalẽawo ƒo nu tso Yesu ƒe agbenɔnɔ kple eƒe subɔsubɔdɔa ŋu hekpe ɖe amewo, teƒewo kple ɣeyiɣiwo ŋu tsitotsito, eye esiawo nyea ŋutinya si nye nyateƒe ƒe dzesi. Eƒe kpɔɖeŋu aɖe le Luka 3:1, 2 si kpe ɖe mía ŋu míenya ɣeyiɣi si tututu ame si woyɔ be Yohanes Amenyrɔɖetsimela, ame si ta mɔ na Yesu la dze eƒe dɔwo gɔme.

Luka gblɔ be: “Le Kaisaro Tiberio ƒe fiaɖuɖu ƒe ƒe wuiatɔ̃lia me, esime Pontio Pilato nye nutodziɖula le Yudea, eye Herodes nye Galilea nutoa dzi ɖula, nɔvia Filipo nye Iturea kple Trakoniti nutoawo dzi ɖula, eye Lisania nye Abilene nutoa dzi ɖula, le Kayafa kple nunɔlagã Ana ŋɔli la, Mawu ƒe gbe va na Yohanes, Zakariya vi, le gbedadaƒo.” Ale si wòƒo nu tso ame siawo ŋu tsitotsito le ɖoɖo nu kpe ɖe mía ŋu míenya be “Mawu ƒe gbe va na Yohanes” le ƒe 29 K.Ŋ.

 Ŋutinyaŋlɔlawo nya dziɖula adre siawo siwo ŋkɔ Luka yɔ la nyuie. Wogblɔ be ɣeaɖeɣi la ɖikelawo ke ɖi le Pontio Pilato kple Lisania ƒe anyinɔnɔ ŋu. Gake ame siawo tre dzodzo na ʋu gã. Wova ke ɖe blemanuŋɔŋlɔ aɖewo siwo dzi dziɖula eve siawo ƒe ŋkɔwo dze le la ŋu si ɖo kpe Luka ƒe nuŋlɔɖia ƒe nyateƒenyenye dzi. *

Yesu ƒe anyinɔnɔ le vevie elabena eƒe nufiafiawo ɖea vi. Le kpɔɖeŋu me, Yesu fia ale si amewo anɔ agbe akpɔ dzidzɔ kple dzidzeme la wo. * Azɔ hã, edo ŋugbe be ɣeyiɣi aɖe ava si me amegbetɔwo anɔ agbe le ŋutifafa kple dedienɔnɔ me, eye woawɔ ɖeka le xexea me katã ƒe dziɖuɖu si nye ‘Mawu Fiaɖuƒea’ te.—Luka 4:43.

Dzesideŋkɔ “Mawu Fiaɖuƒe” la sɔ elabena Mawu ƒe dziɖuɖu sia aɖu anyigba bliboa dzi. (Nyaɖeɖefia 11:15) Yesu na nya sia me kɔ esi wògblɔ le eƒe kpɔɖeŋugbedodoɖaa me be: “Mía Fofo si le dziƒowo, . . . wò Fiaɖuƒe nava. Wò lɔlɔ̃nu nava eme le anyigba dzi.” (Mateo 6:9, 10) Nu kae Fiaɖuƒea awɔ na amegbetɔwo? De ŋugble tso nya siwo gbɔna ŋu kpɔ:

• Aʋawɔwɔ kple dukɔmeviwo ƒe masɔmasɔwo nu ayi.—Psalmo 46:8-11.

• Nu vɔ̃ɖi wɔwɔ, siwo dome ŋukeklẽ kple ametafatafa le nu ayi tegbee eye ame siwo mevɔ̃a Mawu o hã nu ayi.—Psalmo 37:10, 11.

• Fiaɖuƒea teviwo awɔ dɔ gbagbe siwo aɖe vi na wo.—Yesaya 65:21, 22.

• Anyigbaa aɖɔ ɖo eye wòawɔ nu ale be nuɖuɖu nabɔ.—Psalmo 72:16; Yesaya 11:9.

Ame aɖewo abu ŋugbedodo siawo nya dzodzrowo. Ke ɖe menye nu dzodzro be woaɖo ŋu ɖe amegbetɔwo ƒe agbagbadzedzewo ŋu oa? Bu nya sia ŋu kpɔ: Togbɔ be woyi ŋgɔ ŋutɔ le Agbalẽsrɔ̃nyawo, dzɔdzɔmeŋutinunya kple mɔ̃ɖaŋununya me hã la, ame miliɔn gbogbo aɖewo tsia dzi elabena womenya nu si adzɔ le etsɔme o. Eye gbe sia gbe la míekpɔnɛ be ganyawo kple dunyahenyawo le gbegblẽm ɖe edzi eye subɔsubɔhawo ƒe ameteteɖeanyi, ŋukeklẽ kple nu fitifiti wɔwɔ hã le dzidzim ɖe edzi. Nyateƒeae nye be amegbetɔwo ƒe dziɖuɖu do kpo nu keŋkeŋ!—Nyagblɔla 8:9.

Ðe nu siwo me míedzro la meɖo kpe edzi be Yesu nɔ anyi kpɔ oa? * Wogblɔ le 2 Korintotɔwo 1:19, 20 be: “Aleke gbegbee Mawu ƒe ŋugbedodowo ɖasɔ gbɔe o, wo katã nye “ɛ̃” to [Kristo] dzi.”