AƑENƆ Soo-jeong, si nye sekɛndrisuku (lycée) aɖe ƒe aɖaŋuɖola le South Korea zãa video siwo le jw.org nyatakakadiƒea tsɔ fiaa nu eƒe sukuviwo. Egblɔ be: “Sukuviawo kpɔ dzidzɔ ɖe video si nye Ame Kae Nye Xɔlɔ̃ Vavã? ŋu ale gbegbe! Esi wokpɔ videoa vɔ la, wo dometɔ ɖe sia ɖe gblɔ be, ‘Nyemebu xɔlɔ̃dzedze ŋu alea kpɔ o! Nu yeye kurae wònye!’ Wo dometɔ aɖewo gblɔ be yewoayi nyatakakadiƒe sia ɣesiaɣi si yewohiã aɖaŋuɖoɖo.” Aƒenɔ Soo-jeong gblɔ kpee be: “Mekafu videoa na ame geɖe siwo nye aɖaŋuɖolawo abe nye ke ene eye dzi dzɔ wo be dɔwɔnu nyui sia li yewoate ŋu azã atsɔ afia nu yewoƒe sukuviwo.”

Video bubu si kpe ɖe sukuvi geɖe siwo le South Korea ŋue nye nutata ƒe video si nye Nɔ Te Ðe Anyrawɔlawo Nu Kɔmadamadae. Nufiala aɖe si fiaa nu le dɔwɔƒe si kpɔa ɖeviwo ƒe ŋutasẽnuwɔwɔwo kple wo nu léle ƒe nyawo gbɔ ɖee fia sukuvi aɖewo. Nufialaa gblɔ be, “ale si wotrɔ asi le videoa me nutatawo ŋu wonya kpɔ la wɔ dɔ ɖe sɔhɛ geɖe dzi. Azɔ hã, videoa nyo elabena menye mɔ siwo nu woato anɔ te ɖe ŋutasesẽ nu koe wòfia o, efia mɔ siwo dzi woato aƒo asa nɛ hã.” Dɔwɔƒea bia be woaɖe mɔ na yewo yewoazã videoa atsɔ afia nu le gɔmedzesukuwo kple titinasukuwo me. Eye woɖe mɔ na wo. Kpovitɔwo gɔ̃ hã le video siwo le jw.org la zãm.

Ne mèyi míaƒe nyatakakadiƒea haɖe o la, ke anyo be nàyi. Nyatakakadiƒea ʋuʋu le bɔbɔe, eye àte ŋu awɔ odio kple video, Biblia kple agbalẽwo ƒe kɔpiwo femaxee.