Èdi be Yeanɔ Xexe si me Vɔvɔ̃ Mele O Mea?

“‘Esi afɔku manyatalenu aɖe . . . ate ŋu adze mía dzi le nɔnɔme ɖesiaɖe me kaklã manamanae ta la,’ míele ‘ŋudzɔ vevie le mía ɖokui ŋu ɣesiaɣi . . . evɔ wɔna aɖeke mele mía ŋu hã o.’”

NYA siawo siwo dze le Newsweek magazine me le ƒe si va yi me la ɖe alesi ame geɖe siwo le egbexexe si me tɔtɔ le me sena le wo ɖokui me fia. Yesu Kristo gblɔ be seselelãme mawo tɔgbe nu ate ŋu asẽ le ɣeyiɣi siwo gbɔna kpuie me. Egblɔ ɣeyiɣi si me dukɔwo latsi dzodzodzoe ale gbegbe be womanya nusi woawɔ o eye amewo ƒe gbɔgbɔ nu latsi le vɔvɔ̃ kple mɔkpɔkpɔ na nusiwo le anyigba blibo la katã dzi vam la ŋuti. Gake mele be vɔvɔ̃ naɖo míawo ya o, elabena Yesu gblɔ kpe ɖe eŋu be: “Ne nusiawo de asi emevava me la, ekema miwu mo dzi, eye mikɔ miaƒe tawo ɖe dzi, elabena miaƒe ɖeɖe la gogo.”—Luka 21:25-28.

Esime Yehowa Mawu le nɔnɔme si me eƒe amewo anɔ le wo ɖeɖe vɔ megbe ɖɔm la, egblɔ be: “Nye dukɔ anɔ ŋutifafa teƒe kple dziɖeɖi teƒewo kpakple ablɔɖe gbɔɖemeƒewo.” (Yesaya 32:18) Yehowa to eƒe nyagblɔɖila Mixa dzi gblɔ be: “Wo dome amesiame abɔbɔ nɔ anyi ɖe eƒe weinka kple eƒe gboti te bɔkɔɔ.”—Mixa 4:4.

Aleke gbegbe nɔnɔme ma to vovo na esi li egbea enye si! Afɔku manyatalenu aɖeke mado vɔvɔ̃ na ameƒomea o. Le esi míanɔ ŋudzɔ vevie le mía ɖokui ŋu ɣesiaɣi evɔ wɔna aɖeke manɔ mía ŋu o teƒe la, ŋutifafa kple dzidzɔ si nu mayi o axɔ aƒe ɖi.