“Minɔ Ŋudzɔ”

LE BLEMA la, agbonudzɔlawo nɔa duwo kple gbedoxɔwo ƒe mɔ nu eye, le teƒe aɖewo la, wonɔa amewo ƒe aƒewo nu. Tsɔ kpe ɖe egbɔkpɔkpɔ be agboawo le tutu le zãme ŋu la, agbonudzɔlawo nyea zãdzɔlawo hã. Esia nye dɔ gã aɖe, elabena dua ƒe dedienɔnɔ nɔ te ɖe woƒe nyanyanana duametɔwo be afɔku aɖe gbɔna dzi.

Yesu Kristo nya nu tso agbonudzɔlawo, siwo wogayɔna be xɔnuviwo, ƒe dɔa ŋu. Ɣeaɖeɣi la, etsɔ eƒe nusrɔ̃lawo sɔ kple xɔnuviwo hede dzi ƒo na wo be woanɔ ŋudzɔ ɖe Yudatɔwo ƒe nuɖoanyia ƒe nuwuwu si gbɔna ŋu. Egblɔ be: “Mikpɔ nyuie, eye minɔ ŋudzɔ; elabena mienya ɣekaɣi azãgbe la le edzi su ge o. Ele abe ame aɖe, si yi nugbe, egblẽ eƒe aƒe ɖi, eye . . . wòde se na xɔnuvi la bena, wòanɔ ŋudzɔ la ene. Azɔ la minɔ ŋudzɔ. Elabena mienya ɣekaɣi dzi Aƒetɔ la le vava ge o.”—Marko 13:33-35.

Nenema kee, ƒe 125 kple edzivɔwo enye sia si, Gbetakpɔxɔ magazine sia le Yesu ƒe nuxlɔ̃amenya sia gblɔm be “minɔ ŋudzɔ.” Le mɔ ka nu? Abe alesi wogblɔe ɖe magazine sia ƒe axa 2 lia ene la, “Eléa ŋku ɖe xexeame ƒe nudzɔdzɔwo ŋu, le esi nudzɔdzɔawo na Biblia ƒe nyagblɔɖi le eme vam ta. Efaa akɔ na amewo katã kple nyanyui la be, eteƒe madidi o Mawu ƒe Fiaɖuƒe atsrɔ̃ amesiwo katã tea wo haviwo ɖe anyi la, eye wòatrɔ anyigba la wòazu paradiso.” Gbetakpɔxɔ, ɖekaɖeka 26,000,000 kple edzivɔ si wotana ɖe gbegbɔgblɔ 150 me lae nye subɔsubɔ magazine si womana wu le xexeame. Yehowa Ðasefowo to edzi le dzi dem ƒo na amewo le afisiafi, be ‘woanɔ ŋudzɔ’ le gbɔgbɔ me, abe alesi blema agbonudzɔlawo wɔe ene, elabena Yesu Kristo, Aƒetɔ la, le vava ge kpuie ava drɔ̃ ʋɔnu nuɖoanyi sia.—Marko 13:26, 37.