ALEKE nàse le ɖokuiwò me ne wobu fɔ wò ɖe nu vlo aɖe si mèwɔ o la ta? Ke ne nu vlo si wobe nèwɔ la he fukpekpe va ame geɖe, siwo dome ame maɖifɔwo hã le dzi ya ɖe? Àdi godoo be yeakɔ yeƒe ŋkɔ ŋu! Ke ènya be aleae nɔnɔmea le le Yehowa hã gomea? Egbea, ame geɖe bua fɔ Mawu vodadatɔe ɖe nu madzɔmadzɔ wɔwɔ kple fukpekpe si xɔ aƒe ɖe xexe sia me la ta. Ðe Yehowa tsɔ ɖe le eƒe ŋkɔa ŋu kɔkɔ mea? Etsɔ ɖe le eme ŋutɔ! Bu nya si Xezekiel ƒe agbalẽa gblɔ ŋu kpɔ.—Xlẽ Xezekiel 39:7.

Yehowa gblɔ be: “Nyemana woagado gu nye ŋkɔ kɔkɔe la azɔ o.” Amewo ƒoa ɖi Yehowa ƒe ŋkɔ nenye be wobu fɔe ɖe nu madzɔmadzɔ wɔwɔwo ta. Le mɔ ka nu? Le Biblia me la, “ŋkɔ” tsia tre ɖi na bubu si le ame ŋu zi geɖe. Numekugbalẽ aɖe gblɔ be Mawu ƒe ŋkɔ le tsitre ɖi na “nu si amewo nya tso eŋu, alo ale si wòɖe eɖokui fiae; egafia ale si wòxɔ ŋkɔe, kple bubu si le eŋu.” Yehowa ƒe ŋkɔ fia ale si amewo bunɛ hã. Nu kae míenya tso Yehowa ŋu ku ɖe ale si wòbua nu madzɔmadzɔ wɔwɔ ŋu? Elé fui! Eye esea veve ɖe ame siwo ŋu wowɔnɛ ɖo la hã nu. a (2 Mose 22:21-23) Ne amewo bu fɔ Mawu be ewɔ nu si eya ŋutɔ lé fui la, ke wole ɖi ƒom eƒe ŋkɔ, si fia be wole “alɔme ɖem le [eƒe] ŋkɔ ŋu.”—Psalmo 74:10.

De dzesii be zi evee Yehowa gblɔ be “nye ŋkɔ kɔkɔe la.” (Kpukpui 7) Woyɔ nya “kɔkɔe” kple “kɔkɔenyenye” tsɔ tɔ ɖe Yehowa ƒe ŋkɔ ŋu zi geɖe le Biblia me. Nya “kɔkɔe” fia nu si woɖe ɖe vovo; egafia nu si dza, si ŋu ɖiƒoƒo mele o hã. Yehowa ƒe ŋkɔ le kɔkɔe, elabena Mawu si tɔ ŋkɔ ma le kɔkɔe, si fia be eɖe eɖokui ɖe aga tso nu vɔ̃ kple nu makɔmakɔ ɖe sia ɖe gbɔ keŋkeŋ. Eya ta èkpɔ vlodoame gã si gbegbe ame siwo bua fɔ Yehowa ɖe vɔ̃ɖinyenye ta la le hehem va eƒe “ŋkɔ kɔkɔe” la dzia?

Tame si Yehowa ɖo be yeakɔ yeƒe ŋkɔ ŋu to yeƒe Fiaɖuƒea dzi lae nye nyati vevi si ŋu Biblia ƒo nu tsoe. Wote gbe ɖe nyati sia dzi le Xezekiel ƒe agbalẽa, si me wogblɔ le zi geɖe be “dukɔwo adze sii bena, nyee nye Yehowa” la me. (Xezekiel 36:23; 37:28; 38:23; 39:7) De dzesii be menye dukɔwo ŋutɔwoe atiae nenye be yewoadze si Yehowa loo alo yewomadze sii o. Ke boŋ ‘woadze sii.’ Ne míagblɔe bubui la, Yehowa ɖoe be yeaɖe afɔ si aƒoe ɖe anyigba dzi dukɔwo nu woadze sii be ame si yebe yenye lae yenye—si nye be eyae nye Yehowa, Aƒetɔ Dziɖulagã, ame si ƒe ŋkɔ ɖenɛ fiana be ele kɔkɔe, dzadzɛ, eye ɖiƒoƒo aɖeke mele eŋu o.

Ŋugbe si Mawu do enuenu be yeana ‘dukɔwo nadze sii be, yee nye Yehowa’ la nye nya nyui na ame siwo le mɔ kpɔm vevie be nu madzɔmadzɔ wɔwɔ kple fukpekpe nu nayi. Yehowa awɔ ŋugbedodo sia dzi kpuie ahakɔ eƒe ŋkɔ si wodo vloe la ŋu. Aɖe vɔ̃ɖinyenye kpakple ame siwo donɛ ɖe ŋgɔ la ɖa, gake akpɔ ame siwo dea asixɔxɔ kple bubu eƒe ŋkɔa kpakple nu si wòle tsitre ɖi na ŋu la ƒe agbe ta. (Lododowo 18:10) Ðe esia meʋã wò be nàsrɔ̃ nu tso ale si nàwɔ ate ɖe Yehowa, Mawu kɔkɔe si “lɔ̃a nya dzɔdzɔe” la ŋu geɖe wu oa?—Psalmo 37:9-11, 28.