Ƒe sia ƒe la, papa la kple subɔsubɔhakplɔla bubuwo gblɔa ŋutifafagbedeasiwo henɔa mɔ kpɔm be mawudɔlaa ƒe gbeƒãɖeɖe sia nava eme le Kristmas ɖuɣia: “Ŋutifafa nanɔ ame siwo ŋu wòkpɔa ŋudzedze ɖo la dome le anyigba dzi.” Ame aɖewo zɔa mɔ yia tadeaguƒe tɔxɛwo ɖe Kristmas ɖuɖu ta.

Ne ŋutifafa va le Kristmas ɖuɣi gɔ̃ hã la, menɔa anyi wòdidina o. Le kpɔɖeŋu me, le December 1914 me, esime Europa dukɔwo nɔ aʋa wɔm vevie le Xexemeʋa I me la, Britain kple Germany-srafowo do tso woƒe bebeƒewo va ɖu Kristmas ɖekae. Wona nuɖuɖu, aha kple atama wo nɔewo. Woƒo bɔl ɖekae gɔ̃ hã. Ke hã, ŋutifafa ma menɔ anyi eteƒe didi o. Britain-srafo aɖe gblɔ le lɛta aɖe si wòŋlɔ esime wònɔ aʋaa ƒe sesẽaƒe la me be Germany-srafo aɖe gblɔ na ye be: “Egbea, míele ŋutifafa me. Gake etsɔ la àwɔ aʋa na wò dukɔ, eye nye hã mawɔ aʋa na tɔnye.”

“Wodzi vi na mí . . . Wotsɔ ŋkɔ nɛ be . . . Ŋutifafafia, ne eƒe dziɖuɖu nakeke ta, eye seƒeɖo manɔe na ŋutifafa [o].” (Yesaya 9:5, 6) Aleke gbegbe Yesu Kristo ŋuti nyagblɔɖi ma faa akɔ na amee nye esi! Menye ɖe wodzi Yesu ɖe anyigba dzi be wòana ŋutifafa nanɔ anyi le ŋkeke ɖeka ko dzi ƒe sia ƒe o. Esi wònye Dziɖula le dziƒo ta la, ana ŋutifafa vavãtɔ naxɔ aƒe ɖi tegbee.

“Miato [nye Yesu dzi] akpɔ ŋutifafa. Le xexea me la, miele xaxawo me tom, gake milé dzi ɖe ƒo! Meɖu xexea dzi.” (Yohanes 16:33) Egbea gɔ̃ hã la, Yesu le kpekpem ɖe eyomedzelawo ŋu be woanɔ anyi le ŋutifafa me. Ele eme be Kristotɔwo kpɔa xaxa ya. Gake dzidzɔtɔe la, Biblia na wonya nu si tae fukpekpe li kple ale si Yesu ava he ŋutifafa mavɔ vɛ. Eya ta wokpɔa dzidzeme.

Esi Yehowa Ðasefowo wɔa Yesu ƒe nyawo dzi ta la, wole ŋutifafa me kple wo nɔewo egbea gɔ̃ hã, metsɔ le eme dukɔ alo to si me wotso, gbe si wodona alo ŋutigbalẽ ƒe amadede si le wo ŋu o. Míele kpewòm be nàva kpɔ esia teƒe le kpekpe si wowɔna le Fiaɖuƒe Akpata me. Abe ale si wòle le ame bubu geɖewo gome ene la, ɖewohĩ wò hã àva lɔ̃ ɖe edzi be ŋutifafa sia ƒo Kristmas ɖuɣi ƒe ŋutifafa ɖe sia ɖe ta.