Le Mexico Kple Titina Amerika la, gbegɔmeɖela 290 siwo le dukɔ ade me la ɖea Biblia-srɔ̃gbalẽwo kple nu bubuwo gɔme ɖe gbegbɔgblɔ 60 kple edzivɔ me. Nu ka tae wole kutri kum nenema gbegbe ɖo? Elabe ne amewo xɔ Biblia-srɔ̃gbalẽ siwo le gbe aɖe si gɔme woate ŋu ase bɔbɔe me la, edea dzi gbɔ na wo wu.​—1 Korintotɔwo 14:9.

Woɖe gbegɔmeɖela siwo nɔ dɔ wɔm le Yehowa Ðasefowo ƒe alɔdzedɔwɔƒe si le Mexico City la dometɔ aɖewo yi nuto siwo me wodoa gbe siwo gɔme woɖena le la me ale be woƒe gbegɔmeɖeɖedɔa naganyo ɖe edzi. Vi kae esia ɖe? Gbegɔmeɖelawo va le gbe siwo gɔme woɖena la dolawo dome, eye esia na be woƒe agbalẽwo kple nu bubu siwo gɔme woɖena la gɔme sese va le bɔbɔe na gbeawo dolawo wu.

Aleke gbegɔmeɖelawo se le wo ɖokuiwo me ku ɖe tɔtrɔ siawo ŋu? Federico, si nye gbe si woyɔna be Guerrero Nahuatl gɔme ɖela, gblɔ be: “Le ƒe ewo kloe siwo metsɔ nɔ Mexico City me la, ƒome ɖeka pɛ ko menya si doa mía degbea. Gake le afi sia la, ame siwo katã le nuto siwo ƒo xlã míaƒe gbegɔmeɖeƒea me la katã kloe doa mía degbea!”

Karin, si ɖea Low German gbe gɔme le du si ŋkɔe nye Chihuahua le Mexico me la gblɔ be: “Esi míeva le Mennotɔwo dome le afi sia la, ena be metea ŋu nyana ale si mía degbea le tɔtrɔm tso ŋkeke yi ŋkekee. Míele du sue sia me eye míewɔa dɔ le du sia me. Ne mele nu kpɔm to fesre nu la, metea ŋu kpɔa ame siwo dɔ si wɔm míele le afi sia la aɖe vi na.”

Neyfi, si le gbegɔmeɖeƒe fifia le Mérida si le Mexico gblɔ be: “Ne míele Biblia srɔ̃m kple amewo le Mayagbe me la, míeva dea dzesi nya siwo gɔme sese sesẽna na Mayatɔwo. Esia wɔnɛ be míedia mɔ siwo dzi míato aɖe nya mawo gɔme wo gɔme sese nanɔ bɔbɔe na wo wu.”

Vi kae esia ɖe na ame siwo wɔa agbalẽ kple nu bubu siwo gɔme míeɖena la ŋu dɔ? Kpɔ eƒe kpɔɖeŋu ɖeka pɛ ko ɖa: Elena, si ƒe degbee nye Tlapanec dea Yehowa Ðasefowo ƒe kpekpewo edziedzi anɔ abe ƒe 40 sɔŋ ene. Gake esi wònye be Spaingbe mee wowɔa kpekpeawo le ta la, mesea naneke gɔme o. Egblɔ be: “Esi menya be ehiã be made kpekpeawo ta koe medena ɖo.” Gake esi wova zã Tlapanec-gbe me agbalẽ gbadzawo tsɔ srɔ̃ Biblia kple Elena la, eƒe lɔlɔ̃ na Mawu va de to ɖe edzi ale gbegbe be eɖe adzɔgbe nɛ eye wòxɔ nyɔnyrɔ le ƒe 2013 me. Elena gblɔ be: “Meda akpe na Yehowa be ena meva se Biblia gɔme.”