Yehowa Ðasefowo dea asixɔxɔ gã aɖe Biblia ŋu wu agbalẽ ɖe sia ɖe. Wosrɔ̃nɛ edziedzi eye wozãnɛ tsɔ fiaa nu amewo tso Mawu Fiaɖuƒea ŋu. (Mateo 24:14) Esiawo katã wɔnɛ be woƒe Bibliawo doa xoxo kaba. Eya tae Yehowa Ðasefowo dze agbagba ɖe sia ɖe be Ŋɔŋlɔ Kɔkɔeawo—Xexe Yeye Gɔmeɖeɖe Biblia si me wogbugbɔ to le ƒe 2013 me la nanya kpɔ eye wòanɔ anyi eteƒe nadidi.

Ele be ŋusẽ nanɔ Biblia yeye sia ŋu. Esi Yehowa Ðasefowo ƒe agbalẽtala siwo le Wallkill si le New York le Amerika la ƒe teƒenɔlawo dzro ale si wodi be yewoawɔ Biblia sia la me kple agbalẽblaƒe aɖe ƒe amegã la, egblɔ na wo be, “Biblia si dim miele la manya wɔ o.” Egblɔ kpee be, “Enye nyateƒe wɔblanui be ɖeko wowɔa Biblia akpa gãtɔ be woanya kpɔ le kɔfinokplɔ̃ dzi alo agbalẽti me, gake womewɔnɛ ŋusẽ nɔa wo ŋu be woanɔ anyi eteƒe nadidi o.”

Xexe Yeye Gɔmeɖeɖe si míewɔ va yi la dometɔ aɖewo mete ŋu do dzi o. Ɣeaɖewoɣi la, ɖeko woɖena ɖekaɖeka le teƒe siwo yame xɔa dzo gbãgbãgbã le. Ame siwo wɔa dɔ le agbalẽtaƒea da nu siwo wotsɔ wɔa agbalẽkpa geɖewo, nutreŋɔ geɖewo kple agbalẽblamɔnu vovovowo kpɔ ale be woate ŋu abla Biblia si ate ŋu ado dzi le yame ƒe nɔnɔme vovovowo me. Le nu siwo ŋu woke ɖo nu la, wowɔ Biblia vovovowo be woado wo kpɔ eye wotsɔ wo na Ðasefo siwo le nuto xɔdzowo kple teƒe siwo fana miamiamia abe Alaska ene la me be woado wo kpɔ le yame ƒe nɔnɔme vovovo mawo me.

Le ɣleti ade megbe la, ameawo gbugbɔ Bibliaawo vɛ ale be woalé ŋku ɖe wo ŋu. Ame siwo wɔa dɔ le agbalẽtaƒea nɔ te ɖe nu siwo ŋu woke ɖo la dzi gatrɔ asi le Biblia ŋu eye wogaɖo wo ɖa be woado wo kpɔ. Biblia siwo katã wodo kpɔ la le 1,697. Ame ʋɛ aɖewo gɔ̃ hã melé be nɛ tututu o. Le kpɔɖeŋu me, wogblẽ Biblia ɖeka ɖi tsi ƒo le zã me. Bubu hã ge ɖe tɔɖɔɖɔ aɖe me esi ahom tu. Nu siwo ŋu woke ɖo le dodokpɔ siwo wowɔ le teƒe vovovoawo kple ale si woɖe ŋu ɖi gblẽ Biblia ɖi tsi ƒo la me na wosrɔ̃ nu vevi aɖewo tso ale si woawɔ Biblia sia wòado dzi wu la ŋu.

Le ƒe 2011 me esime wonɔ Biblia siawo dom kpɔ le teƒeteƒewo la, Ðasefoawo ƒle agbalẽblamɔ̃ deŋgɔwo da ɖe woƒe agbalẽtaƒewo le Wallkill kple Ebina le Japan. Míaƒe taɖodzinue nye be woata Biblia wòasɔ gbɔ eye esiwo woata le teƒe eveawo siaa nasɔ kple wo nɔewo pɛpɛpɛ.

Le ƒe 2012 ƒe gɔmedzedze la, agbalẽtaƒe eveawo dze akpa yeye si wotsɔ nutreŋɔ ƒomevi aɖe wɔ la dede na Xexe Yeye Gɔmeɖeɖe Biblia xoxotɔa, woƒe amadede le yibɔ kple dzĩ tɔgbi. Ke hã womedo nutreŋɔ kple akpawɔnu siwo le agbalẽblamɔ̃ yeyeawo me la ya kpɔ le teƒeteƒewo o, eye esi wotsɔ wo wɔ akpa de Biblia ŋu la, akpaa ŋlɔna ŋutɔ. Agbagba siwo wodze le gɔmedzedzea me be woakpɔ nɔnɔmea gbɔ medze edzi o, esia wɔe be wodzudzɔ dɔa.

Ame siwo wɔ akpawɔnu siawo dometɔ ɖeka gblɔ be yewonyae nyuie be akpa siwo metri o la ŋlɔna, eye asesẽ ŋutɔ be woakpɔ ta na kuxi sia. Ke hã Ðasefoawo mena ta hegatrɔ ɖe akpa titriwo wɔwɔ ŋu o, woɖoe kplikpaa boŋ be yewoawɔ akpa bɔbɔe aɖe si anya kpɔ. Esi wodo Biblia siawo kpɔ dzinu etɔ̃ megbe eye wodo nutreŋɔ kple akpawɔnu vovovowo kpɔ vɔ megbe la, wova ke ɖe nutreŋɔ kple akpawɔnu tsakatsaka nyui aɖe ŋu. Esia wɔe be wogadze dɔa gɔme. Fifia wote ŋu ta Biblia si ƒe akpa megale ŋɔŋlɔm o.

Le September 2012 me la, wobia tso agbalẽtaƒeawo si be woadzudzɔ Biblia xoxotɔawo tata, woama wo katã vɔ, eye woalala ɣeyiɣi nade be woadze Xexe Yeye Gɔmeɖeɖe Biblia si me wogbugbɔ to le ƒe 2013 me la tata gɔme. Woɖe Biblia yeye sia ɖe go le Gbetakpɔxɔ Biblia Kple Trakt Habɔbɔa ƒe ƒe sia ƒe takpekpea me le October 5, 2013 dzi.

Woɖo Biblia yeyea ƒe nuŋlɔɖi siwo le mɔ̃ dzi ɖe agbalẽtaƒeawo le Fiɖa, August 9, 2013 eye wodze Bibliaa tata gɔme le ŋufɔke. Wota Biblia blibo gbãtɔ le August 15 dzi. Le kwasiɖa adre siwo kplɔe ɖo me la, agbalẽtala siwo le Wallkill kple Ebina wɔ dɔ zã kple keli ta Biblia 1,600,000 hede ʋu ɖo ɖe teƒeteƒewo, eye esia wɔe be ame siwo katã kpɔ gome le ƒe sia ƒe ƒe takpekpea me dometɔ ɖe sia ɖe te ŋu xɔ Biblia ɖeka.

Enye nyateƒe be Biblia yeye sia nya kpɔ ŋutɔ eye wotrɔ asi le eŋu be wòanɔ anyi eteƒe nadidi, gake agbenya si le eme la ya gaxɔ asi wu gɔ̃ hã. Nyɔnu aɖe si le United States ŋlɔ le gbe si gbe wòxɔ Biblia ƒe ŋufɔke bena: “Biblia yeye sia na mele Biblia me nyawo gɔme sem nyuie wu.”