Ntiense Jehovah kiet emi ekerede Danielle ke South Africa, ama okụt ekpat emi owo ekefrede ke itie un̄wọn̄ coffee. Enye ama ese esịt ekpat oro onyụn̄ okụt wallet ye okụk ye kad ATM ke esịt ekpat oro. Ama ọdọn̄ enye ndikpọn̄ ekpat oro nnọ andinyene; enye ama asuan esịt ekpat oro ese m̀mê oyokụt adress m̀mê fon nọmba, edi enyịn̄ kpọt ke enye okokụt. Enye ama ọdọhọ Ban̄k ẹn̄wam imọ ẹkot ete enyene ekpat oro edi ufọn ikodụhe. Enye ama okot fon nọmba emi ẹkewetde ke risit ufọkibọk, emi enye okokụtde ke ekpat oro. Owo ufọkibọk oro ama ọbọrọ fon oro onyụn̄ ọdọhọ Danielle ke iyọnọ ete oro nọmba esie.

 Idem ama akpa ete enyene ekpat oro ini dọkta esie okotde enye ọdọhọ ke Danielle ama okụt ekpat, ke koyom usụn̄ nte edisan̄ade ikpọn̄ ekpat oro inọ enye. Ini ete oro akade ndibọ ekpat oro, ete Danielle ye Danielle ẹma ẹdara enye. Mmọ ẹma ẹtịn̄ se ikanamde mmọ ẹyom usụn̄ nte ẹkekeme ndikpọn̄ ekpat oro nnọ enye. Mmọ ẹma ẹnam enye ọfiọk ke mmimọ idi Ntiense Jehovah, ke isima ndinam se Bible ọdọhọde. Ke oro onyụn̄ anam mmimọ isidomo ndinam akpanikọ kpukpru ini.—Mme Hebrew 13:18.

 Ke hour ifan̄ ama ekebe, ete oro ama ọnọ Danielle ye ete esie etop, afiak ọkọm mmọ ke se mmọ ẹkenamde oro. Enye ama ewet ete: “Ẹma ẹnam etieti ke ofụri ufen emi ẹkebọde ẹyom mi. Esịt ama enem mi etieti ini n̄kokụtde fi ye ubon mbufo, ndifreke nte mbufo ẹkenamde n̄kpọ ye ami nte ata ufan. Mmọn̄ nyom n̄kpọ nnọ fi sia se ẹkenamde oro enen̄ede enem mi. Mmọdiọn̄ọ ke ẹmesinyịme n̄kpọ atak mbufo man ẹnọ Abasi mbufo ubọn̄. Se Danielle akanamde oro owụt ke mbufo ẹdi ata nti owo, emi ẹsinamde akpanikọ. Mbọk ẹsọsọn̄ọ ata etieti, yak Abasi ọdiọn̄ mbufo onyụn̄ an̄wam mbufo ẹka iso ke utom esie.”

 Ke ọfiọn̄ ifan̄ ama ekebe, ete Danielle ama afiak okụt ete oro, ete oro ama onyụn̄ etịn̄ se iketịbede, ekpri ini emi osụk ebede, ke ini enye okonyụn̄ ọfiọhọde ekpri ekpatokụk owo. Ini ete oro okosụk edepde n̄kpọ ke ufọkurua kiet, enye ama okụt ekpri ekpatokụk owo ke isọn̄. Enye ama oyom mma enyene ekpat oro ọkpọn̄ ekpat oro ọnọ, onyụn̄ etịn̄ se ikanamde enye oyom mma oro. Enye ama ọdọhọ mma oro ke ukem se owo okonyụn̄ anamde ọnọ imọ edi oro ọfiọn̄ ifan̄ ko. Ete oro ọkọdọhọ ete: “Ekpri akpanikọ emi owo anamde ye mfọnido emi owo ọfọnde ekeme nditọn̄ọ ntre anam ediwak owo edi mbon akpanikọ, ndien emi ekeme ndinam uwem enem mme owo ke obio akan akpa.”