“Etie Nte Ata Nditọeka Ẹnịm Usọrọ.” Se n̄wedmbụk n̄kpọntịbe kiet ke Germany eketịn̄de aban̄a mbono Mme Ntiense Jehovah edi oro. Mbon emi ẹkedụkde mbono oro ẹnyịme ke ekedi ntre.

Karla emi okotode Puerto Rico okodụk mbono oro ọdọhọ ete: “Ẹma ẹkama mi tutu; ekebiet ndu ke ufọk!”

Sara okoto Australia okodụk mbono emi. Enye n̄ko ọdọhọ ete: “Eketie mi nte n̄ka ata anyan idụt n̄kese nditọeka mi.”

Nso ikanam mbono ofụri ererimbot emi enem mmọ ntre? Iyetịn̄. N̄kpọ nte owo 37,000 ẹma ẹto nsio nsio idụt ẹkedụk ata akamba mbono emi Mme Ntiense Jehovah ẹkenịmde ke an̄wambre kiet ke Frankfurt ke Germany, tọn̄ọ ke July 18 esịm July 20, 2014.

Mme owo ẹkeka mbono emi man ẹketie kiet ẹkpep Bible. Ẹma ẹkot Bible ndien ndien, ẹkwọ ikwọ, ẹbọn̄ akam, ẹnam drama iba, ẹnyụn̄ ẹda Bible ẹkwọrọ ikọ ẹban̄a nsio nsio n̄kpọ.

Mbon emi ẹketode Australia, Britain, Greece, Lebanon, Serbia, South Africa, ye United States ẹkedụk mbono emi ye nditọ Germany ẹma ẹbe owo 3,000. Mme Ntiense Jehovah 234 emi ẹkekpọn̄de obio mmọ ẹkekwọrọ ikọ ke nsio nsio idụt 70 ẹma ẹdidụk mbono emi.

Ẹma ẹda Intanet ẹnam mme owo ẹtie ke nsio nsio itie 19 ke Germany, ye mme ebiet en̄wen ke Austria ye Switzerland ẹse ndusụk n̄kpọ emi ẹkenamde ke itie oro ẹkenịmde mbono emi. Kpukpru mbon emi ẹkedụkde mbono oro ye mbon emi ẹkesede ke Intanet ekedi owo 204,046.

Ke Frankfurt, ẹkekwọrọ ikọ ke Ikọmbakara, German ye Greek. Edi ke mme ebiet en̄wen emi mme owo ẹkebonode ẹse se ikade iso, ẹma ẹkabade se ẹkenemede ke Arabic, Chinese, Tamil, Turkish, utọ usem inan iba, ye usem 11 en̄wen.

Kpa ye emi Mme Ntiense Jehovah emi ẹkedụkde mbono emi ẹsemde nsio nsio usem, ẹnyụn̄ ẹtode nsio nsio idụt, kpukpru mmọ ẹma ẹdiana kiet ke ima. (John 13:34, 35) Mmọ ẹkeda idemmọ nte ata nditọeka.

Tobias emi okotode Britain okodụk mbono oro ọdọhọ ete: “Akpa edi emi n̄kụtde ke Mme Ntiense Jehovah ke ofụri ererimbot ẹdi nditọeka.”

Davianna, emi okotode Puerto Rico okodụk mbono oro ọdọhọ ete: “Mma n̄kụt nditọete emi ẹtode n̄kpọ nte idụt 20. Se inamde nnyịn idianakiet ntem edi ima Abasi ye ima nditọete.”

Malcom okoto Australia okodụk mbono emi. Enye ọdọhọ ete: “N̄kakabade ndi Ntiense Jehovah ke ekpri obio-in̄wan̄ kiet. Mma nsikot ke nditọete nnyịn ẹdu ke kpukpru ebiet, nnyụn̄ nsisese ke vidio. Edi mmedikụt emi ke idem mi. Se n̄kesikotde enen̄ede an̄wan̄a mi ndien. Mbono emi anam mi nnen̄ede mbuọt idem ye Abasi.”

Mme Ntiense ke esop 58 ke Frankfurt ẹma ẹnam nsio nsio n̄kpọ emi mmọ ẹdinọde nditọete mmọ, ẹnyụn̄ ẹdiomi nditie ye mmọ ndusụk mbubreyo mbre mbre nnyụn̄ nnem idem esịt.

Cynthia, emi okotode United States okodụk mbono emi ọdọhọ ete: “Nditọete ẹma ẹkama mi tutu. Ndifreke nte mmọ ẹkewụtde ke imama nnyịn, nte mmọ ẹkefọnde ido, ẹkenyụn̄ ẹtatde ubọk.”

Eyenete emi ekerede Simon do ke Germany ọdọhọ ete: “Kpukpru owo ẹketie ima ima, ẹkama iso imam imam, idụhe eke ọbọpde iso. Idụhe eke mîkekpepke n̄kpọ ke itie oro.”

Amy okoto Australia okodụk mbono oro. Enye ọdọhọ ete: “Ama enem mi nditie ye Mme Ntiense eken mbre mbre ndusụk mbubreyo; nnyịn ikamake idem ke ufen. Imọdiọn̄ọ ndidia uwem—ndọhọke ndisịme emi mme owo ẹnanam mi ẹte idia uwem, ntịn̄ mban̄a n̄kpọ emi edide ama okụre esịt imiaha fi ufen.”

Idịghe ke Frankfurt kpọt ke ẹkenịm akamba mbono emi. Ẹma ẹnịm ke itie usụkkiet en̄wen ke nsio nsio idụt ke ererimbot.

Ke ini ẹkebụpde eyenete emi okodụkde mbono Frankfurt oro nte mbono eketiede, enye ọkọdọhọ ete: “Ekpetie fi didie ke idem edieke owo ekpefehede ediwan̄a fi ke itọn̄ ete ke idi eyeneka fo, afo eti ke ẹma ẹsidọhọ fi ke emenyene eyeneka ke idụt en̄wen, ekem enye ada fi aka ufọk esie ọkọnọ fi udia ye mme n̄kpọ eken? Imọdiọn̄ọ ke esịt ekpenen̄ede enem fi. Ekere ke ekpetie fi didie ke idem edieke owo 37,000 ẹkpenamde n̄kpọ ntem ye afo? Nte mbono Frankfurt eketiede edi oro.”