“Kûkop ndịk, koro ami ndude ye afo. Kûsuan enyịn, koro ami ndide Abasi fo. Ami nyọsọn̄ọ fi idem. Ami nditreke ndin̄wam fi. Ami nditreke ndida ubọk nnasia edinen ido mi nsọn̄ọ mmụm fi n̄kama.”—Isaiah 41:10, Edikabade Eke Obufa Ererimbot.

“Kudige, koro ami ndude ye afo: kunyek idem, koro ami ndide Abasi fo: nyesọŋọ fi idem; nditreke ndinyaŋa fi; nditreke ndimum fi ŋkama ke edinen ubọk nnasia mi.”—Isaiah 41:10, Edisana Ŋwed Abasi Ibom.

Jehovah * Abasi ọn̄wọn̄ọ ke imọ idikpọn̄ke nti ikọt imọ, inamke n̄kpọ m̀mê nso itịbe inọ mmọ.

“Koro mi ndude ye afo.” Jehovah anam ikọt esie ẹdiọn̄ọ ke ufọn idụhe mmọ ndikop ndịk—ke mmọ idụhe ikpọn̄. Sia edide enye esikop akam mmọ onyụn̄ okụt se itịbede inọ mmọ, etie nte n̄kpọ eke enye odude kiet ye mmọ.—Psalm 34:15; 1 Peter 3:12.

“Koro ami ndide Abasi fo.” Jehovah eti ikọt esie ke mmọ ẹsụk ẹdi ikọt imọ, imọ inyụn̄ idi Abasi mmọ; onyụn̄ anam esịt ana mmọ sụn̄. Ikọt esie ẹdiọn̄ọ ke idụhe se idikpande enye ndisio usụn̄ ubọhọ nnọ mmimọ.—Psalm 118:6; Rome 8:32; Mme Hebrew 13:6.

“Ami nyọsọn̄ọ fi idem. Ami nditreke ndin̄wam fi. Ami nditreke ndida ubọk nnasia edinen ido mi nsọn̄ọ mmụm fi n̄kama.” Ke itie emi, Jehovah etịn̄ ukem n̄kpọ ke nsio nsio usụn̄ man owụt ke tutu amama imọ idikpọn̄ke ikọt imọ. Ikọ esie enen̄ede owụt se enye esinamde ini ikọt esie ẹyomde un̄wam. Ke ini iduọ emende owo esie, Enye esisịn ubọk omụm owo oro yak enen̄ede ada.—Isaiah 41:13.

Ata akpan n̄kpọ kiet Abasi esidade ọsọn̄ọ ikọt esie idem onyụn̄ an̄wam mmọ edi Ikọ esie, Bible. (Joshua 1:8; Mme Hebrew 4:12) Ke uwụtn̄kpọ, Ikọ Abasi ọdọn̄ọ ata nti item emi esin̄wamde owo ke ini owo ebuenede, ọdọn̄ọde, m̀mê ke ini owo owo akpade. (Mme N̄ke 2:6, 7) Abasi esinyụn̄ ada edisana spirit esie ọdọn̄ ikọt esie esịt onyụn̄ ọnọ mmọ odudu ẹyọ.—Isaiah 40:29; Luke 11:13.

Ikọ itie Bible emi ama ọdọn̄ mme Jew esịt idem mbemiso ẹketan̄de mmọ ẹka Babylon. Jehovah ama ọdọhọ ke ama ekpere ini emi ẹdiyakde mme Jew ẹnyọn̄ọ ke Babylon, ke mme owo ẹyekop ẹtop andikara emi ọtọn̄ọde ndisobo nsio nsio idụt, onyụn̄ anamde idem enyek mme owo ke Babylon. (Isaiah 41:2-4; 44:1-4) Kpa ye oro ndịk edinamde Babylon ye mme idụt eken, ufọn ididụhe mme Jew ndikop ndịk sia Jehovah ayanyan̄a mmọ. Enye ama ọdọhọ mmọ afiak ọdọhọ ikata ete mmọ ẹkûyak ndịk anam mmọ.—Isaiah 41:5, 6, 10, 13, 14.

Jehovah Abasi eketịn̄ se idude ke Isaiah 41:10 ọnọ mme Jew oro mîkpọn̄ke enye, edi enye ama anam ẹwet ikọ oro ẹnịm man ada ọsọn̄ọ kpukpru ikọt esie mfịn idem. (Isaiah 40:8; Rome 15:4) Enye ke an̄wam ikọt esie mfịn nte akan̄wamde ke eset.