Afo ekere didie?

•   Ndi ọdiọk ndikobụp mme ebreidiọn̄, mme etịn̄-ini-iso, m̀mê mme okụt n̄kukụt n̄kpọ?

•   Ndi mbụk aban̄ade ndedịbe odudu edi ikpîkpu n̄ke, mîdịghe ndi enyene n̄kpọ odude ke esịt?

 Ibuotikọ emi eneme se inamde mme owo ẹma n̄kpọ aban̄ade ndedịbe odudu ye ntak anade afo ekpeme idem ye utọ n̄kpọ oro.

•  Nso inam mme owo ẹma?

•  Ntak anade ekpeme idem?

•  Nso ke akpanam?

•  Se ubọkn̄ka fo ẹtịn̄de

 Ẹsio ediwak fim, edinam TV, vidio game, ye mme n̄wed emi aban̄ade ndedịbe odudu. Emi anam ediwak n̄kparawa ye nditọwọn̄ ẹtọn̄ọ ndima n̄kpọ emi aban̄ade odudu mme demon, ifọt, ndem, ye n̄kukụt. Nso inam edi ntre? Se ndusụk ntak mi:

•   Ẹsiyọm ndidiọn̄ọ nte etiede: Ẹsidọn̄ mmọ ndidiọn̄ọ m̀mê mme angel ye mme demon ẹdu

•   Ẹsiyom ndidiọn̄ọ ini iso : Ẹsidọn̄ mmọ ndidiọn̄ọ se iditịbede ke iso

•   Ẹsiyom ndidiọn̄ọ n̄kpọ mban̄a mbon mmọ emi ẹkekpade: Ẹsikere ke oro ayanam mmimọ ikeme ndinyene nneme ye mbon mmimọ oro ẹkekpade

 Itiehe nte enen̄ede ọdiọk owo ndiyom ndidiọn̄ọ mme n̄kpọ emi. Ke uwụtn̄kpọ, idụhe owo mîsiyomke ndidiọn̄ọ se iditịbede ke ini iso, inyụn̄ idụhe owo emi itọn̄ owo esie emi akakpade mîsidọn̄ke enye. Edi enyene anade ọdiọn̄ọ mbak n̄kpọ emi idisịn fi ke mfịna.

 Bible enen̄ede akpan owo ndinam n̄kpọ ekededi emi asan̄ade n̄kpọ ye odudu mme demon. Ke uwụtn̄kpọ, Bible ọdọhọ ete:

 “Kûyak ẹkụt owo ekededi ke otu fo . . . emi ebrede idiọn̄, m̀mê ebre mfọni m̀mê owo ekededi emi omụmde ndomo m̀mê abiaidiọn̄, m̀mê owo emi ọkọkde nduọhọ ọnọ owo m̀mê obụp ekpo m̀mê etịn̄ ini iso m̀mê owo ekededi emi akade okobụp mme akpan̄kpa n̄kpọ. Koro kpukpru owo eke ẹnamde n̄kpọ emi ẹdi mbubiam n̄kpọ ke enyịn Jehovah.”​—Deuteronomy 18:​10-​12.

 Ntak emi Bible enen̄erede akpan owo ndinam n̄kpọ ekededi emi asan̄ade n̄kpọ ye odudu mme demon?

•   Ndinam n̄kpọ emi mme demon ẹsịnde ubọk ọwọrọ ke ida ye mmọ. Bible owụt ke ndusụk mme angel ẹma ẹsọn̄ ibuot ye Abasi ẹnyụn̄ ẹkabade mme asua Abasi. (Genesis 6:2; Jude 6) Ndiọi angel oro ẹdi mme demon. Mmọ ẹsida mme obụpekpo, mme ebreidiọn̄, ye mbon ẹsidade ntantaọfiọn̄ m̀mê n̄wed ekaubọk ẹtịn̄ ini iso ẹbian̄a mme owo. Ndinam utọ n̄kpọ oro ọwọrọ ke idụk ndụk ye mme asua Abasi.

•   Ndinam n̄kpọ ekededi emi asan̄ade n̄kpọ ye odudu mme demon esinam mme owo ẹkere ke mme owo ẹkeme nditịn̄ ini iso. Edi Bible ọdọhọ ke Abasi ikpọn̄ ekeme nditịn̄ “akpatre ke ntọn̄ọ, ndien ke eset enye etịn̄ mme n̄kpọ oro owo mînamke.”​—Isaiah 46:10; James 4:​13, 14.

•   Ndinam n̄kpọ ekededi emi asan̄ade n̄kpọ ye odudu mme demon esinam mme owo ẹnịm ke owo ekeme ndinyene nneme ye mme akpan̄kpa. Edi Bible ọdọhọ ete: “Amaedi mme akpan̄kpa mmọ ifiọkke baba n̄kpọ kiet.” Onyụn̄ ọdọhọ ke “baba utom, baba uduak, baba ifiọk, baba ọniọn̄ [idụhe] ke Udi.”​—Ecclesiastes 9:​5, 10.

 Ntak edi oro Mme Ntiense Jehovah ẹsuade n̄kpọ ekededi emi asan̄ade n̄kpọ ye odudu mme demon. Mmọ isimaha fim, edinam TV, m̀mê vidio game emi aban̄ade ifọt, ekpo, m̀mê ndedịbe odudu. N̄kaiferi kiet emi ekerede Maria ọdọhọ ete: “Edieke ẹnamde n̄kpọ ekededi emi asan̄ade n̄kpọ ye ndedịbe odudu ke fim, ọwọrọ inaha nse utọ fim oro.” a

•   Nam se ekekeme man aka iso enyene ‘eti esịt’ ke enyịn Jehovah, nyụn̄ kpeme idem ye n̄kpọ ekededi emi asan̄ade n̄kpọ ye ndedịbe odudu.​—Utom 24:16.

•   Duọn̄ọ n̄kpọ ekededi emi asan̄ade n̄kpọ ye ndedịbe odudu. Kot Utom 19:​19, 20, man okụt se mme Christian eyo mme apostle ẹkenamde.

 Ti ke ndisua n̄kpọ ekededi emi asan̄ade n̄kpọ ye odudu mme demon ediwụt ke ada ye Jehovah. Oro ayanam esịt enem Jehovah Abasi!​—Mme N̄ke 27:11.