Owo idikemeke-keme ndida emem ndi ke ererimbot ke ntak ediwak n̄kpọ:

•   “Ikam isịneke ke ubọk owo eke asan̄ade ndinen̄ede ikpatisan̄ esiemmọ.” (Jeremiah 10:23) Abasi ikọnọhọ owo odudu m̀mê ukeme ndikara idemesie, ntre mmọ idikemeke ndinyene ata emem.

•   “Kûbuọt idem ye mbon emi ẹkarade; owo ndomokiet ikemeke ndinyan̄a fi. Ke ini mmọ ẹkpan̄ade, mmọ ẹfiak ke ntan, ke kpasụk usen oro, kpukpru uduak mmọ ẹtak.” (Psalm 146:3, 4, Good News Translation) Mme ada ukara, idem mbon oro ẹduakde ndinam eti n̄kpọ, ikemeke ndisio se idide ntak ekọn̄ mfep.

•   “Ndiọkeyo emi ọsọn̄de ndiyọ oyodu ke mme akpatre usen. Koro mme owo . . . [ẹyetie] obom obom, imaha eti ido, mme andida owo nnọ, ẹsọn̄ ibuot, ẹkohode idem.” (2 Timothy 3:1-4) Nnyịn idu uwem ke “mme akpatre usen” idiọk ererimbot emi, emi edu mme owo mîyakke ẹnyene emem.

•   “Mbọm isọn̄ ye inyan̄, koro Devil omosụhọde etiene mbufo, enye asan̄a ye akwa iyatesịt, sia enye ọfiọkde ete ini imọ edi ibio.” (Ediyarade 12:12) Ẹkụk Devil emi edide asua Abasi ẹbaha mi ke isọn̄ ndien enye anam mme owo ẹnyene ndiọi edu esie. Adan̄a nte enye osụk edide “andikara ererimbot emi,” nnyịn idinyeneke emem tutu amama.—John 12:31.

•   “[Obio Ubọn̄ Abasi] ayanuak onyụn̄ osobo kpukpru mme obio ubọn̄ emi [ẹbiọn̄ọde Abasi], ndien enye ayada ke nsinsi.” (Daniel 2:44) Obio Ubọn̄ Abasi ikpọn̄ edinam nnyịn inyene emem ererimbot ke nsinsi, idịghe ukara owo ndomokiet.—Psalm 145:16.