•   Afo edi utọ owo emi edide ini n̄kpọ ama okokụre ama, afo ọduọ adaha ada; edi n̄wan m̀mê ebe fo esima ndibabak ntịm idem nnọ n̄kpọ.

•   Afo edi sụn̄sụn̄ owo, umaha editịm; edi n̄wan m̀mê ebe fo edi owo emi esitiamde-tiam idem, enye ama odụk itie n̄kpọ itie oro ofiop.

 Ndi n̄wan m̀mê ebe fo enyene ido emi esiyatde fi? Ọkpọkọbọ ekere n̄kpọ oro, emekeme ndibiat ndọ fo. Oro anam Bible ọdọhọ ke “owo eke eyịrede etịn̄ aban̄a n̄kpọ adian̄ade mme ufan.”​—Mme N̄ke 17:9.

 Utu ke ndiyak ido oro esiyatde fi do anam mbufo ẹdi an̄wa ye eku, enyene nte ekpesede ido oro enye idaha mfịna idi.

Se isịnede ke ibuotikọ emi

•  Nte ekpesede ido emi esiyatde fi

•  Se mme ebe ye iban mmọ ẹtịn̄de

•  Se mbufo ẹkemede ndineme

 Ido n̄wan m̀mê ebe fo emi esiyatde fi do ekeme ndisan̄a n̄kpọ ye uwem esie emi amade. Se uwụtn̄kpọ ita mi:

 Chelsea ọdọhọ ete: “N̄kpọ okpodu se ẹnamde ebe mi isisọpke inam, onyụn̄ edi iyom ndika n̄kpọ enye isisọpke itịm idem. Edi kpa ido oro esinam enye enyene ime ye mme owo ye ami nde. Ndusụk ini esiyat mi nte enye esinamde n̄kpọ sụn̄sụn̄, edi ido oro edi n̄kpọ kiet emi anamde mma enye.”

 Christopher ọdọhọ ete: “N̄wan mi okpoyom ndinam n̄kpọ, enye esitọtụn̄ọde kpukpru n̄kpọ ketket ntem esịm akpatre, n̄kpọ ndomokiet ibọhọke enye. N̄kpọ oro esiyat mi. Edi enye nditụn̄ọde n̄kpọ ntre esinam n̄kpọ ikemeke-keme ndibọhọ enye mbiara.” 

 Danielle ọdọhọ ete: “Esitie nte n̄kpọ isifịnake ebe mi, ido oro esinyụn̄ abiak mi. Edi nte enye mîsiyakke n̄kpọ osio enye esịt ọkọn̄ ke enyọn̄ edi n̄kpọ kiet emi akanamde enye odụk mi enyịn. Mmama nte enye esikemede ndimụm idem n̄kama mfịna okpodu.”

 Ido emi owo enyenede emi esiyatde n̄wan m̀mê ebe esie esiwak ndisan̄a n̄kpọ ye uwem esie emi n̄wan m̀mê ebe esie amade. Se Chelsea, Christopher, ye Danielle ẹkekụtde edi oro. Ama etịbe ntre, idụhe nte ediyomde enye etre ido oro yak enye okûtre uwem esie oro esimade do, sia mbiba ẹsan̄a ntre, kiet ikemeke ndidian̄ade n̄kpọn̄ kiet. Onyụn̄ etie nte okụk ndinyene iso ye edem, ọkpọsọhi se idude ke n̄kan̄ kiet okụk oro idinyeneke ufọn aba.

 Edi odu ndusụk ido emi mîsan̄ake n̄kpọ ye se ifọnde. Ke uwụtn̄kpọ, Bible ọdọhọ ke ndusụk owo ẹsisop “iyatesịt.” (Mme N̄ke 29:22) Ana utọ owo oro odomo nte enye ekekeme nditre “kpukpru idiọk udu ye iyatesịt ye ifụtesịt ye mfiori ye ikọ isụn̄i.” a​—Ephesus 4:31.

 Edieke ido oro mîdịghe idiọkn̄kpọ edi n̄kukụre edi ke esiyayat fi, nam item Bible emi ọdọhọde ika iso iyọ kiet eken ọkpọkọm imenyene ntak nditọhọ ye owo.​—Colossae 3:13.

 N̄kpọ efen edi afo ndidomo ndise eti uwem emi ido oro anamde n̄wan m̀mê ebe fo enyene. Ekeme ndidi uwem esie oro akanam enye odụk fi enyịn. Ebe emi ekerede Joseph ọdọhọ, “Ndikọbọ n̄kere ido oro esiyatde fi do etie nte afo nditak ke ndise nsọsọbọ itie ke daimọn utu ke ndise nte daimọn oro esemde.”

 Ẹmekeme ndibem iso ntie nsio nsio mbọrọ mme mbụme emi ẹtienede mi, ekem mbufo ẹditie kiet ẹneme ibọrọ mbufo mbiba.

•   Ndi n̄wan m̀mê ebe fo enyene ido emi ekerede ke enye esinam mfịna odu ke ufọk? Ekpedi ntre, nso ke edi?

•   Ndi ido oro enen̄ede ọdiọk ntre, mîdịghe ndi esinyụn̄ ayayat fi kpọt?

•   Ndi enyene eti uwem oro ido oro anamde enye enyene? Ekpedi ntre, nso ke edi, ndien ntak emi amade uwem oro?