1 Corinth 14;1-40
14 Ẹbịne ndima ima, ẹnyụn̄ ẹsịn ifịk ẹyom mme enọ eke spirit,+ edi ọkpọfọn akan edieke mbufo ẹtịn̄de prọfesi.*+
2 Koro owo eke etịn̄de ikọ ke usem, itịn̄ke inọ mme owo, edi etịn̄ ọnọ Abasi, koro owo ndomokiet ikopke,+ edi enye etịn̄ ndisana ndịben̄kpọ+ ke spirit.
3 Edi, owo eke etịn̄de prọfesi etịn̄ se ibọpde-bọp+ onyụn̄ esịn udọn̄ ọnọ owo onyụn̄ ọdọn̄ mme owo esịt ke ikọ esie.
4 Owo emi etịn̄de ikọ ke usem etịn̄ se ibọpde idemesie inam ọkọri, edi owo emi etịn̄de prọfesi etịn̄ se ibọpde esop.
5 N̄kpama kpukpru mbufo ẹtịn̄ ikọ ke usem,+ edi se mmade n̄kan edi mbufo nditịn̄ prọfesi.+ Ke akpanikọ, owo eke etịn̄de prọfesi okpon akan owo eke etịn̄de ikọ ke usem,+ ibọhọke enye akabade se enye etịn̄de man ọbọp esop.
6 Edi ke emi, nditọete, edieke n̄kpedide nditịn̄ ikọ ke usem nnọ mbufo, nso ufọn ke n̄kpanam nnọ mbufo ibọhọke ntịn̄ ikọ ediyarade+ m̀mê ifiọk+ m̀mê prọfesi m̀mê ikọ ukpepn̄kpọ nnọ mbufo?
7 Ntem, mme n̄kpọ eke mînyeneke uwem ẹsioro uyo,+ edide ifiom m̀mê harp; ibọhọke enye okpụhọde uyo, ẹdisan̄a didie ẹfiọk se ẹfride ke ifiom m̀mê se ẹbrede ke harp?
8 Koro edieke obukpon̄ osiorode uyo eke mîn̄wan̄ake owo, anie ediben̄e idem ọnọ ekọn̄?+
9 Kpasụk ntre, ibọhọke mbufo ẹda edeme ẹtịn̄ ikọ eke ememde owo ndifiọk,+ ẹdisan̄a didie ẹfiọk se ẹtịn̄de? Ke akpanikọ, ẹditịn̄ ikọ mbufo ẹduọn̄ọ ke ofụm.+
10 Ekeme ndidi nte ke ata ediwak orụk uyo ikọ ẹdu ke ererimbot, edi idụhe orụk ndomokiet emi mînyeneke se ọwọrọde.
11 Ntre edieke ami mmemfiọkke se ikọ eke ẹtịn̄de ọwọrọde, ndidi esenowo+ ke enyịn anditịn̄ ikọ, anditịn̄ edinyụn̄ edi esenowo ke enyịn mi.
12 Ntre n̄ko ke edi ye mbufo, sia mbufo ẹsịnde ifịk ẹyom mme enọ spirit,+ ẹyom ndinyene mmọ uwak uwak man ẹbọp esop.+
13 Ke ntre yak owo eke etịn̄de ikọ ke usem ọbọn̄ akam ete imọ ikpekeme ndikabade.+
14 Koro edieke ami mbọn̄de akam ke usem, mbọn̄ ke ntak enọ eke spirit oro ẹnọde mi,+ edi ekikere mi in̄wụmke mfri.
15 Nso, ndien, ke ndinam? Nyọbọn̄ akam ke enọ eke spirit, edi nyọbọn̄ akam n̄ko ke ekikere mi. Nyọkwọ itoro+ ke enọ eke spirit, edi nyọkwọ itoro n̄ko ke ekikere mi.+
16 Mîdịghe ntre, edieke afo ọnọde itoro ke enọ eke spirit, owo emi odude ke usụhọde itie edisan̄a didie ọdọhọ “Amen”+ ke ekọm oro afo ọnọde, sia enye mîfiọkke se afo etịn̄de?
17 Ke akpanikọ, afo ọnọ ekọm ke eti usụn̄, edi ibọpke owo enye eken ọkọri.+
18 Mmọkọm Abasi, mmesem usem awak akan nte kpukpru mbufo ẹsemde.+
19 Edi, ke esop n̄kpama nditịn̄ ikọ ition ke ekikere, man n̄kpeteme mbon en̄wen, akan nditịn̄ ikọ tọsịn duop ke usem.+
20 Nditọete, ẹkûdi n̄kpri nditọ ke ukeme ufiọk n̄kpọ,+ ẹkam ẹdi nseknditọ ke edinam idiọkn̄kpọ;+ edi ẹkọri ẹsịm ọyọhọ idaha ke ukeme ufiọk n̄kpọ.+
21 Ẹwet ke Ibet ẹte: “Jehovah ọdọhọ ete, ‘Nyada edeme mbon esenidụt ye n̄kpọkinua isenowo+ ntịn̄ ikọ nnọ mbon emi,+ ndien kpa ye oro mmọ idikopke.’”+
22 Mmọdo editịn̄ ikọ ke usem idịghe idiọn̄ọ+ inọ mme andinịm ke akpanikọ, edi edi ọnọ mbon oro mînịmke ke akpanikọ,+ ke adan̄aemi editịn̄ prọfesi mîdịghe inọ mbon oro mînịmke ke akpanikọ, edi edi ọnọ mme andinịm ke akpanikọ.+
23 Ke ntre, edieke ofụri esop ẹsopde idem ọtọkiet ndien kpukpru mmọ ẹtịn̄ ikọ ke usem,+ edi mme usụhọde owo m̀mê mbon oro mînịmke ke akpanikọ ẹdụk ẹdi, nte mmọ ididọhọke ite idat anam mbufo?
24 Edi edieke kpukpru mbufo ẹtịn̄de prọfesi ndien owo ekededi eke mînịmke ke akpanikọ m̀mê usụhọde owo odụk edi, ikọ kpukpru mbufo ayasua ọnọ enye,+ onyụn̄ odụn̄ọde enye;
25 ndịben̄kpọ esịt esie ayayarade,+ anam enye ọduọ ekịbi iso ke isọn̄ onyụn̄ atuak ibuot ọnọ Abasi, atan̄ade ete: “Ke akpanikọ Abasi odu ke otu mbufo.”+
26 Nso ke ẹkpenam, ndien, nditọete? Ke ini mbufo ẹsopde idem ọtọkiet, owo kiet enyene psalm, owo en̄wen enyene ukpepn̄kpọ, owo en̄wen enyene ediyarade, owo en̄wen enyene ukeme editịn̄ ikọ ke usem, owo en̄wen enyene ukeme edikabade ikọ.+ Ẹyak kpukpru n̄kpọ ẹda itie ke usụn̄ oro ọbọpde-bọp.+
27 Ndien edieke owo etịn̄de ikọ ke usem, yak etre ke owo iba m̀mê ita ke n̄wak-n̄kaha, n̄ko yak edi ke adiana ke adiana; ndien yak owo akabade se ẹtịn̄de.+
28 Edi edieke akabadeikọ mîdụhe, yak enye odop uyo ke esop onyụn̄ etịn̄ ikọ ọnọ idemesie+ ye Abasi.
29 N̄ko-n̄ko, yak prọfet+ iba m̀mê ita ẹtịn̄ ikọ, yak mmọ eken ẹnyụn̄ ẹdụn̄ọde ẹfiọk se ọwọrọde.+
30 Edi edieke ẹnọde owo en̄wen+ ediyarade ke adan̄aemi enye osụk etiede do, yak akpa owo odop uyo.
31 Koro kpukpru mbufo kiet kiet ẹmekeme nditịn̄ prọfesi,+ man kpukpru owo ẹbọ ukpep ẹnyụn̄ ẹnọ kpukpru owo nsịnudọn̄.+
32 Ndien mme prọfet ẹnyene ndikara mme enọ eke spirit mmọ.
33 Koro Abasi idịghe Abasi ndutịme,+ edi edi Abasi emem.+
Nte edide ke kpukpru esop ndisana owo,
34 yak iban ẹdu ke ndopuyo+ ke esop, koro owo inyịmeke mmọ ẹtịn̄ ikọ, edi yak mmọ ẹsụk ibuot,+ kpa nte Ibet+ ọdọhọde.
35 Edieke mmọ ẹyomde ndikpep n̄kpọ, yak mmọ ẹbụp mme ebe mmọ ke ufọk, koro edi n̄kpọ esuene+ n̄wan nditịn̄ ikọ ke esop.
36 Nso ndien? Nte ikọ Abasi okoto mbufo ọwọrọ,+ mîdịghe ndi mbufo ikpọn̄ ke enye ekesịm?
37 Edieke owo ekededi ekerede ete imọ idi prọfet m̀mê ekerede ke imenyene enọ eke spirit, yak enye ọfiọk ete mme n̄kpọ eke ami n̄wetde nnọ ẹsọk mbufo ẹdi ewụhọ Ọbọn̄.+
38 Edi edieke owo ekededi ananade ifiọk, yak enye aka iso anana ifiọk.
39 Mmọdo, nditọete mi, ẹsịn ifịk ẹyom editịn̄ prọfesi,+ edi ẹkûkpan editịn̄ ikọ ke usem.+
40 Edi ẹyak kpukpru n̄kpọ ẹda itie ke ido nte eyede ye ke ndutịm.+
Mme Ikọ Idakisọn̄
^ Emi ekeme ndisịne ntịn̄nnịm ikọ, etop eke odudu spirit, ọkọrọ ye uduak Abasi oro ẹyararede m̀mê ẹtan̄ade.
