2 Chronicle 6;1-42
6 Adan̄aoro ke Solomon ọkọdọhọ ete:+ “Jehovah ọkọdọhọ ke imọ ididụn̄ ke ọkpọsọn̄ ekịm;+
2 ndien, ami mmọbọp ufọk emi edide edikon̄ ebietidụn̄ ye akpan ebiet nnọ fi+ man afo odụn̄ ke nsinsi.”+
3 Ekem edidem ọwọn̄ọde iso ọdiọn̄+ ofụri esop Israel, ke adan̄aemi ofụri esop Israel ẹsụk ẹdade-da.+
4 Ndien enye ọdọhọ ete: “Ekọm enyene Jehovah Abasi Israel,+ emi akadade inua esie ọdọhọ David ete+ mi, onyụn̄ adade ubọk esie anam emi osu,+ ọdọhọde ete,
5 ‘Toto ke usen emi n̄kadade ikọt mi n̄wọrọ ke isọn̄ Egypt, ami mmekke baba obio kiet ke kpukpru esien Israel nte ẹbọp ufọk man enyịn̄+ mi okpodu do, nnyụn̄ mmekke baba owo kiet nte edi andida ikọt mi Israel usụn̄.+
6 Edi nyemek Jerusalem+ man enyịn̄ mi odu do, ndien nyemek David nte ada ikọt mi Israel usụn̄.’+
7 Ndien ama odu David ete mi ke esịt ndibọp ufọk nnọ enyịn̄ Jehovah Abasi Israel.+
8 Edi Jehovah ọdọhọ David ete mi ete, ‘Sia odude fi ke esịt ndibọp ufọk nnọ enyịn̄ mi, afo amanam ọfọn koro odude fi ke esịt.+
9 N̄kukụre edi nte ke idịghe afo edibọp ufọk oro,+ edi eyen fo emi editode fi ke idem ọwọrọ edibọp ufọk ọnọ enyịn̄ mi.’+
10 Ndien Jehovah anam ikọ+ esie emi enye eketịn̄de, man ami nda ke itie David ete+ mi nnyụn̄ ntie ke ebekpo+ Israel, kpa nte Jehovah ọkọdọhọde,+ man nnyụn̄ mbọp ufọk nnọ enyịn̄ Jehovah Abasi Israel,+
11 man nnyụn̄ nnịm Ekebe+ do, kpa ekebe emi esịnede ediomi Jehovah oro enye akanamde ye nditọ Israel.”+
12 Ndien enye ada ke iso itieuwa Jehovah ke iso ofụri esop Israel,+ onyụn̄ atat ekaubọk esie anyan.+
13 (Koro Solomon ama anam n̄kpoto+ okpoho enịm ke ufọt okụre.+ Uniọn̄ esie ekedi cubit ition, ubom esie edi cubit ition, enye onyụn̄ okon̄ cubit ita; ndien enye ọdọk ada ke enyọn̄ esie.) Ndien ọtọn̄ọ edọn̄+ ke iso ofụri esop Israel onyụn̄ atat ekaubọk esie emenede ke enyọn̄.+
14 Ndien enye ọdọhọ ete: “O Jehovah Abasi Israel,+ idụhe Abasi efen eke ebietde fi+ ke enyọn̄ m̀mê ke isọn̄, emi enịmde ediomi+ onyụn̄ owụtde mme asan̄autom fo emi ẹsan̄ade ke iso fo ke ofụri esịt+ ima-mfọnido;
15 afo emi anamde ye asan̄autom fo David ete mi se afo ọkọn̄wọn̄ọde ọnọ enye,+ tutu afo ada inua fo ọn̄wọn̄ọ, onyụn̄ ada ubọk fo anam enye osu kpa nte edide mfịn emi.+
16 Ndien, ke emi, O Jehovah Abasi Israel, nam ye asan̄autom fo David ete mi se afo ọkọn̄wọn̄ọde ọnọ enye ete, ‘Owo idisịbeke owo emi otode ubon fo ifep ke ebekpo Israel+ ke iso mi, ama akam edi nditọ fo+ ẹyekpeme usụn̄ mmọ ke ndisan̄a ke ibet mi,+ kpa nte afo asan̄ade ke iso mi.’+
17 Ndien, ke emi, O Jehovah Abasi Israel,+ yak un̄wọn̄ọ emi afo ọkọn̄wọn̄ọde+ ọnọ asan̄autom fo David ọsọn̄ọ ada.+
18 “Edi nte Abasi eyenen̄ede odụn̄ ye ubonowo ke isọn̄?+ Sese! Heaven, ih, n̄kon̄n̄kan heaven ikam ikemke fi;+ n̄wan̄wadise ufọk emi ami mbọpde!+
19 Afo nyụn̄ kop akam emi asan̄autom+ fo ọbọn̄de ye eben̄e emi enye eben̄ede oyom mfọn,+ O Jehovah Abasi mi kop n̄kpeubọk+ ye akam emi asan̄autom fo ọbọn̄de ke iso fo,+
20 man afo atat enyịn+ ese ufọk emi ke uwemeyo ye ke okoneyo, ese ebiet emi afo ọkọdọhọde ke iyanam enyịn̄ imọ odu,+ ke ndikop akam emi asan̄autom fo edibọn̄de ese ebiet+ emi.
21 Afo nyụn̄ kop eseme asan̄autom+ fo ye eke ikọt fo Israel ke ini mmọ ẹdibọn̄de akam ẹse ebiet+ emi, man afo etie ke heaven,+ kpa ebietidụn̄ fo okop; afo kop nyụn̄ fen.+
22 “Edieke owo anamde idiọkn̄kpọ edue ekemmọ owo,+ ndien owo oro anam enye ada un̄wọn̄ọ ndisịn enye ke idak+ isụn̄i, ndien ke idak isụn̄i emi owo oro edi itieuwa fo ke ufọk emi,+
23 ndien afo tie ke heaven kop,+ nyụn̄ nam n̄kpọ+ nyụn̄ kpe ikpe mme asan̄autom fo ke ndibiom idiọkowo ikpe nnyụn̄ mmen usụn̄ esie ndori enye ke ibuot,+ ye ke ndibat edinen owo ke edinen+ ke ndinọ enye nte ekemde ye edinen ido esie.+
24 “Ndien edieke mme asua+ ẹkande ikọt fo Israel koro mmọ ẹnamde idiọkn̄kpọ ẹdue fi,+ ndien mmọ ẹfiak ẹdi,+ ẹditoro enyịn̄ fo+ ẹnyụn̄ ẹbọn̄ akam+ ẹyom mfọn fo ke ufọk emi,+
25 afo nyụn̄ tie ke heaven kop,+ nyụn̄ fen+ idiọkn̄kpọ ikọt fo Israel ndien da mmọ fiak di+ ke isọn̄ emi afo ọkọnọde mme ete ete mmọ.+
26 “Ke ini ẹsịride enyọn̄ man edịm okûdep,+ koro mmọ ẹnamde idiọkn̄kpọ+ ẹdue fi, ndien mmọ ẹbọn̄ akam ẹse ebiet+ emi ẹnyụn̄ ẹtoro enyịn̄ fo, ẹnyụn̄ ẹfiak edem ẹkpọn̄ idiọkn̄kpọ mmọ, ke ntak emi afo otụhọrede mmọ,+
27 ndien afo tie ke mme heaven kop, nyụn̄ fen idiọkn̄kpọ mme asan̄autom fo, kpa ikọt fo Israel, koro afo etemede+ mmọ eti usụn̄+ eke mmọ ẹkpesan̄ade; ndien nam edịm+ edep ke isọn̄ emi afo ọnọde ikọt fo nte udeme inyene.+
28 “Edieke akan̄+ odude ke isọn̄, edieke idiọk udọn̄ọ+ odude, edieke ufiop eyo,+ mfụt,+ n̄kukun̄kpọyọriyọ,+ ye mme mfem+ ẹdude; edieke mme asua+ mmọ ẹkande mmọ ẹkụk ke isọn̄ emi ke inuaotop+ mmọ—orụk ufen ekededi, orụk udọn̄ọ+ ekededi—
29 akam+ ekededi eke ẹdibọn̄de, se ededi eben̄e eke owo ekededi m̀mê kpukpru ikọt fo Israel+ ẹdiben̄ede ẹyom mfọn,+ koro mmọ kiet kiet ẹdiọn̄ọde ufen+ ye ubiak mmọ; ke ini enye atatde ubọk esie anyan ke ufọk emi,+
30 afo nyụn̄ tie ke heaven, kpa ebietidụn̄+ fo kop, ndien fen+ nyụn̄ nam n̄kpọ nọ mmọ kiet kiet nte ekemde ye kpukpru usụn̄+ mmọ, koro afo ọfiọkde esịt+ mmọ (koro afo ikpọn̄ etịm ọfiọk esịt nditọ owo);+
31 man mmọ ẹkpebak+ fi ke ndisan̄a ke usụn̄ fo ke ofụri eyouwem mmọ ke isọn̄ emi afo ọkọnọde mme ete ete nnyịn.+
32 “Ndien, n̄ko, amaedi owo esenidụt, emi mîdịghe kiet ke otu ikọt fo Israel+ emi otode anyan idụt edi ke ntak akwa enyịn̄+ fo ye ọkpọsọn̄ ubọk+ fo ye edinyanade ubọk fo,+ mmọ ẹnyụn̄ ẹdi ẹdibọn̄ akam ẹse ufọk emi,+
33 afo nyụn̄ tie ke heaven, kpa akpan ebietidụn̄ fo,+ kop, nyụn̄ nam kpukpru se owo esenidụt emi eben̄ede fi;+ man kpukpru owo ke isọn̄ ẹkpefiọk enyịn̄ fo+ ẹnyụn̄ ẹbak fi+ kpa nte ikọt fo Israel ẹnamde, man ẹdiọn̄ọ ẹte ke ẹkot enyịn̄ fo ẹdian ufọk emi ami mbọpde.+
34 “Edieke ikọt fo ẹwọrọde ẹka ekọn̄+ ye mme asua mmọ ke usụn̄ emi afo ọdọn̄de+ mmọ, ndien mmọ ẹbọn̄ akam+ ẹnọ fi ẹse obio emi afo emekde ye ufọk emi ami mbọpde nnọ enyịn̄ fo,+
35 afo nyụn̄ tie ke heaven kop akam mmọ ye eben̄e oro mmọ ẹben̄ede ẹyom mfọn,+ afo nyụn̄ kpe ikpe mmọ.+
36 “Edieke mmọ ẹnamde idiọkn̄kpọ ẹdue fi+ (koro idụhe owo ndomokiet eke mînamke idiọkn̄kpọ),+ ndien afo ayat esịt onyụn̄ ayak mmọ esịn mme asua ke ubọk, mme andimụm mmọ ẹnyụn̄ ẹtan̄ mmọ ẹnyọn̄ọ isọn̄ mme asua, edide ke anyan idụt onyụn̄ edide ke n̄kpet n̄kpet;+
37 ekem enyịn edin̄wan̄a mmọ ke isọn̄ emi ẹtan̄de mmọ ẹka ntan̄mfep, ndien mmọ ẹfiak ẹtiene fi ẹnyụn̄ ẹdiben̄e fi ẹyom mfọn ke isọn̄ emi ẹtan̄de mmọ ẹka ntan̄mfep,+ ẹte, ‘Nnyịn imanam idiọkn̄kpọ+ inyụn̄ idue,+ imanam se idiọkde’;+
38 ndien mmọ ẹfiak ẹtiene fi ke ofụri esịt+ mmọ ye ke ofụri ukpọn̄ mmọ ke isọn̄ emi mmọ ẹdide mbon ntan̄mfep+ ẹnọ mbon oro ẹketan̄de mmọ ẹka ntan̄mfep, ndien mmọ ẹbọn̄ akam ẹse isọn̄ mmọ emi afo ọkọnọde mme ete ete mmọ ye obio emi afo emekde+ ye ufọk emi ami mbọpde nnọ enyịn̄ fo;+
39 afo nyụn̄ tie ke mme heaven, kpa akpan ebietidụn̄ fo,+ kop akam mmọ ye mme eben̄e oro mmọ ẹben̄ede ẹyom mfọn,+ nyụn̄ kpe ikpe+ mmọ nyụn̄ fen+ ikọt fo ke idiọkn̄kpọ emi mmọ ẹnamde ẹdue fi.
40 “Ndien, ke emi, O Abasi mi mbọk, tat enyịn,+ nyụn̄ biọn̄ utọn̄+ ke akam oro ẹbọn̄de ẹban̄a ebiet emi.
41 Ndien, ke emi, daha ke enyọn̄+ O Jehovah dụk ke nduọkodudu+ fo, afo ye Ekebe odudu+ fo. O Jehovah Abasi, yak ẹsịne mme oku fo edinyan̄a, ndien yak mbon emi ẹsọn̄ọde ẹda ye afo ẹdara ẹban̄a se ifọnde.+
42 O Jehovah Abasi, kûnụk iso owo emi afo eyetde aran+ ufep. O ti ima-mfọnido oro afo okowụtde David asan̄autom fo.”+
