2 Corinth 7;1-16
7 Ke ntre, sia nnyịn inyenede mme un̄wọn̄ọ+ emi, ndima, ẹyak nnyịn iyet+ kpukpru se isabarede obụkidem ye spirit ifep ke idem nnyịn,+ inam edisana idaha nnyịn ọfọn ama ke edibak Abasi.+
2 Ẹnọ nnyịn ufan̄ ke esịt mbufo.+ Nnyịn inamke baba owo kiet idiọk, ibiatke baba owo kiet, inyụn̄ inamke n̄kpọ ke utụk ye baba owo kiet.+
3 Ntịn̄ke emi man mbiom mbufo ikpe. Koro mma mbebem iso ntịn̄ nte ke mbufo ẹdu nnyịn ke esịt man ẹkpetiene nnyịn ẹkpa n̄kpa, ẹkpenyụn̄ ẹtiene nnyịn ẹdu uwem.+
4 Mmenyene akwa ifụre nditịn̄ ikọ ye mbufo. Mmobụre akwa mbụre mban̄a mbufo.+ Mmenen̄ede n̄kop ndọn̄esịt,+ idatesịt mi ọyọhọ ọduọhọ ke kpukpru ukụt nnyịn.+
5 Ke akpanikọ, ke ini ikedide idisịm Macedonia,+ nnyịn ikenyeneke nduọkodudu ke obụkidem,+ edi ẹkefefịk+ nnyịn ke kpukpru afan̄—en̄wan odu ke an̄wa, ndịk odu ke esịtufọk.
6 Edi Abasi emi ọnọde mbon oro ẹfụhọde ndọn̄esịt+ ama ada Titus emi okodude do ọdọn̄ nnyịn esịt;
7 idaha sụk edidu esie, edi ada n̄ko ndọn̄esịt emi mbufo ẹkenamde enye okop, nte enye akafiakde ada etop+ ọsọk nnyịn aban̄a nte ọdọn̄de mbufo ndikụt mi, nte mbufo ẹfụhọde, ye nte mbufo ẹkerede ẹban̄a mi; ntre ndọdiọn̄ ndat esịt.
8 Ntem idem edieke edide mma nnam mbufo ẹkop mfụhọ ke leta mi,+ ntuaha n̄kpọfiọk. Idem edieke edide mma ntua n̄kpọfiọk ke akpa, (mmokụt nte ke leta oro anam mbufo ẹfụhọ, okposụkedi ekedide ke esisịt ini,)
9 ami mmadara ke emi, idịghe koro mbufo ẹma ẹkop mfụhọ, edi koro mbufo ẹkefụhọ man ẹkabade esịt;+ koro mbufo ẹkefụhọ ke ido Abasi,+ mbak mbufo ẹdikụt ntakurua ke n̄kpọ ndomokiet ke ntak nnyịn.
10 Koro mfụhọ ido Abasi ada esịm edikabade esịt emi osụn̄ọde ke edinyan̄a oro owo mîtuaha n̄kpọfiọk;+ edi mfụhọ ido ererimbot ada n̄kpa edi.+
11 Koro, sese! mbufo ndikop mfụhọ ke ido Abasi,+ nso akwa ifiopesịt ke enye anam mbufo ẹnyene ntem, nte enye esịnde mbufo ẹkan̄ idem, ẹyat esịt, ẹkop ndịk, ẹnyene ọkpọsọn̄ udọn̄, ẹnyene ifịk, ẹnyụn̄ ẹnen̄ede se ikakwan̄ade!+ Ke kpukpru idaha mbufo ẹmewụt idem nte ẹdide edisana ke n̄kpọ emi.
12 Ke akpanikọ, okposụkedi n̄kewetde mbufo, n̄kewetke mban̄a andidue+ m̀mê owo oro ẹkeduede, edi n̄kewet man ukeme ofụri esịt oro mbufo ẹsịnde akpayarade ke otu mbufo ke iso Abasi.
13 Ntak edi oro nnyịn ikopde ndọn̄esịt.
Edi, ke adianade ye ndọn̄esịt oro nnyịn ikopde, nnyịn isụk itetịm ikop idatesịt ke ntak idatesịt Titus, koro kpukpru mbufo ẹmedemede spirit esie.+
14 Koro edieke n̄kobụrede mbụre ekededi nnọ enye mban̄a mbufo, bụt inamke mi; edi kpa nte iketịn̄de kpukpru n̄kpọ inọ mbufo ke akpanikọ, ntre n̄ko ke mbụre+ oro nnyịn ikobụrede ke iso Titus edi akpanikọ.
15 N̄ko, enye ọdọdiọn̄ enyene esịt ima ọnọ mbufo, ke adan̄aemi enye etide nte kpukpru mbufo ẹkopde item,+ nte mbufo ẹkedarade enye ke ndịk ye nnyekidem.
16 Mmadat esịt koro ke kpukpru idaha mmenen̄ede nnyene uko ke ntak mbufo.+
