2 Ndidem 21;1-26
21 Manasseh+ ekedi isua duopeba ke ini enye ọtọn̄ọde ndikara, enye onyụn̄ akara isua aba ye efịt ke Jerusalem. Ndien eka esie ekekere Hephzibah.
2 Ndien enye anam se idiọkde ke enyịn Jehovah,+ nte ekemde ye mme mbubiam n̄kpọ mme idụt+ oro Jehovah ekebịnde efep ke iso nditọ Israel.
3 Ntre enye afiak ọbọp mme edikon̄ ebiet emi Hezekiah ete esie okowụride,+ onyụn̄ anam mme itieuwa ọnọ Baal onyụn̄ anam mme eto utuakibuot, kpa nte Ahab+ edidem Israel akanamde; enye onyụn̄ onụhọ ọnọ+ ofụri udịm enyọn̄+ onyụn̄ anam n̄kpọ mmọ.+
4 Enye onyụn̄ anam mme itieuwa ke ufọk Jehovah,+ kpa ufọk emi Jehovah ọkọdọhọde ete: “Nyanam enyịn̄ mi odu ke Jerusalem.”+
5 Ndien enye anam mme itieuwa ọnọ ofụri udịm enyọn̄+ ke okụre iba ke ufọk Jehovah.+
6 Ndien enye ọfọp eyen esie eren ke ikan̄,*+ ebre mfọni,+ omụm ndomo, onyụn̄ enịm mme obụp ekpo+ ye mme etịn̄ ini iso.+ Enye anam se idiọkde ke enyịn Jehovah ke akamba udomo, man ayat enye esịt.
7 N̄ko-n̄ko, enye emen edisọi mbiet+ eto utuakibuot emi enye akanamde ekenịm ke ufọk+ emi Jehovah ọkọdọhọde David ye Solomon eyen esie ete: “Ami nyanam enyịn̄ mi odu ke nsinsi ke ufọk emi ye ke Jerusalem, emi ami mmekde nsio ke otu ofụri esien Israel.+
8 Ndien nditọn̄ọke aba ntak nnam ikpat Israel oyo ọkpọn̄ isọn̄ oro n̄kọnọde mme ete ete mmọ,+ ama akam edi mmọ ẹyekpeme ndinam kpukpru se n̄kowụkde mmọ,+ kpa kpukpru ibet oro Moses asan̄autom mi okowụkde mmọ.”
9 Ndien mmọ ikokopke,+ edi Manasseh atap mmọ ndinam se idiọkde+ ikan se mme idụt+ emi Jehovah okosobode efep ke iso nditọ Israel ẹkenamde.
10 Ndien Jehovah etịn̄ ebe ke mme asan̄autom esie kpa mme prọfet,+ ete:
11 “Sia Manasseh+ edidem Judah anamde mme mbubiam+ n̄kpọ emi, enye onyụn̄ anamde ọdiọk akan kpukpru se mme Amorite+ oro ẹkebemde enye iso ẹdu ẹkenamde, enye onyụn̄ esịnde Judah ẹnam idiọkn̄kpọ+ ke mbubiam mbiet esie.
12 Ntak edi oro Jehovah Abasi Israel ọdọhọde ntem, ete, ‘Sese, ami mmọn̄ nda afanikọn̄ ntiene Jerusalem+ ye Judah, emi utọn̄ ẹdiduatde owo ekededi eke okopde.+
13 Ndien ami nyanyanade urụk+ emi ẹkedade ẹdomo ẹnọ Samaria+ ndomo nnọ Jerusalem; nyonyụn̄ nda udomon̄kpọ emi ẹkedade ẹdomo ẹnọ ufọk Ahab+ ndomo nnọ enye; ndien nyọkwọhọde+ Jerusalem asana kpa nte emi owo ọkwọhọrede usan, n̄kwọhọde enye asana nnyụn̄ n̄kabade n̄kịbi.+
14 Ndien nyọkpọn̄ nsụhọ+ udeme mi+ nsịn mme asua mmọ ke ubọk, ndien mmọ ẹyekabade ẹdi n̄kpọ mbụme ẹnọ kpukpru mme asua mmọ,+
15 koro mmọ ẹkenamde se idiọkde mi ke enyịn, ẹkenyụn̄ ẹkade iso ẹyat mi esịt toto ke usen oro mme ete ete mmọ ẹketode Egypt ẹwọn̄ọ tutu esịm mfịn emi.’”+
16 Ndien n̄ko Manasseh ama ọduọk iyịp ata ediwak owo emi mîduehe,+ tutu enye ada iyịp ọyọhọ Jerusalem ọtọn̄ọde ke utịt kiet tutu esịm utịt eken, ọkọrọ ye idiọkn̄kpọ esie emi enye ekesịnde Judah ẹnam ke ndinam se idiọkde ke enyịn Jehovah.+
17 Amaedi mme n̄kpọ efen emi ẹban̄ade Manasseh ye kpukpru se enye akanamde ye idiọkn̄kpọ emi enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah?
18 Ekem Manasseh osụhọde ana ye mme ete ete esie+ ẹnyụn̄ ẹbụk enye ke in̄wan̄esa ufọk esie, ke in̄wan̄esa Uzza;+ ndien Amon eyen esie ọtọn̄ọ ndikara ke itie esie.
19 Amon+ ekedi isua edịp ye iba ke ini enye ọtọn̄ọde ndikara, enye onyụn̄ akara isua iba+ ke Jerusalem. Ndien eka esie ekekere Meshullemeth eyen Haruz emi okotode Jotbah.
20 Ndien enye aka iso anam se idiọkde ke enyịn Jehovah, kpa nte Manasseh ete esie akanamde.+
21 Enye onyụn̄ asan̄a ke kpukpru usụn̄ oro ete esie akasan̄ade,+ onyụn̄ anam n̄kpọ ọnọ mbubiam mbiet+ oro ete esie akanamde, onyụn̄ atuak ibuot ọnọ mmọ.
22 Ntem enye ọkpọn̄ Jehovah+ Abasi mme ete ete esie, inyụn̄ isan̄ake ke usụn̄ Jehovah.+
23 Ekem mme asan̄autom Amon ẹdụk odu ẹban̄a edidem ẹnyụn̄ ẹwot+ enye ke ufọk esiemmọ.
24 Edi mbio obio ẹwot kpukpru mbon oro ẹkedụkde odu+ ẹban̄a Edidem Amon. Ekem mbio obio ẹnam Josiah+ eyen esie edidem ke itie esie.
25 Amaedi mme n̄kpọ efen emi ẹban̄ade Amon ye se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah?
26 Ntre mmọ ẹbụk enye ke udi esie ke in̄wan̄esa Uzza;+ ndien Josiah+ eyen esie ọtọn̄ọ ndikara ke itie esie.
Mme Ikọ Idakisọn̄
^ At. Ed., “anam eyen esie ebe ke ikan̄.”
