2 Peter 1;1-21
1 Ami Simon Peter, ofụn+ ye apostle+ Jesus Christ, n̄wet n̄wed emi nnọ ẹsọk mbon oro ẹbọde akpanikọ,* emi edide ukem ye eke nnyịn,+ oto edinen ido+ Abasi ye Jesus Christ Andinyan̄a nnyịn:+
2 Mfọnido oro owo mîdotke ye emem ẹkpekam ẹdọdiọn̄ ẹwak ẹnọ mbufo+ oto nnennen ifiọk+ Abasi ye Jesus Ọbọn̄ nnyịn,
3 adan̄a nte odudu Abasi ọnọde nnyịn kpukpru n̄kpọ oro ẹban̄ade uwem+ ye uten̄e+ Abasi ke ntatubọk, oto nnennen ifiọk owo emi akadade ubọn̄+ ye eti ido okot+ nnyịn.
4 Enye ọnọ nnyịn ata ikpọ ye mme ọsọn̄urua un̄wọn̄ọ+ ke mfọn ebe ke mme n̄kpọ emi, man otode ke mme n̄kpọ emi mbufo ẹkpekabade ẹbuana uduot+ Abasi,+ ke ẹma ẹkebọhọ mbiara emi otode ọkpọsọn̄ idiọk udọn̄ emi odude ke ererimbot.+
5 Ke ntak emi, ndien, mbufo ẹsịn ofụri ukeme+ ẹdian eti ido+ ke mbuọtidem mbufo, ẹdian ifiọk+ ke eti ido,
6 ẹdian mfara ke idem ke ifiọk, ẹdian ukeme ediyọ ke mfara ke idem,+ ẹdian uten̄e+ Abasi ke ukeme ediyọ,
7 ẹdian ima nditọete ke uten̄e Abasi, ẹdian ima ke ima nditọete.+
8 Koro edieke mme n̄kpọ emi ẹdude mbufo ke idem ọyọhọ ọyọhọ, mmọ ẹyenam mbufo ẹkûtre ndinam utom m̀mê nditre ndin̄wụm mfri+ ke edida nnennen ifiọk Ọbọn̄ nnyịn Jesus Christ nnam n̄kpọ.
9 Koro edieke mme n̄kpọ emi mîdụhe owo ekededi ke idem, enye edi nnan, emi ọbọpde enyịn esie man okûkụt un̄wana,+ enye onyụn̄ efre+ ete ẹma ẹnam imọ isana+ ibọhọ mme idiọkn̄kpọ imọ eke anyan ini ko ke edem.
10 Ke ntak emi, nditọete, ẹdọdiọn̄ ẹsịn ofụri ukeme mbufo ndinam ikot+ eke ẹkekotde mbufo ye edimek+ eke ẹkemekde mbufo ẹnyene nsọn̄ọ; koro edieke mbufo ẹkade iso ndinam mme n̄kpọ emi mbufo idituakke ukot iduọn̄ọ.+
11 Ntem ke ẹdiberede usụn̄+ ẹnịm ata in̄wan̄ ẹnọ mbufo ndibe ndụk nsinsi+ obio ubọn̄ Ọbọn̄ ye Andinyan̄a nnyịn Jesus Christ.+
12 Ke ntak emi ami mmeben̄e idem nditi+ mbufo mme n̄kpọ emi kpukpru ini, okposụkedi mbufo ẹfiọkde mmọ ẹnyụn̄ ẹsọn̄ọde ẹda ke akpanikọ+ oro odude mbufo ke esịt.+
13 Edi mbat ke enen, adan̄a nte ndude ke tent emi,+ ndidemede mbufo ke nditi mbufo n̄kpọ emi,+
14 sia mfiọkde nte ke ibịghike ẹmọn̄ ẹsio mi tent emi ẹfep,+ kpa nte Ọbọn̄ nnyịn Jesus Christ n̄ko okowụtde mi.+
15 Ntre nyesịn ofụri ukeme mi kpukpru ini man, ke mma nnyọn̄,+ mbufo ẹkpekeme nditi idem mbufo mme n̄kpọ emi.
16 Koro ikedịghe ke nditiene nsunsu mbụk+ emi ẹdade mbufiọk ẹtịbi ke nnyịn ikanam mbufo ẹfiọk odudu ye edidu Ọbọn̄ nnyịn Jesus Christ,+ edi ekedi ke ndikokụt akwa ubọn̄ esie.+
17 Koro enye ọkọbọ ukpono ye ubọn̄+ oto Abasi Ete, ke ini uyo okotode akwa ubọn̄ esịm enye ete: “Emi edi edima eyen mi, emi ami nnyịmede.”+
18 Ih, uyo emi ke nnyịn ikokop+ nte ọwọrọde ke enyọn̄ ke adan̄aemi ikodude ye enye ke edisana obot.+
19 Mmọdo ẹdọdiọn̄ ẹsọn̄ọ+ ikọ mme prọfet+ ẹnọ nnyịn; ndien mbufo ẹmenam ọfọn ke ndinọ enye ntịn̄enyịn nte utuenikan̄+ eke ayamade ke n̄kịmn̄kịm ebiet, tutu eyo esiere ndien ntantaọfiọn̄ usenubọk+ asiaha, ke esịt mbufo.
20 Koro mbufo ẹfiọkde ke akpa itie ẹte, owo isiakke ntịn̄nnịm ikọ N̄wed Abasi ndomokiet ke usụn̄ idemesie.+
21 Koro akananam ntịn̄nnịm ikọ itoho uduak owo,+ edi mme owo ẹtịn̄ ikọ eke otode Abasi+ nte edisana spirit+ adade mmọ usụn̄.
Mme Ikọ Idakisọn̄
^ At. Ed., “mbuọtidem.”
