2 Timothy 3;1-17
3 Edi fiọk emi, ete ndiọkeyo emi ọsọn̄de ndiyọ oyodu+ ke mme akpatre usen.+
2 Koro mme owo ẹyedi mme ama idem, mme ama okụk, ẹtan̄ idem, ẹseri iseri, ẹsụn̄i isụn̄i, ẹsọn̄ ibuot ye ete ye eka,+ ẹnana esịtekọm, inyeneke nsọn̄ọnda,+
3 inyeneke ndammana ima,+ inyịmeke ndidụk ediomi+ ekededi, mbon edidọk,+ ẹnana mfara ke idem, ẹtie obom obom,+ imaha eti ido,+
4 mme andida owo nnọ,+ ẹsọn̄ ibuot, ẹkohode idem,+ ẹma unọ idem inemesịt utu ke ndima Abasi,+
5 ẹnyene enyọn̄ enyọn̄ ido uten̄e Abasi+ edi idụhe uwem ekekem ye odudu esie;+ wọn̄ọde kpọn̄ mmọ emi.+
6 Mme owo ẹto ke otu mmọ emi ẹnyọni n̄kari n̄kari ẹdụk ufọk+ ẹkemụm iban emi mîsọn̄ke idem nte mbuotekọn̄, kpa iban emi idiọkn̄kpọ ẹfịghede mmọ ke idem, nsio nsio udọn̄ ẹnyụn̄ ẹdade mmọ usụn̄,+
7 mmọ ẹtak ke ndikpekpep inyụn̄ ikemeke ndisịm nnennen ifiọk akpanikọ.+
8 Kpa nte Jannes ye Jambres+ ẹkebiọn̄ọde Moses, ntre ke mmọ emi n̄ko ẹka iso ndibiọn̄ọ akpanikọ,+ mmọ ẹdi mbon emi ekikere mmọ ama akabiara ofụri ofụri,+ isan̄ake n̄kpọ ye ukpepn̄kpọ mbuọtidem.+
9 Edi, mmọ idinamke n̄kọri ibe oro, koro ndisịme mmọ ayana ata in̄wan̄-in̄wan̄ ke iso kpukpru owo, idem kpa nte ndisịme owo iba oro akanade.+
10 Edi afo ama etịm etiene ukpepn̄kpọ mi, ye usụn̄ uwem mi,+ ye uduak mi, ye mbuọtidem mi, ye anyanime mi, ye ima mi, ye ime mi,
11 ye ukọbọ mi, ye ndutụhọ mi, ye mme orụk n̄kpọ oro ẹkewọrọde mi ke Antioch+ ye ke Iconium+ ye ke Lystra,+ ye mme orụk ukọbọ oro n̄kọyọde; edi Ọbọn̄ ama anyan̄a mi+ osio ke kpukpru oro.
12 Ke akpanikọ, kpukpru owo eke ẹyomde ndidu uwem uten̄e Abasi ke Christ Jesus ẹyesobo ukọbọ n̄ko.+
13 Edi mme idiọkowo ye mbon abian̄a ẹyedọdiọn̄ ẹdiọk ẹka iso, ẹbian̄a owo, owo onyụn̄ abian̄a mmọ.+
14 Edi afo ka iso ke se afo ekekpepde, ẹkenyụn̄ ẹkpekde fi enịm ke akpanikọ,+ sia ọfiọkde mbon emi afo ekekpepde mmọ oto+
15 ye nte ke toto ke nsek+ afo ama ọfiọk ndisana uwetn̄kpọ, emi ẹkemede ndinam fi enyene ọniọn̄ emi adade esịm edinyan̄a+ ebe ke edibuọt idem ye Christ Jesus.+
16 Abasi ọkọnọ odudu spirit ẹda ẹwet ofụri N̄wed Abasi,+ ndien enye ọfọn ndida nnọ ukpep,+ nsua nnọ owo,+ nnen̄ede mme n̄kpọ,+ nnọ ntụnọ+ ke edinen ido,
17 man owo Abasi etịm odot,+ eben̄e idem ọyọhọ ọyọhọ ndinam eti utom ekededi.+
