Genesis 1;1-31
1 Ke editọn̄ọ,+ Abasi+ okobot+ enyọn̄ ye isọn̄.+
2 Ndien isọn̄ ekedi ikpîkpu ye ukpọk, ekịm onyụn̄ odu ke enyọn̄ udem;+ anamutom odudu Abasi onyụn̄ asan̄a ke enyọn̄ mmọn̄+ aka iso afiak edem.+
3 Ekem Abasi ọdọhọ ete:+ “Yak un̄wana odu.” Ndien un̄wana+ odu.
4 Ndien Abasi okụt ke un̄wana ọfọn, Abasi onyụn̄ abahade un̄wana ye ekịm.+
5 Ndien Abasi okot un̄wana oro Uwemeyo+ onyụn̄ okot ekịm oro Okoneyo.+ Ndien mbubreyo odu, usenubọk onyụn̄ odu, akpa usen.
6 Ndien Abasi ọdọhọ ete: “Yak ikpaenyọn̄+ odu ke ufọt mmọn̄, yak ubahade onyụn̄ odu ke ufọt mmọn̄ ye mmọn̄.”+
7 Ekem Abasi anam ikpaenyọn̄ odu onyụn̄ anam ubahade odu ke ufọt mmọn̄ oro odude ke idak ikpaenyọn̄ ye mmọn̄ oro odude ke ikpaenyọn̄.+ Ndien edi ntre.
8 Ndien Abasi okot ikpaenyọn̄ oro Heaven.+ Ndien mbubreyo odu, usenubọk onyụn̄ odu, ọyọhọ usen iba.
9 Ndien Abasi ọdọhọ ete: “Yak mmọn̄ oro odude ke idak ikpaenyọn̄ oboho ke ebiet kiet, yak edisat ebiet onyụn̄ ọwọrọ ada.”+ Ndien edi ntre.
10 Ndien Abasi okot edisat ebiet oro Isọn̄,+ edi okot mmọn̄ oro obohode, Inyan̄.+ Ndien Abasi okụt ke ọfọn.+
11 Ndien Abasi ọdọhọ ete: “Yak isọn̄ etịbe mbiet, mme eto emi ẹsiahade n̄kpasịp,+ mme eto emi ẹn̄wụmde mfri ke orụk+ mmọ, eke n̄kpasịp ẹdude ke esịt,+ ke isọn̄.” Ndien edi ntre.
12 Ndien isọn̄ ọtọn̄ọ nditịbe mbiet, ye mme eto eke ẹsiahade n̄kpasịp ke orụk+ mmọ ye mme eto eke ẹn̄wụmde mfri, eke n̄kpasịp ẹdude ke esịt ke orụk+ mmọ. Ndien Abasi okụt ke ọfọn.
13 Ndien mbubreyo odu, usenubọk onyụn̄ odu, ọyọhọ usen ita.
14 Ndien Abasi ọdọhọ ete: “Yak se inọde un̄wana ẹdu ke ikpaenyọn̄ man mmọ ẹbahade uwemeyo ye okoneyo;+ yak mmọ ẹnyụn̄ ẹdi idiọn̄ọ ndida mfiọk mme ini ye mme usen ye mme isua.+
15 Ndien yak mmọ ẹdu ke ikpaenyọn̄ nte se inọde un̄wana eke ayamade ke isọn̄.”+ Ndien edi ntre.
16 Ndien Abasi anam ikpọ n̄kpọ iba oro ẹnọde un̄wana, akamba n̄kpọ oro ọnọde un̄wana akara uwemeyo, ekpri n̄kpọ oro ọnọde un̄wana onyụn̄ akara okoneyo, enye onyụn̄ anam mme ntantaọfiọn̄+ n̄ko.
17 Ntem ke Abasi enịm mmọ ke ikpaenyọn̄ ete ẹyama ke isọn̄,+
18 ẹnyụn̄ ẹkara uwemeyo ye okoneyo ẹnyụn̄ ẹbahade un̄wana ye ekịm.+ Ndien Abasi okụt ke ọfọn.+
19 Ndien mbubreyo odu, usenubọk onyụn̄ odu, ọyọhọ usen inan̄.
20 Ndien Abasi ọdọhọ ete: “Yak udịm udịm ukpọn̄+ eke ẹdude uwem ẹyọhọ mmọn̄, yak mme edibotn̄kpọ emi ẹfede ẹnyụn̄ ẹfe ẹkpọn̄ isọn̄ ke iso ikpaenyọn̄.”+
21 Ndien Abasi obot ikpọ unam mmọn̄+ ye kpukpru ukpọn̄ eke ẹdude uwem eke ẹnyụn̄ ẹsan̄ade+ ke mmọn̄ ke orụk mmọ, ye kpukpru mme enyene-mba edibotn̄kpọ emi ẹfede, ke orụk+ mmọ. Ndien Abasi okụt ke ọfọn.
22 Ndien Abasi ọdiọn̄ mmọ, ete: “Mbufo ẹtọt ẹnyụn̄ ẹwak ẹnyụn̄ ẹyọhọ mmọn̄ ke inyan̄,+ yak mme edibotn̄kpọ emi ẹfede ẹnyụn̄ ẹwak ke isọn̄.”
23 Ndien mbubreyo odu, usenubọk onyụn̄ odu, ọyọhọ usen ition.
24 Ndien Abasi ọdọhọ ete: “Yak isọn̄+ osion̄o ukpọn̄ eke ẹdude uwem ke orụk mmọ, ufene+ ye unam eke ẹnyọnide+ ye unam ikọt+ ke orụk mmọ.” Ndien edi ntre.
25 Ndien Abasi obot unam ikọt ke orụk mmọ ye ufene ke orụk mmọ ye kpukpru unam eke ẹnyọnide ke isọn̄ ke orụk+ mmọ. Ndien Abasi okụt ke ọfọn.
26 Ekem Abasi ọdọhọ ete: “Yak nnyịn+ inam owo isịn ke mbiet+ nnyịn, etie+ nte nnyịn, yak mmọ ẹnyụn̄ ẹkara iyak ke inyan̄ ye mme edibotn̄kpọ emi ẹfede ke enyọn̄ ye ufene ye ofụri isọn̄ ye kpukpru unam eke ẹnyọnide ke isọn̄.”+
27 Ndien Abasi obot owo ke mbiet esie, ke mbiet Abasi ke obot enye;+ eren ye n̄wan ke enye obot mmọ.+
28 N̄ko, Abasi ọdiọn̄+ mmọ, Abasi onyụn̄ ọdọhọ mmọ ete: “Mbufo ẹtọt+ ẹnyụn̄ ẹwak ẹnyụn̄ ẹyọhọ ke isọn̄ ẹnyụn̄ ẹkan+ enye, ẹnyụn̄ ẹkara+ iyak ke inyan̄ ye mme edibotn̄kpọ emi ẹfede ke enyọn̄ ye kpukpru mme odu-uwem edibotn̄kpọ eke ẹnyọnide ke isọn̄.”
29 Ndien Abasi ọdọhọ ete: “Sese mmọnọ mbufo kpukpru eto eke ẹsiahade n̄kpasịp, eke ẹdude ke iso ofụri isọn̄, ye kpukpru eto eke mfri esie asiahade n̄kpasịp.+ Ndien mmọ ẹyedi udia+ mbufo.
30 Mmada kpukpru awawa ikọn̄ nnọ kpukpru unam ikọt ye kpukpru edibotn̄kpọ emi ẹfede ye kpukpru mme odu-uwem ukpọn̄ eke ẹnyọnide ke isọn̄, ke udia.”+ Ndien edi ntre.
31 Ndien Abasi okụt kpukpru se enye akanamde, ndien sese! ẹfọn etieti.+ Ndien mbubreyo odu, usenubọk onyụn̄ odu, ọyọhọ usen itiokiet.
