Mark 4;1-41
4 Ekem enye ọtọn̄ọ ntak ekpep n̄kpọ ke mbeninyan̄.+ Ndien ata akwa otuowo ẹbono ẹkpere enye, tutu enye odụk etie ke ubom ke inyan̄, edi ofụri otuowo emi ẹdude ke mbeninyan̄ ẹda ke obot.+
2 Ntre enye ada uwụtn̄kpọ+ ekpep mmọ ediwak n̄kpọ onyụn̄ ọdọhọ mmọ ke ukpepn̄kpọ esie ete:+
3 “Ẹkpan̄ utọn̄. Sese! Asuan n̄kpasịp ọkọwọrọ aka ndisuan n̄kpasịp.+
4 Ndien nte enye asuande, ndusụk n̄kpasịp ẹduọn̄ọ ke mbenusụn̄, mme inuen ẹnyụn̄ ẹdi ẹditan̄ mmọ ẹta.+
5 Ndien n̄kpasịp en̄wen ẹduọn̄ọ ke isọn̄ itiat emi mmọ mînyeneke ediwak ntan, ndien mmọ ẹtịbe kpa idaha oro sia ntan mîtụn̄ọke.+
6 Edi ke ini utịn asiahade, ọfọp mmọ, ndien sia mînyeneke orụn̄ mmọ ẹyemede.+
7 Ndien n̄kpasịp en̄wen ẹduọn̄ọ ke otu n̄kukịm, ndien n̄kukịm ẹkọri ẹbaba mmọ, mmọ inyụn̄ in̄wụmke mfri.+
8 Edi mmọ eken ẹduọn̄ọ ke eti isọn̄,+ ndien, ke ini mmọ ẹtịbede ẹwọn̄ọ ẹnyụn̄ ẹkọride, mmọ ẹtọn̄ọ ndin̄wụm mfri, ndien mmọ ẹn̄wụm utịm ikedịp ye duop, ye utịm ike-ata ye utịm ikikie.”+
9 Ntre enye adian ikọ emi ete: “Yak owo eke enyenede utọn̄ ndikop okop.”+
10 Ekem ke ini enye odude ikpọn̄, mbon emi ẹdude ye enye ọkọrọ ye mbet duopeba ẹbụp enye ẹban̄a mme uwụtn̄kpọ oro.+
11 Ndien enye ọdọhọ mmọ ete: “Ẹyak mbufo ẹfiọk edisana ndịben̄kpọ+ obio ubọn̄ Abasi, edi amaedi mbon emi ẹdude ke an̄wa, kpukpru n̄kpọ ẹdi ke uwụtn̄kpọ,+
12 man, kpa ye oro mmọ ẹsede, mmọ ẹkûkụt, kpa ye oro mmọ ẹnyụn̄ ẹkopde, mmọ ẹkûfiọk se ọwọrọde, mbak ẹdikam ẹfiak edem ndien ẹfen mmọ.”+
13 N̄ko-n̄ko, enye ọdọhọ mmọ ete: “Mbufo ifiọkke uwụtn̄kpọ enye emi, ntre ndien mbufo ẹdinam didie ẹfiọk kpukpru uwụtn̄kpọ eken?
14 “Asuan n̄kpasịp oro asuan ikọ.+
15 Mmọ emi ẹdi mbon oro ẹdude ke mbenusụn̄ emi ẹsuande ikọ; edi ndondo oro mmọ ẹkopde Satan edi+ editan̄ ikọ eke ẹkesuande ke esịt mmọ efep.+
16 Ndien kpasụk ntre mmọ emi ẹdi mbon oro ẹsuande ke isọn̄ itiat: ndondo oro mmọ ẹkopde ikọ emi, mmọ ẹbọ enye ye idatesịt.+
17 Edi mmọ inyeneke orụn̄, edi mmọ ẹka iso ẹdu ke esisịt ini; ndien ndondo oro ukụt m̀mê ukọbọ etịbede ke ntak ikọ emi, mmọ ẹtuak ukot ẹduọn̄ọ.+
18 Mmọ efen ẹsụk ẹdu emi ẹsuande ke otu n̄kukịm; mmọ emi ẹdi mbon oro ẹkopde ikọ emi,+
19 edi editịmede esịt+ editịm n̄kpọ emi ye abian̄a abian̄a odudu inyene+ ye udọn̄+ edinyene mme n̄kpọ eken ẹbụmede ẹdụk ẹnyụn̄ ẹbaba ikọ oro, ndien enye in̄wụmke mfri.+
20 Ke akpatre, mbon oro ẹkesuande ke eti isọn̄ ẹdi mmọ emi ẹkopde ikọ emi ẹnyụn̄ ẹbọde enye ke idatesịt ẹnyụn̄ ẹn̄wụmde mfri utịm ikedịp ye duop ye utịm ike-ata ye utịm ikikie.”+
21 Ndien enye obụp mmọ ete: “Nte ẹsida utuenikan̄ ẹdi man ẹmen aban̄ ẹfụk m̀mê ẹnịm ke idak n̄kpana? Nte owo isidaha idi man ẹmen ẹwụk ke uwụk utuenikan̄?+
22 Koro idụhe n̄kpọ eke edịbede ibọhọke man ẹyarade enye; idụhe n̄kpọ eke ẹtịmde ẹdịp ibọhọke man ọwọrọ ana an̄wan̄wa.+
23 Owo ekededi eke enyenede utọn̄ ndikop, yak enye okop.”+
24 Enye onyụn̄ ọdọhọ mmọ ete: “Ẹnọ ntịn̄enyịn ke se mbufo ẹkopde.+ Udomo eke mbufo ẹdade ẹdomo ẹnọ owo ke ẹdinyụn̄ ẹda ẹdomo ẹnọ mbufo,+ ih, ẹyedian efen efen ẹnọ mbufo.+
25 Koro ẹyedian efen efen ẹnọ owo eke enyenede; edi owo eke mînyeneke, ẹyebọ enye kpa se enye enyenede.”+
26 Ntre enye ọdọhọ ete: “Ke usụn̄ emi obio ubọn̄ Abasi etie kpa nte ke ini emi owo asuande n̄kpasịp ke isọn̄,+
27 ndien enye ede idap ke okoneyo onyụn̄ adaha ada ke eyo esierede, n̄kpasịp etịbe onyụn̄ ọkọri, ọniọn̄, edi enye ifiọkke nte asan̄ade.+
28 Isọn̄ osion̄o mfri ke idemesie sụn̄sụn̄, ebem iso osion̄o ikọn̄, ndien editop idem, ekem edidian n̄kpasịp ọyọhọ.
29 Edi ndondo oro mfri emi ọsọn̄de, enye esịn ofụt ukpen̄e esie, koro ekem ini ukpen̄e.”
30 Ndien enye ọdọhọ ete: “Nnyịn idida obio ubọn̄ Abasi idomo ye nso, mîdịghe nso uwụtn̄kpọ ke nnyịn idida iwụt enye?+
31 Ebiet n̄kpasịp mustard, emi edide ke ini ẹketọde ke isọn̄, enye ekedi n̄kpri-n̄kan ke otu kpukpru n̄kpasịp eke ẹdude ke isọn̄+—
32 edi ke ẹma ẹketọ enye, enye ọkọri onyụn̄ akabade okpon akan kpukpru ikọn̄udia eken onyụn̄ asiaha ikpọ n̄kọk,+ tutu mme inuen enyọn̄+ ẹkeme ndikụt itieidụn̄ ke mfụt esie.”+
33 Ntre enye ada ediwak uwụtn̄kpọ+ eke ẹtiede ntem etịn̄ ikọ ọnọ mmọ, adan̄a nte mmọ ẹkemede ndikop.
34 Ke akpanikọ, enye itịn̄ke ikọ inọ mmọ ke mîdịghe ke uwụtn̄kpọ, edi enye ayanam kpukpru n̄kpọ ẹn̄wan̄a mme mbet esie ke ini mmọ ẹdude ikpọn̄.+
35 Ndien ke usen oro, ke ini esịmde mbubreyo, enye ọdọhọ mmọ ete: “Ẹyak nnyịn ibe ika edem mbeninyan̄ oko.”+
36 Ntre, ke mmọ ẹma ẹkesio otuowo unyọn̄, mmọ ẹmen enye ke ubom, kpa nte enye eketiede, mme ubom efen ẹma ẹnyụn̄ ẹdu ye enye.+
37 Edi akwa oyobio etịbe, mbufụt onyụn̄ ọtọ odụk ubom, tutu mmọn̄ ekpere ndiyọhọ ubom oro.+
38 Edi enye odu ke etak ubom, ke ede idap ke udotibuot. Ntre mmọ ẹdemede enye ke idap ẹnyụn̄ ẹdọhọ enye ẹte: “Andikpep, nte afo ukereke ke nnyịn imọn̄ itak?”+
39 Ndien enye edemede onyụn̄ aduari ofụm onyụn̄ ọdọhọ inyan̄ ete: “Dobo! Na sụn̄!”+ Ndien ofụm odobo, akwa ndobo onyụn̄ odu.+
40 Ntre enye ọdọhọ mmọ ete: “Ntak emi mbufo ẹfehede ndịk? Nte mbufo inyeneke kan̄a mbuọtidem ndomokiet?”
41 Edi ọkpọsọn̄ ndịk anam mmọ, mmọ ẹnyụn̄ ẹdọhọ kiet eken ẹte: “Anie ededi emi, emi ofụm ye inyan̄ ẹkopde uyo esie?”+
